1 Korinto 1
1
Smbleyaq ma Mqaras
1Mnoda lnglungan Utux Baro pnlawa ma snkgulan Kiristo Yesu ka Poro ma Jostenes mtswai we 2matis ku patis pssliyan nuUtux Baro ga Korinto, kiya ka mrtaso meniq ckceka Kiristo Yesu, pnlawa na ma mrtaso tnugsaan. Kiya uri we kana dseediq ani inu ga mlawa ngayan Bukung mu Yesu Kiristo. Kiristo ka Bukung daha ma Bukung ta uri. 3Tai so huwe ma mtbale lhebun pneeyah Utux Baro Tama ta ma Bukung ta Yesu Kiristo mege yamu!
4Quri yamu mqaras ku Utux Baro klaali. Ado Utux Baro we meniq ckceka Kiristo Yesu bnege na yamu ka huwe na. 5Ado yamu we meeniq namu ckceka heya pqblequn namu na quri ani maanu. Kiya de quri kana rrengo ma kana knkela uri. 6Mntena spgkela mu ka Kiristo ga meniq lhebun namu we maha mgdehu. 7Maanu so kiya de ini qsetuq ka pndungus namu, tmara bale meyah mtqita ka Yesu Kiristo Bukung ta. 8Ida maha mpgdehu yamu betaq qnhdean. So maha uka ani maanu tyuwan ali Bukung ta Yesu Kiristo ciida. 9Mtduwa stmaan ka Utux Baro. Pnlawa yamu so maha namu pkmalu laqi na, Bukung ta Yesu Kiristo ma niqan pnugluban.
Ga Mtgdiyal Kari ka Pssliyan
10Mtswai, mooda ku ngayan Bukung ta Yesu Kiristo dmudul yamu. Pntena ka kari namu. Ckceka namu we iya ptg2. Pskingal bale ka lhebun ma lnglungan namu. 11Mtswai mu, wada rmengo yaku ka seediq pneeyah sapah Hloe. Rmnengo ckceka namu we ga namu pkeekan kari. 12Kari mu nii we, txtaxa namu we rmengo namu: “Yaku we nPoro,” “Yaku we nuApollos,” “Yaku we nKepas,” “Yaku we nKiristo.” 13Ga trehak ka Kiristo peni? Wada pteetu jyujika yamu ka Poro peni? Uxe uri we mnoda namu ngayan Poro ptgaya psino peni? 14Qrasun mu Utux Baro, wano Krispos ma Gaios ini ku ptgaya smino ani ima ckceka namu. 15So uxe namu mprengo, mnoda namu ngayan mu ptgaya psino. 16Wada ku ptgaya smino tnsapah Stepanas. Kiya de ini mu klai ye ku wada moda ptgaya smino duma na. 17Ado uxe ptgaya smino ka sskagul ku na Kiristo, ado ggarang malu kari. Kiya uri we uxe pnooda knkela kari rmengo. So uxe ppqeya ka jyujika Kiristo.
Beyax ma Knkela Utux Baro ka Kiristo
18Ado elu kari jyujika we ngalan daha mngataq ka seediq pkuuka. Paru beyax Utux Baro ka ga ita seediq nii pkdusun. 19Mntena so ga spatis Patis:
“Hrahun mu ka kkela seediq niqan knkela,
lixun mu ka tunux seediq niqan tunux.”
20Ga inu ka seediq niqan knkela? Ga inu ka dmptpatis gaya? Ga inu ka mkela smalu kari? Utux Baro we uxe na wada kesun mngataq ka knkela bobo dxeral nii di peni? 21Mnoda knkela daha nanak ini kela Utux Baro ka seediq bobo dxeral. So nii we kika knkela Utux Baro, mqaras ba spooda na mngataq kari gnarang daha pkuudus seediq snhii. 22Mesa pnskraya ka seediq Yudaya, mesa knkela ka seediq Hellenis. 23Ita de gmarang ta Kiristo wada pttuwan jyujika. Nii we btunux skrbutan seediq Yudaya kiya. Seediq icil qnlhangan we mngataq kiya. 24Kiya de quri seediq pnlawa ge, ani seediq Yudaya, ani seediq Hellenis uri we ngalan daha paru beyax Utux Baro ma knkela Utux Baro ka Kiristo. 25Ado mngataq Utux Baro we mgkala knkela seediq. Knuuwic Utux Baro we mgkala beyax seediq.
26Mtswai, lngelung bino pnlwanan Utux Baro ka yamu. Spooda ta seediq mita ge ini qhbaro ka niqan knkela. Ini khbaro ka niqan beyax. Ini khbaro uri ka spruun bale seediq. 27Kiya de gneegan Utux Baro ka mngataq bobo dxeral we ppqsiqa na seediq niqan knkela. Gneegan Utux Baro ka muuwic seediq bobo dxeral we ppqsiqa na seediq mbeyax. 28Gneegan Utux Baro ka uka rrihan na, sbciqun daha trqilun seediq ma uka bale dnoi na bobo dxeral we ppkuuka na niqan ani maanu. 29Kiya de kana muudus niqan heyi ma dara we ani 1 uxe daha ttndahu berah Utux Baro. 30Maanu so kiya Yamu we meeniq namu ckceka Kiristo Yesu mnoda Utux Baro. Kiristo ka niqan knkela ta, msderux oda, mrtaso, priyux qnquwan. 31Mntena so ga spatis Patis: “Tmdahu na mu we tndhui Bukung.”
ప్రస్తుతం ఎంపిక చేయబడింది:
1 Korinto 1: Stgdaya
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
The Bible Society in Taiwan, 2020
© 台灣聖經公會版權所有，2020