2 Korinto 6
6
1Yami mntheyaq meepah Utux Baro mpdudul nami yamu uri. Iya wano kmhemuc mangal huwe Utux Baro. 2Ado rmnengo ka heya:
“Ali ngalan huwe ciida we, wada ku smruwa yamu da.
Ali mdoi baga ciida we, wada ku dmayo yamu da.”
Tai, saya ka ali ngalan huwe da! Tai, saya ka ali mdoi baga da! 3Yami we ini nami hetur ani ima meniq ani maanu ooda. So maha daha uxe ssnyanun ka qqeepah nii. 4So daha krnahun ptuura dheya we kiya ka tnqliyan Utux Baro meniq ani maanu noda: Mntena so meeniq knremun, mqraqil, qnrqilan riyung, mqraqil, 5pnsruwan, shetur sapah kuung, pnrudu, bqerus, knyagan ma, knrayan. 6Meniq psbgurah qnaqah, gnkela, knremun, huwe, slgelu Bgihur Utux, gnaalu ini knnangi, 7kari bale ba, beyax Utux Baro, spoda na qyqeya mccebu msderux noda ga meniq narac ma ga iril baga. 8Meniq tndahu ma pqsiqa, malu ngayan ma naqah ngayan. So ta nii psridil seediq we, nuuqu kiya ka bale ba. 9So hari ini klai seediq ma, ani sa klaun seediq kana. So hari ga mhuqil ma, ani si ga muudus. So hari ga pkdraun ma, ani sa ini phqili. 10So hari ga naqah ka kuxul na, ani sa mqaras klaali. So hari ga qrinuc we, nuuqu kiya ka wada pttuku ba hbaro seediq. So hari uka ani maanu we, ani mmaanu niqan na.
11Seediq Korinto! Yami mquri yamu we, bale ba ka quwaq nami, lhebun nami we ga traguh bale uri. 12Msdgehing ka lhebun namu we uxe ririh yami. Ririh yamu nanak ka wada pkdgehing lhebun namu nanak. 13Yamu uri we puyu traguh bale lhebun cmiyuk yami. Kari mu nii we, mntena ku so nii rmengo laqi mu.
Sapah Utux Baro Muudus Ani Knuwan
14Iya suupu mheal 1 kudo dseediq ini snhii ka yamu. Msderux ma ini ksderux we maanu ka pnugluban daha ho? Knledax ma kuung we maanu ka pnugluban daha ho? 15Kiristo ma Beliar we maanu ka pnspuwan daha ho? Snhii ma ini snhii we maanu ka pnugluban na ho? 16Sapah Thmkuwan nuUtux Baro ma tikung we maanu ka pntena na ho? Ado ita we kiya ka Sapah Thmkuwan nuUtux Baro muudus ani knuwan. Mntena so kari rnengo Utux Baro:
“Yaku we mptheyaq ku meniq ckceka daha mosa ma bbrinah.
MpuUtux ku Baro dheya,
dheya we mpseediq mu.”
17Maanu so kiya rnengo ka Bukung:
“Latac peeyah ckceka daha ka yamu,
pniqi pnsnakan dheya ka yamu.
Iya tlengi ka qyqeya rutiq,
So kiya de mpqaras ku maangal yamu.
18Yaku we mpTama namu,
yamu we mplaqi mu.
Nii we rnengo Bukung Kana beyax.”
ప్రస్తుతం ఎంపిక చేయబడింది:
2 Korinto 6: Stgdaya
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
The Bible Society in Taiwan, 2020
© 台灣聖經公會版權所有，2020