Rommi 5

Külakishi eno Lajupu

1Tighenguno, ningu ye aküpülü vechewo achipikaluvea ke ghenguno ningu ye ningu Mipeu Jisü Khristo vechewo Alhou sasü külashiluvae, eno 2Jisü Khristo vechewo ningu pelo aküpülü lono ningu no itehi puthugho akeu küpükini lo ilolu pe ke. Ikehu ningu ye Alhou juküvü küsaje nikeu lajupu akeu lo alovini nolo. 3Tilikhi kumoe, ikemu ningu ye ningu ghimeqo lo ghí alokivishi cheni, kughengu ningu no ithi akeu no aghime no tsükhoi keu iqiphe cheni; 4tsükhoi keu no aghilisüqe iqiphe cheni; eno aghilisüqe no lajupu iqiphe cheni. 5Eno lajupu hipau ye ningu shikukujove chemoe, kughengu Aghungú Kimthe ningu tsüpüa keu vechewo Alhouʼw kikimiye ningu mulo lo lesüve tsüae.

6Kughengu ningu no miqemilei ake lono Khristo no ado achipi lono ningu axinemiqo ghenguno thive tsüe. 7Timi khunomu achipiumikuchomi lakhi ghenguno thivetsü keu shimo luvi, tishimu timi khami ye ighümo no timi kivimi lakhi ghenguno aküxü mu tsüluvi. 8Ikemu Alhou no hipau lono pa likhi paw kikimiye ningu lau pephe piye ke: Ike tiye ningu no axinemi shiaphi lono Khristo no ningu ghenguno thive ke.

9Itehi ningu ye pa jì vechewo achipikaluve akehu tinguno alau shi ningu ye pa vechewo Alhou loghu lau no süsholu nani! 10Kughengu tsalá ningu no Alhou ghümi shiaphi lo thotsü pa Nu kithí vechewo pa sasü külashilu aye, ningu ye külashiluva ake tinguno alau pa küxü vechewo ningu süsholu nani. 11Tilikhi kumoe, ikemu ningu Mipeu Jisü Khristo khuu vechewo ningu no itehi külashiluvea keno pa vechewo no ningu ye Alhou lau ghí alovishe acheni.

Adam Vechewo Akìthí Ighi, Khristo Vechewo Aküxü Ighi

12Ikehu, timi lakhi vechewo ayeghi lo axiné iloghive eno axiné vechewo akìthí ighike toi, hipau ghola lono akìthí no timi kümtsü lau ighive, kughengu timi kümtsü axiné shive ke.

13Mütsüqhei nike ghenguno ayeza tsümphi züu no axiné ye ayeghi lo ache, ikemu khilehi ayeza küha keno tilehi ye timi lakhi shoumu axiné kihikülai tsümoe. 14Tishimu, akìthí ye Adam ghuloki lono Moses kutólo ka acheke. Kütami ye Adam no azakütsü hebide keu vechewo axiné shimo namu akìthí ye panongu shou ghí ka acheke. Adam ye athiu timi lakhi ighi niye akeu kimihi ke.

15Ikemu Alhouʼw kümsá ghò ngò Adam xiné ye kütüqü ke. Kughengu tsalá timi lakhi hekibide ghenguno timi kutomo thive aghí aye, tinguno alau shi timi lakhi Jisü Khristoʼw küpükini vechewo Alhouʼw küpükini eno kümsá ghò ye timi kutomo lau khijehi qochili ighilu nani kea. 16Momu Alhouʼw kümsá ghò pesü timi lakhi no axiné shive keu sasü kimghi mülae: Timi lakhi xiné vechewo küghakütha eno küghathabe keu saighike, ikemu Alhou no kümsá ghò tsükeu vechewo kutomo kipimí pevetsü no achipikalu pe ke. 17Kughengu tsalá, timi lakhiʼw hekibide ghenguno akìthí no timi kutomo shou ayekipeu shi cheghí aye, tinguno alau shi khunoqo no Alhouʼw küpükini kupukuno shitsü keu eno achipiumikucho shikulupu kümsá ghò ithuluvea keno panongu ye hi timi lakhi Jisü Khristo vechewo panongu küxü lo khijehi axiné eno akìthí shou ayekipeu shilu nani kea!

18Tighenguno, timi lakhiʼw hekibide vechewo timi kümtsü shou küghathabeve keu toi, achipiumikucho kümlà lakhi vechewo timi kümtsü pelo achipikalu pe eno aküxü aluve pe ke. 19Timi lakhi ghokulu kumo vechewo timi kutomo pelo axinemi shive pe keu toi, timi lakhi ghokulu vechewo timi kutomo pelo achipiumikuchomi shilu pe nani.

20Hekibide kighishe penike ghenguno ayeza iloghi ke. Ikemu khile axiné kighishe keno tilehi küpükini alau shi kighishe ke, 21tishianguno axiné no akìthí vechewo ayekipeu shi ketoi, ningu Mipeu Jisü Khristo vechewo lhokta küxü süghi nike ghenguno Alhouʼw küpükini pelo achipiumikucho vechewo ayekipeu shilu peniye ke.

ప్రస్తుతం ఎంపిక చేయబడింది:

Rommi 5: STB

హైలైట్

కాపీ

సరిపోల్చండి

షేర్ చేయి

మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి

Sümi Tiqhelimi Bible గురించి మరింత తెలుసుకోండి