Rommi 7

Külakupu pesü Kiche-piye

1Athiküzümi eno achelimiqo—ni ye nongu ayeza ithi akemiqo vilo piani—ike ayeza ye timi lakhi no xü ake dolo likhi pa shou kükagha acheni kepi mütha keshea? 2Kichekipiye, külave kemi totimi lakhi ye li kimi no xü ake kutólo ayeza no li kimi gholo tsüghape acheni, ikemu li kimi no thive aye, li ye li kimi gholo tsüghape achekeu yeza lono kuqhopheve cheni. 3Ike tighenguno, tsalá li kimi xü aphi lono li no kipitimi kütami sasü kikivive aye, li ye shupumi lakhi ke ipi cheni. Ikemu li kimi no thive aye, li ye tsüghape akeu yeza tipau lono kuqhophevae eno li no kipitimi kütami sasü külauve aye, li ye shupumi kumoe.

4Ikehu, ithiküzümi eno ichelimiqo, nongu ghí Khristo phimpi vechewo ayeza küdau ye thivea ke, tishi keu vechewo nongu ye khuu akìthí lono xüputhuvea keno pa laumi shilu peniye ke, tishianguno ningu pelo Alhou ghenguno athi pithílu peniye ke. 5Kughengu ningu no kughou ashi kükaqha qholo ache keno, ayeza vechewo minemighei keu xiné hakutho keu no ningu lolo mülà acheke, ikehu ningu ye akithipu xathi pithí acheke. 6Ikemu itehi ye ayeza lono ningu kuqhophevae, kughengu ningu ye tipau lo thivae eno tipau küká kütsügha lono ipeghivae. Itehi ningu ye aqau küxü lo yèpüa keu yeza gholu keu vechewo kumo no Aghungú lono aküxü kithé xükeu lono Alhou qeluni ake.

Ayeza eno Axiné

7Tishiaye ningu ye kiu pìní kea? Ayeza ye axiné keshea? Tiye kumo pütsa! Tishiaghi namu, ayeza ghenguno ke thono ni ye axiné ye kiu keno mütha no aghíni cheke. Kughengu ni ye ayeza no, “No ye jumine kevilo,”#7:7 Ipe 20:17; Zaki 5:21 ipimo no aghí ke aye ni ye jumine keu ye kiu keno ithimoni cheke. 8Ikemu axiné no azakütsü vechewo adokivi süghi keu hu no ilolo jumine keu thowkha jeli xukutho tsüke. Kughengu ayeza küha kelo ye axiné ye aküka küha ke. 9Ghuthu lakhi lo ni ye ayeza küha no xüache ke; ikemu kughou azakütsü ighive keno axiné no xü ithughive eno ni ye thive ke. 10Ino phulu keu no azakütsü khikhi aküxü süghi niye shi akeno aküxü süghi nike züqhulo akìthí süghive ke. 11Kughengu axiné no azakütsü vechewo adokivi süghi keu hu no ipishiqhive ke, eno azakütsü vechewo ipìthíve ke. 12Hi ghenguno ayeza ye akimthe eno azakütsü ghí akimthe, achipiu eno akivi ke.

13Imaye kiu no akivipu keno tipau ye kíshi püzü akithipu ilau süghive cheni kea? Tikumo thono! Tishiaghi namu, axiné ye axiné kepi kimchipheve nike ghenguno kiu no akivi keno tipau pesü axiné no akìthí ilau süghi ke, tishianguno azakütsü vechewo axiné lhoaye ye kuchou no kiu keno pephe piye peniye ke.

14Ningu no ithi akeu no ayeza ye Alhou lau no ke; ikemu ni ye ashilomi eno aqüaxemi shi axiné lau jesüve kemi ke. 15Ino kiu shi ani keno ni ye vethalu chemoe. Kughengu ino kiu shinishi cheni keno tipau shichemoe, ikemu ino kiu shinishi chemo keno tipau shi cheni. 16Eno ino kiu shinishi chemo keno tipau shi aye, ayeza ye akivi kepi ino tipau lo pulosü tsü ani. 17Tishiaye, tiye ilikhi ino shi anike kumovae, ikemu ilolo axiné xü akeu hu no shi anike. 18Kughengu ino ithi akeu no ilolo ixiné lhoaye lo pa kutoshi no akivi achemoe. Kughengu ni ye kiu no akivi keno tipau shinishiqhiyi acheni, ikemu ni ye tipau shilu chemoe. 19Kughengu ino akivi shinishi keu shichemoe, ikemu ino shinishi chemo keu küsakügha kümlà ino shi acheni. 20Ikehu, tsalá ino kiu shinishi chemo keno tipau shi aye, tiye ino kumoe ikemu ilolo axiné xü akeu hu no tipau shi anike.

21Ike ayeza no hitoi mülà akeu ino phulue: Ino akivi shinishi aghí namu küsakügha shini keu kìsheluve aghíe. 22Kughengu ni ye ilolo Alhou yeza lo alokiqi acheni; 23ikemu ilolo ayeza kütau ghí mülà akeu ino ithulu ani. Hipau no ilolo ikükümsü yeza sasü kichighi acheni eno hipau vechewo ni ye axiné yezaw akughumi lakhi shi acheni. 24Ni ye kiutoi keu ahasapu timi kea! Khuu no thiveniküau phimpi hipau lono ixaphelu nani kea? 25Jisü Khristo ningu Mipeu vechewo ixalu keu Lhou shikimthi!

Tishiaye, ikükümsü lo ilikhi ni ye Alhou yeza qüaxemi lakhi kepi kümsülu ani, ikemu ixiné lhoaye lo ni ye axiné yeza qüaxemi lakhi ke.

ప్రస్తుతం ఎంపిక చేయబడింది:

Rommi 7: STB

హైలైట్

కాపీ

సరిపోల్చండి

షేర్ చేయి