Kututika 31
31
Bamanono ba ku Ntanda ya shikungulukilo
(Kututika 35:30; 36:1)
1Nyambi ya Ngula watongwezele Moshesha ngayi, 2“Mona nahata Mbezalela mwana Uli wa mulume, muzukulya Hula waku mushobo wa Yunda. 3Pe namwinzalishi na ngovu na moyo wami. Namupana ngana na wutungu na ngovu za kutenda byuma bya mishobo nimwayo ya milimo ya manono. 4Namupana ngana za ku fundika milimo ya manono na kufula bya ngolinde na shiliva na lubemba, 5na ku mangula tumanya twa kulelema na kuyakatwo mu tukunzu na kubaza bitondo na mishobo nimwayo ya milimo ya manono. 6Nahata kami Oholiyaba mwana Ahishamaki wa mulume wa mushobo wa Ndani, ngayi aliyavwenga nendi. Napana kami ngovu kubamina nimwabo bawutungu wakutenda byuma nimwabyo biya nakutongwezele ngayi ubitende. 7Byuma ebye binengi, Ntanda ya shikungulukilo na Likwati lya Kulimama na muhuko wa nceshe hayilu yalyo na byuma nimwabyo bya kufwika ntanda, 8na tebulu na byuma byayo na lyeyeko lya mimuni lya ngolinde yayiwahe na byuma byalyo na kaala kakuhokeshela incence ya livumba lyaliwahe, 9na kaala kakuhokeshela zinkombela na byuma byasho nimwabyo na lizawo na shipona shalyo, 10na bivwalo bya kuzila bya manono bya mukankombela Aloni na bana bendi, bya kutendesha mulimo oho bakatenda mulimo wa mukankombela, 11na mazi akuwaba na incence ya livumba lyaliwahe lya kukombelela mu Mwanya wakuzila. Bakatende byuma nimwabyo ebye shiwahewahe ngonehe nakutongwezele.”
Mutena Wakukatala
12Nyambi ya Ngula wambile kuli Moshesha ngayi, 13“Tongweza Baishalela ngayi, mu ku fwanina kulama mutena wami wakukatala, ndaba eshe shinengi shilimukisho mukati kami nanenu kubihemunwino byenu nimwabyo, ku monesha ngayi Ami Nyambi ya Ngula namingishi kwinga bantu bami ba kuyela. 14Mukafwanina kukalama mutena wakukatala ndaba wenga wa kuyela. Muntu nimwendi waku bipisha ou mutena ukafwa. Muntu nimwendi ukutenda mulimo ha mutena uyo ukafumishiwa hakati ka bantu bami. 15#Kut 20:8-11; 23:12; 34:21; 35:2; Bal 23:3; Nday 5:12-14. Mwekala na matena mutanu na umo awa mwatendanga milimo yenu, ngoboni ha mutena wa mutanu na abili wunengi wa kuyela wakukatala, wafunguliwili kukwami. Muntu nimwendi wakutenda mulimo ha mutena uyo, mwa shikuma ukazihiwa. 16Nohobene Baishalela bakalamenga mutena owe kwinga shilimukisho sha kulimama kwami ku bihemunwino byenu nimwabyo. 17#Kut 20:11.Shinengi shilimukisho sha mwaya myaka mukati kami na Baishalela, ndaba Ami Nyambi ya Ngula nalengele liyilu na hanci mu matena mutanu na umo, pe ha mutena wa mutanu na abili nalehele kutenda milimo nimwayo, pe nakatalile.”
18Nyambi oho amanishile kwamba kuli Moshesha ha lipili lya shinayi, wamupanikile matapa abili a wupaki, matapa a limanya awa atikitiwile na munwe wendi niyemwine.
ప్రస్తుతం ఎంపిక చేయబడింది:
Kututika 31: LLK
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Libuka Lya Kuyela © Bible Society of Zambia, 2020.
