1 Korinto 15
15
Muudus Peeyah Hnqilan ka Yesu
1Mtswai, kmpklaun mu yamu ka malu kari gnarang mu yamu tgberah na. Malu kari nii we wada namu ngalun ma stmaun namu psdehu mheyu. 2Nasi namu muyu ba kari wada mu srengo yamu, ado malu kari nii we mpkuudus yamu. Nasi uxe so nii we maha mrao ka snhiyan namu.
3Wada mu sgarang yamu ka nangal mu ciida. Pusu na hiya we, kiya ka so ga spatis Patis Mrtaso, Kiristo we wada mhuqil qnquwan noda ta da. 4Kiya de wada reesun, ida so ga spatis Patis Mrtaso, mk3 ali de wada muudus peeyah hnqilan. 5Sptuura na pqita Kepas ma sptuura pqita 12 tnugsaan. 6Bobo na hiya we meyah mtqita 5'00 sngari mtswai. Ida ga meniq hini na ka hbaro ckceka daha na. Kiya de wada mhuqil ka duma. 7Bobo na ciida de mtqita Yakobu ma mtqita kana snkgulan dungal. 8Mghiti ba de mtqita yaku uri. Mntena ku so ini dehuk ali pttingan seediq mtuting ka yaku. 9Yaku ge, tgbiciq ku bale snkgulan, uka dungus dehuk ku ma snkgulan. Ado pnqraqil ku bale pssliyan nuUtux Baro han. 10Kiya de dehuk ku so nii saya ka yaku we mnoda huwe Utux Baro. Ini pgqeya ka huwe na kenan. Pntnaun kana snkgulan we mgkala bqerus mu qmeepah ka yaku. Bale ba we uxe yaku ka kiya, huwe Utux Baro nii theyaq kenan ka kiya. 11So kiya de ani yaku, ani snkgulan, ida so kiya ka nii miyan sgarang ma wada namu so nii snhii kana di.
Quri Muudus Peyah Hnqilan
12Wada muudus peeyah hnqilan ka Kiristo mesa ka gnarang ma uka ka muudus peeyah hnqilan mesa ka duma we hmuwa ka kiya ho? 13Kiya de nasi uka ka pkuudus peeyah hnqilan we kani pkdusi peeyah hnqilan ka Kiristo. 14Nasi ini pkdusi peeyah hnqilan ka Kiristo we naka mgqiya ka gnarang miyan ma naka mgqiya ka snhiyan namu. 15So kiya de ngalun miyan daha seediq mptraki pgkela nuUtux Baro, ado pgkela ta wada pkuudus Kiristo peyah hnqilan ka Utux Baro. Nasi bale ba ini kuudus peeyah hnqilan ka wada mhuqil we kani pkdusi peeyah hnqilan Utux Baro ka Kiristo di. 16Ado nasi ini kuudus peeyah hnqilan ka wada mhuqil we kani pkdusi peeyah hnqilan ka Kiristo uri da. 17Nasi ini pkdusi ka Kiristo we naka mgqiya ka snhiyan namu. Kiya de ida namu ga meeniq ckceka qnquwan noda na. 18So kiya de ga meniq Kiristo wada mhuqil ka seediq we wada muuka uri da. 19Ita nii sntama Kiristo nasi wano kndesan ta saya niqan snluwan. Pntnaun kana so seediq de maha so sgaalu da.
20Kiya de wada muudus peeyah hnqilan ka Kiristo. Kiya ka mghei plaale seediq wada mhuqil. 21Nasi pneeyah 1 seediq ka hhuqil. Pkuudus peeyah hnqilan we ida pneeyah 1 seediq uri. 22Ga mhuqil Adam ka kana seediq. Mntena so nii uri mooda Kiristo pkdusun ka kana seediq uri. 23Kiya de knkingal seediq we niqan elu na mpkuudus: Pnheyi plaale na we Kiristo. Bobo na hiya meyah dungal ka heya ciida we mpkuudus ka nKiristo. 24Bobo na ciida de meeyah ka qnhdean. Qada Kiristo ciida ka kana mpqlahang qnlhangan, dmoi beyax na, niqan beyax na. Kiya de bege na Utux Baro Tama ta ka qlhangan. 25Ado Kiristo we asi ka maangal beyax, betaq psaun toma papak na Utux Baro ka kana pais na. 26Phtiun na ba pkuuka ka pais we hhuqil. 27Ado ga spatis Patis: “Utux Baro we wada na pthyiun toma papak na ka kana ani maanu.” Kiya de wada pthyiun toma heya ka kana ani maanu mesa de uka ckceka heya ka Utux Baro pntheyi ani maanu heya. 28Wada theyi heya ka ani maanu ciida de, Laqi uri we ida maha mtheyaq quri pntheyi kana ani maanu uri. So kiya de meeniq ckceka kana ani maanu ka Utux Baro ma meeniq tgbaro kana ani maanu ka heya. 29Nasi so kiya de wada ptgaya psino seediq mhuqil we mphuwa ka kiya di? Nasi bale ba ini pkdusi peeyah hnqilan ka seediq wada mhuqil we hmuwa, ma daha ptgaya psino ka dheya ho? 30Hmuwa, maanu ka sooda miyan so smiicu klaali ho? 31Mtswai, tmiyu ku stndahu mu quri yamu ckceka Kiristo Yesu Bukung ta rmengo, yaku we moda ku mhuqil klaali. 32Speeyah ta qnita seediq, tmgdiyal camac Epesos hiya we maanu ka rrihan mu ho? Nasi ini pkdusi peeyah hnqilan ka wada mhuqil de,
“Uqe ta ma mahi ta!
Ado mphuqil ta kusun da.”
33Iya pqberiq.
“Mmhemuc msdangi we smeeliq knmalu noda.”
34Kiiyo quri malu ka yamu. Laxi ka qnquwan noda. Ado ini kela Utux Baro ka duma han. Rmengo ku kari nii we ppqsiqa ku yamu.
Heyi Mnuudus Hnqilan
35Kiya de, smiling ka duma seediq: “Huwa kesun pkuudus peeyah hnqilan ka seediq wada mhuqil di? Mpmaanu ka heyi daha meyah ho?” 36Seediq mngataq! Nasi ini huqil ka phmaan su we uxe mpkuudus. 37Pnhmaan su ka rehak ciida we uxe hnyegan mmeeyah na. Ani mugi ma klegan rehak we ida demux nanak. 38Kiya de mooda lnglungan nanak Utux Baro mege hnyegan. Kiya de biqan na heyi daha nanak ka knkingal klegan rehak. 39Uxe mntena kana ka heyi: 1 klegan ka heyi seediq, 1 nanak ka heyi camac, 1 nanak ka heyi qbheni ma 1 nanak ka heyi qcurux. 40Niqan ka hnyegan ga baro ma hnyegan ga dxeral. 1 nanak ka knledax hnyegan ga baro ma 1 nanak ka ga dxeral uri. 41Hido we niqan knledax na hido. Idas we niqan knledax na idas. Pngerah we niqan knledax pngerah. Pngerah nii ma knledax pngerah gaga we ida ini pntena.
42Mntena so nii ka muudus peeyah hnqilan. Wada hmaun we mpsburo. Muudus peyah hnqilan we ini ksburo. 43Wada hmaun we so smsiqa. Pnkuudus we niqan knledax. Wada phmaan we muuwic. Pnkuudus we mbeyax. 44Pnhmaan we heyi niqan dara. Pnkuudus peyah hnqilan we heyi Bgihur. Niqan ka heyi niqan dara we ida niqan ka heyi Bgihur uri. 45So nii ka ga spatis Patis: “Adam pnlaale seediq we ma seediq niqan knuudus.” Tnhiti na Adam we Bgihur mege knuudus. 46Kiya de uxe pnlaale ka nBgihur, nheyi niqan dara ka meniq berah. Kiya de kiya ka nBgihur da. 47Seediq pnlaale we pneyah dxeral ma bengux dxeral. Seediq tg2 na we pneyah baro. 48Hmuwa mesa ka ndxeral we maha so kiya ka kana ndxeral uri. Hmuwa mesa ka nbaro we maha so kiya ka kana nbaro uri. 49Mntena so ita nii niqan hnyegan ndxeral we mpniqun ka hnyegan nbaro bobo na.
50Mtswai, nii ka srengo mu yamu: Muudus niqan heyi ma dara we ini tduwa mangal qnlhangan Utux Baro. Mpsburo na uri we ini tduwa mangal ini ksburo na uri. 51Yaku saya we mprengo ku yamu 1 kari lneing: Uxe kana ta ka mpqtaqi. Ida asi ka kmpriyux kana. 52Knsaya ba tkumax doriq, asi hrenang nhdean ka iyuk ciida. Mphrenang ka iyuk, pkdusun ka seediq wada mhuqil ma maha ini ksburo. Ita uri we maha ta kmpriyux uri. 53Mpsburo na nii we ida asi kmpriyux ini ksburo. Mphuqil na nii we ida asi kmpriyux uxe mphuqil. 54Pryuxan ini ksburo ka nii mpsburo ma pryuxan ini qhuqil ka nii mphuqil ciida we kika dehuk ma bale ka ga spatis Patis: “Wada rqenun mbeyax ka hhuqil da.”
55“Ah! Hhuqil, gaga inu ka beyax mpkbeyax su ho?
Ah! Hhuqil, ga inu ka pako su pnugcahu da ho?”
56Pako pnugcahu hhuqil we kiya ka qnquwan noda. Beyax qnquwan noda we kiya ka gaya. 57Mqaras ku Utux Baro. Heya we spooda ta na Bukung ta Yesu Kiristo wada ta mbeyax.
58Maanu so kiya de mtswai sgaalu mu, kgdehu ba ka yamu. Iya klgelu. Kdrumuc meepah qpahan Bukung klaali. Ado klaun namu, uxe mgqiya ka bqerus namu ckceka Bukung.
ప్రస్తుతం ఎంపిక చేయబడింది:
1 Korinto 15: Stgdaya
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
The Bible Society in Taiwan, 2020
© 台灣聖經公會版權所有，2020