2 Korinto 1
1
Dmurun Kari
1Mnoda lnglungan Utux Baro ngalan ku na snkgulan Kiristo Yesu ka yaku Poro ma mtswai ta Timoteos we yamu pssliyan nuUtux Baro ga Korinto msuupu kana dsnheyi ga Aqaia ka pdesun mu patis nii. 2Tai so meeniq yamu ka huwe ma msbleyaq pneeyah Utux Baro ta ma Yesu Kiristo Bukung ta.
3Tai so qrasun tmdahu ka Utux Baro tama Yesu Kiristo Bukung ta! Heya we tama paru bale gnaalu ma Utux Baro mege lmlamu smbbeyax. 4Meniq nami mqraqil we smbbeyax menan ka heya. Kiya de ddehuk miyan moda pnsbeyax Utux Baro menan smbbeyax miyan seediq ga mooda ani maanu mqraqil. 5Mntena yami ga msuupu Kiristo mangal lmlamu mqraqil. Yami uri we smtama nami Kiristo mangal nami smbyaxan. 6Nasi miyan moda mqraqil we kiya ka aangal namu pnsbyaxan ma kkuudus namu kiya. Nasi miyan mangal pnsbyaxan we aangal namu pnsbyaxan uri. Knremun namu moda mqraqil so nii miyan daan we ngalun namu ka pnsbyaxan nii. 7Kiya de mgdehu ba ka sntangan miyan quri yamu. Ado klaun nami, wada namu msuupu mheal mqraqil nami ka yamu. So kiya uri mpsuupu maasu pnsbyaxan nami uri.
8Mtswai, pgkela mu yamu ka ndaan miyan mqraqil Asia. Ado pexan nami daha so uxe nami ddehuk knremun ma betaq miyan uka sntangan kkuudus. 9Ida ta maha phqilun mnesa miyan lmngelung. Kiya de uxe nami sstama menan nanak ma sstama miyan Utux Baro pkuudus wada mhuqil. 10Utux Baro we wada pkuudus menan peeyah so nii paru kcugun mhuqil. Heya we ida mpkuudus menan ma heya ka snluwan miyan meyah pkuudus nexal uri. 11Yamu uri we oda msuupu dmurun dmayo menan. So kiya de yami ka sqaras hbaro seediq. Ado egu ka dnurun daha de maangal nami gnhuwe na.
Psgcuqi Osa na Korinto ka Poro
12Stndahu miyan we so nii: Pnugluban nami yamu meniq noda nami bobo dxeral we pnooda ba lnglungan miyan ma bale ba lhebun bnege Utux Baro, mnoda huwe Utux Baro uxe sntama knkela seediq. Kana so nii we pgkela menan ka lhebun miyan. 13Ado nii miyan spatis yamu we uka ka uxe namu dhekun smepu ma mkela. So namu maha bale ba dhekun mkela kika snluwan mu yamu. 14Wada namu mkela tikuh menan. Kiya de ali Yesu Bukung ta ge, ngalun namu ttndahu ka yami mntena so yami ngalan nami ttndahu ka yamu.
15Ado klaun mu bale ka so nii de satang ku meeyah plaale yamu hiya so namu mangal pnrana rrihan. 16Pkreelu ku mooda yamu mpquri Makedon. Kiya de mpeeyah ku Makedon meyah ku yamu dungal we skwayun ku namu maha ku Yudaya mesa ka snengan mu. 17Yaa md2 lnglungan ka sneengan mu so nii ho? Mntena sneengan seediq bobo dxeral ka snengan mu peni? Kiya de rinah mesa “Uxe” ma rinah mesa “Un” uri. 18Spooda mu knbale Utux Baro rmengo, gnrean miyan kari yamu we, uxe kesun kiya ma uxe so kiya. 19Ado gnarang Siloanos, Timoteos ma yaku quri Yesu Kiristo laqi Utux Baro ckceka namu we uka bale ka mesa kiya ma uxe so kiya. Kingal bale kiya meniq hiya. 20Ado kana sntangan Utux Baro we ani egu ani biciq meniq Kiristo kana de kiya de sooda ta heya rmengo “Ameng”, speeyah na ita mangal knledax ka Utux Baro. 21Mnoda ta Kiristo wada tana pspuun pgdehu ma wada hmeruy abura ita we kika Utux Baro. 22Heya we wada pskraya ita ma wada na sbege smpusu lhebun ta ka Bgihur Utux.
23Psdehu ku knuudus mu mesa pgkela kenan ka Utux Baro. Kiya de ssruwa mu yamu ka ini ku mnpusal mosa Korinto hiya. 24Uxe miyan mekuy snhiyan namu. Mpsuupu miyan qmeepah yamu so mangal namu qqaras. Ado mgdehu namu bale mheyu ckceka snhiyan namu da.
ప్రస్తుతం ఎంపిక చేయబడింది:
2 Korinto 1: Stgdaya
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
The Bible Society in Taiwan, 2020
© 台灣聖經公會版權所有，2020