2 Korinto 12
12
Mita Utux Pnqita ma Pntuura
1Ani ku psparu we uka ka rrihan na. Ani so kiya we ida ku asi ka tmdahu. Saya de mprengo ku tuutux pnqita Bukung ma pntuura na. 2Mnkela ku 1 seediq nKiristo. Heya we wada ngalun betaq msn3 karac baro 14 knkawas cuuxal. Yaa ga ckceka heyi na, ini ku kela. Yaa ga nganguc heyi, ini ku kela uri. Wano Utux Baro ka mkela. 3Mnkela ku 1 seediq so nii, ani yaa meniq ckceka heyi, ani yaa meniq nganguc heyi, ini ku kela kana. Wano Utux Baro ka mkela. 4Wada desun malu riyung nniqan ma, mbahang kari lneing. Kari nii we ini rrngaani seediq. 5Quri seediq nii we, mptndahu ku. Kiya de, quri so yaku we, wano ba knuuwic mu de, uka ka tndhuun mu. 6Ani ku smruwa kmtndahu we uxe ku nii pkuuro uri. Ado mprengo ku kari bale ba. Kiya we ini ku ba mprengo, hmuwa psparu qmita yaku ka seediq de, maha mgkala qntaan daha ma bnhangan daha peeyah heyi mu. 7So uxe mscuqi lnglungun ka nangal mu pntuura de, maha ku krinah psparu. So kiya de, niqan 1 pako ga psaun ckceka heyi mu. Nii we pneeyah snkgulan Satang meyah pqraqil kenan. So ku uxe psparu yaku nanak. 8Quri so ooda nii we, mn3 ku dmurun Bukung, so maha na ngalun ka pako nii mlatac peeyah kenan. 9Rmengo yaku ka heya: “Gnhuwe mu we mptuku su dooyun. Ado beyax mu we mpttuku riyung meniq knuuwic seediq.” Maanu so kiya de, smkuxul ku psparu knuuwic mu, so maha mubung qmlahang kenan ka beyax Kiristo. 10Ririh Kiristo, ngalun mu mqaras ka knuuwic, pnqsiqa, mqriqu, tnqilan, qnqihan. Ado ani knuwan muuwic ku ciida de, ani knuwan ge mbeyax ku uri da.
Pslhbenun Pssliyan Korinto ka Poro
11Yaku we mseediq ku mngataq. So ku nii we pneeyah pskixan namu. Ado bale ba we naka ku namu stndahu. Ani ku uka hari rrihan we, uka ani 1 ka ga meniq toma prparu snkgulan. 12Meniq ku ckceka namu we, sooda mu kana knrmenan. Spooda mu pnskraya qneepah Utux, sklwiun noda ma, paru beyax ptuura pnugkela qneepah snkgulan. 13Wano ini ku sgiila yamu nii we, yamu we maanu ka ini namu dehuk pntena pssliyan icil ho? So nii ini na pntena we, srwai ku hiya.
14Saya de, gisu ku psramal maha ku mn3 oosa mu yamu hiya. Uxe ku mpswila yamu nina. Ado gimun mu we yamu, uxe qyqeya namu. Iya seli pila quri tama bubu ka lqlaqi, psseli pila lqlaqi ka tama ma bubu. 15Kmsruwa ku bale ririh utux bgihur namu smeeliq ku pila ma beyax. Krinah ku gmaalu yamu de, maha dmudul biciq ka nangal mu gnaalu namu da peni? 16Ani na da, ini ku kmpswila yamu ka yaku. Ani so kiya we, duma namu we ga rmengo, mpkraki ku ma, gisu ku lmngelung mphuwa ku mekuy yamu. 17Seediq snkgulan mu yamu hiya we, yaa ku pnooda dheya wada ku mangal snadu peeyah yamu peni? 18Dnudul ku Titos mosa yamu hiya, kiya uri smnkagul ku mtswai hiya msuupu heya mosa we, yaa wada moda mangal snadu namu ka Titos da peni? Uxe ta pneyah 1 ba Bgihur Utux meepah ka ita peni? Uxe pskingal ka qneepah ta uri peni?
19Yani namu lmngelung yami we gisu nami dmayo rmengo yami nanak meniq berah namu ho? Bale ba we, gisu nami rmengo kari meniq ckceka Kiristo ma berah Utux Baro. Sgaalu mu, ririh pgdehu yamu ka kana ooda so nii. 20Kcugun mu ge, mosa ku dungal ciida we, maha ini pnlengu sntangan mu yamu. Mita namu yaku we maha ini pntena sntangan namu uri. Kcugun mu we meniq tgdiyal kari, snhuur, pkseang, sqquru, ssngayan, smetur krkari, ppsparu ma, pprudu. 21Kcugun mu ge, mosa ku dungal yamu hiya ciida we, psqaun ku na berah namu ka Utux Baro. Kiya uri we mpqnaqah kuxul mu, ado hbaro seediq cuuxal we, mnoda qnquwan noda, meepah qnrutiq, mnhemuc mbesu truma ma, mnhemuc moda ini kmpriyux lnglungan daha.
ప్రస్తుతం ఎంపిక చేయబడింది:
2 Korinto 12: Stgdaya
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
The Bible Society in Taiwan, 2020
© 台灣聖經公會版權所有，2020