ဒေါ ဂုဝ် 2
2
လွင် ဆီငဲ ဒီလှဝ်
1ပါယ် တီ ပီ ဘူင် ဇဝ်ဖြာ ဟဲ့ ဟွတ့် ဟွတ့် တူတ့်။ ဘော ဂါင်ဟြာဝ် ဘော ကာဒါယ် ဘော ဒွန် မျုဝ် အီ ကွယ် ဒဲင် ကာဒါယ် ဟဲ့ ဟွတ့် ဟွတ့် တူတ့်။ 2ဝါယ် အန် တီ ဒေါ ဇမ် ဆီငဲ မ့ဘူ၊ ဇဝ်ဖြာ ဒီလှဝ်၊ တူ ဘူင် မာဆေ။ 3ဆီငဲ မ့ဘူ တီ၊ ဇဝ်ဖြာ မွင့်ကာရာ ဒွါ၊ တဲး ဆီငဲ တီ ဝီ ဘဲန် ဆီငဲ ဘွတ်။ ခုဝ်၊ ဆီငဲ မ့ဘူ တီ မုး ဆီငဲ ပဲ့ ဟဲ့ ဒီလှဝ် ဇဝ်ဖြာ ဝါယ် ဟဲ့ ဟွတ့် အန် ဘူင် ဘ့လေး တူတ့် ဒွန် မျုဝ် အီ မိုဝ်း ဒဲင် ကာဒါယ်။
လွင် ဇဝ်ဖြာ ဘူင် ဘ့လေး ဒူအီ
4ဒေါ တီ နီ န့ ဒီ ဝီ ကာလာင် လွင် အီ ပါယ် ဒီ ဘုဝ် ဘဲန် ဂါင်ဟြာဝ် ဘော ကာဒါယ် တီ ဘော လွင် အာခြာဝ် ပဲ့ ဟဲ့ ဘူင် ဘ့လေး ဇဝ်ဖြာ ဇိုဝ် တီ ဒွန် မျုဝ်။
5ဒေါ အန် တီ ညှမ် မိုဝ်း ပေတ့် အီ လတ့် ဒဲင် ကာဒါယ်။ န့ မိူဝ် ညှမ် မိုဝ်း ဒဝ် မျုဝ် မှဝ် အီ လတ့် ဒဲင် ကာဒါယ်။ န့ ညှမ် မိုဝ်း ဇိုဝ် တီ ခုဝ်၊ ဇဝ်ဖြာ ညှမ် တဲး န့ မိုဝ်း ဂ့လာယ် ဒဲင် ကာဒါယ်။ န့ မိူဝ် ညှမ် မိုဝ်း ဒူအီ အီ ရန့် မာန် ဂေ နာ။ 6ဒေါ အန် တီ န့ ယီ မိုဝ်း အိုမ် အီ ကွယ် ခြိုမ် ကာဒါယ်။ အိုမ် တီ မိူဝ် ဟုဝ့် နာ ဒဲင်၊ တဲး ကာဒါယ် ညွှတ် အိုမ်။ 7ဟဲ့ ဟွတ့် ပန် တီ ဇဝ်ဖြာ မိူဝ် ဘူင် ဒူအီ။ အန် ဒိုဝ်း ကာဒါယ်၊ ဘူင် အာရိုပ် ဒူအီ။ ဟဲ့ ဟွတ့်၊ အန် ဟိုဝ်း ဖွိုမ် အန် တဲး န့ လိုပ် ခဲင် ဂုင်မုး အာရိုပ် တီ။ ပါယ် တီ အန် ဇဝ် တဲး အာရိုပ် တီ မိုဝ်း အာဆာက်။
8ဇဝ်ဖြာ မိူဝ် ဘူင် ကာပိုမ်၊ ဆမ် ဘဲန် မျုဝ် ဘဲန် မျုဝ်။ ကာပိုမ် တီ၊ န့ ကွယ် ဘ့လာက် နာ လေး ဆီငဲ မိူင် အေဒေန်။ ဇဝ်ဖြာ မိူဝ် တဲး ဒူအီ ပဲ့ ဟဲ့ ဘူင် အန် ကွယ် ခဲင် ကာပိုမ် တီ။ 9အန် ဇဝ် မိူဝ် တဲး ဟေ ဘဲန် မျုဝ် ဘဲန် မျုဝ် လတ့် ခဲင် ကာပိုမ် တီ။ ဟေ ဂေ တီ န့ ယွတ် စှိတ် ယွတ် ဒါခိုယ်။ ဘ့လေ ဒွန် မျုဝ် ဒီ ဟေ တီ ဘော ဆီငဲး၊ မွှိုမ် ဟူမ်။ န့ ဘော မိုဝ်း ဟေ အူ ကာဒင် အီ ဒွါ အာဆာက် ဒီ အီ။ ဘော ဟေ ပေါ အူ ကာဒင် အီ တဲး အီ နပ် ဒီ ကာယဝ်း အီ မွှိုမ် အီ တူ မွှိုမ်။ ဟေ အာ ကာဒင် တီ ကွယ် ဒီ ကာတဲ ကာပိုမ် တွိုန်။
10ခဲင် ကာပိုမ် အေဒေန် တီ၊ န့ မိူဝ် မိုဝ်း တုဝ်း အိုမ် တာင် အီ လေး ခဲင် ကာဒါယ်၊ တဲး န့ ဘိန် ဒဝ် အီ လတ့် ဒွန် မျုဝ် ခဲင် ကာပိုမ်။ ဟဲ့ ဟွတ့်၊ တုဝ်း အိုမ် တီ ဝီ ကာယဝ်း ဘဲန် ဖွုန် ဘ့လဲင်။ 11ဘ့လဲင် အူ ညွင့် စိူဝ် အိုမ် ဖီဆွန်။ ဘ့လဲင် တီ ဟာဝ် ရူပ် မိူင် ဟာဝီလ။ ခဲင် မိူင် တီ မိုဝ်း ခြိဝ်။ 12ခြိဝ် ခဲင် မိူင် ဟာဝီလ တွိုန် ဟဲ့ ငဝ်း တာင်။ ခဲင် မိူင် တီ န့ မိူဝ် မိုဝ်း ကာညန် ဟေ ဘေဒါလူင် ဘော ဆဲန့် ဝွင့် လုယ်။ 13ဘ့လဲင် အိုမ် ပေါ အူ ညွင့်၊ အန် စိူဝ် ဘ့လဲင် ဂီဟူန်။ အန် လှဲ ဟာဝ် နာ ရေတ့် မိူင် ကူဆာ ဘော မိူင်။ 14ဘ့လဲင် အိုမ် ဟာအူယ်၊ အန် စိူဝ် ဘ့လဲင် ဟီဒဲက်။ ဘ့လဲင် တီ လှဲ ဟာဝ် နာ လေး ဆီငဲ မိူင် အာဆူရာ။ ဘ့လဲင် အိုမ် မ့ဖွုန်၊ အန် စိူဝ် အူဖာရာတ်။
15ပန် တီ ဇဝ်ဖြာ တဲး ဒူအီ ကွယ် ခဲင် ကာပိုမ် အေဒေန် တွိုန်။ အန် စ်ု ဒူအီ၊ တဲး အန် ရန့် ဂါန် ခဲင် ကာပိုမ် ဘော ဘ်ု ကာပိုမ် တီ။ 16ဇဝ်ဖြာ မိူဝ် ဒမ် ဒူအီ တဝ်း၊ “ခဲ့ ကွယ် ဟေ ခဲင် ကာပိုမ် နီ၊ မဲ ပွိုန် ဟူမ် ဘ့လေ အန်။ 17န့ ယီ မုး ဟေ အီ တဲး အီ နပ် ဒီ ကာယဝ်း အီ မွှိုမ် ဂါယ် အီ တူ မွှိုမ်။ ဘ့လေ ဟေ တီ၊ မဲ တူ ပွိုန် ဟူမ်။ ဆေ မဲ ဟီ ဟူမ် ဆီငဲ မှဝ်၊ မဲ ဒီ ဘော ယမ်။”
18ဝါယ် အန် တီ ဇဝ်ဖြာ တဝ်း၊ “ဆေ ဒူအီ ကွယ် အန် အူ ဝီ၊ အာဝ် မွှိုမ် ဒီ အန်။ အုဝ် ဒီ ဘူင် တဲး န့ မိုဝ်း အီ စွယ် အန်။”
19ဇဝ်ဖြာ မိူဝ် ဟဲ့ ဒိုဝ်း ကာဒါယ်၊ ဘူင် တဲး န့ မိုဝ်း ဒုဝ် ဆတ်ဒါဝါ ဒွန် မျုဝ် အီ ကွယ် ခဲင် ပြဲ ဘော ဂေ မာဆိမ် အီ ကွယ် ခဲင် ဘ့လေန့်။ အန် ဇဝ် မိူဝ် တိုယ် ဒုဝ် ဂေ တီ၊ တဲး ဂေ တး ဒူင် ကွယ် ဒူအီ၊ ဇဝ်ဖြာ မိူဝ် ယွတ်၊ မှဝ် ဒူအီ တွိုန် ဒီ ပါယ် ဒီ ဒါင် စိူဝ် ဒီ ဒုဝ် ဆတ်ဒါဝါ ဂေ တီ။ ဒူအီ တွိုန် ဘော တဲး စိူဝ် မျုဝ် မှဝ်၊ အာ တီ ဝီ ဘဲန် စိူဝ် ဂေ ဆေဆေ။ 20ပါယ် တီ ဒူအီ တွိုန် ဝီ ဒါင် စိူဝ် ဒီ ဒုဝ် ဆတ်ဒါဝါ ဒွန် မျုဝ်၊ ဘော ဒီ မာဆိမ် အီ ကွယ် ခဲင် ဘ့လေန့် ဘော ဒီ ဒုဝ် ဆတ်ဒါဝါ ဒွန် မျုဝ် အီ ကွယ် ဒွန် နာ ဒွန် ပ့လုဝ့်၊ အန် ဒါင် စိူဝ် ဒီ မျုဝ် မှဝ် မျုဝ် အန်။ မာလဲ၊ ခဲင် ဒုဝ် ဆတ်ဒါဝါ ဂေ တီ ယီ တူ မိုဝ်း အာဆေ အီ ပွိုန် စွယ် ဒူအီ အီ စိူဝ် အာဒါမ်။
21ဝါယ် အန် တီ ဇဝ်ဖြာ တဲး အာဒါမ် မိုဝ်း နဝ်း ဆီ အိတ်၊ တဲး အန် အိတ် ပိဝ်။ ပန် တီ အန် ဇဝ် မိူဝ် ဒိုဝ်း လေး ကာအာင် ဘြေတ့် အန် အူ ညွင့်။ ဟဲ့ ဟွတ့်၊ အန် ဝီ ဒိုဝ်း ယင် အန်၊ ကာဘိတ် ဘြေတ့် အန် တွိုန်။ 22ဇဝ်ဖြာ မိူဝ် ဒိုဝ်း ကာအာင် ဘြေတ့် ပဲ့ ဟဲ့ ဒိုဝ်း အန် ခဲင် ဒုဝ် အာဒါမ် တွိုန်။ အန် မိူဝ် ဘူင် တဲး န့ ဘဲန် အီဘိုန့်။ ဟဲ့ ဟွတ့် အန် ဝီ ဒိုဝ်း အီဘိုန့် တီ၊ ဒွါ ဒီ အီမာယ်။
23အီမာယ် ယီ တဝ်း၊ “အာတီ ဟဲ့ မုး ကာအာင် အီ ဟဲ့ ကွယ် ခဲင် ကာအာင် အုဝ်။ န့ မိူဝ် မုး ယင် အီ ဟဲ့ ဒွိုမ် ကွယ် ခဲင် ယင် အုဝ်။ ခုဝ်၊ အန် ဇဝ် ဟဲ့ ဒိုဝ်း လေး အန် ခဲင် ဒုဝ် အီမာယ်။ အုဝ် ဒီ တဲး အန် စိူဝ် အီဘိုန့်။”#2:23 ဂြုဝ်း ‘အီဘိုန့်’ ဂါယ် ဂြုဝ်း ‘အီမာယ်’ ခဲင် ဂြုဝ်း ဟဲဘြဲ၊ ဂါယ် လာယ် ကာဆူ 24ခုဝ် အန် တီ၊ အီမာယ် ဒီ လေး တ ဂုန့် မာ အန်၊ တဲး အန် ဒူပ် အီဘိုန့် အန်။ ဂါယ် မိူဝ် ဒီ ဘဲန် ပီ ဒူအီ အူ ဝီ၊ ပီ ယင် အူ မျုဝ်။
25ဒေါ အန် တီ ဂါယ် အာ ဝီ ဟဲ့ ကွယ် ဒုဝ် ဂ့လ၊ ဘော အီဘိုန့် ဘော အီမာယ်။ ဂါယ် ယီ တူ ဆာယ်။
ప్రస్తుతం ఎంపిక చేయబడింది:
ဒေါ ဂုဝ် 2: pce
హైలైట్
షేర్ చేయి
కాపీ
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.