Apostolmi 24

Felix Zülo Paul tsà Kügha

1Atsala pungu thiu achinetou Ananias no kichimiqo khami ngò atsa küküghau Tertullus ishi sasü Caesarea lo iqi no panongu no Paul lachile ghi nguku keu pe angh zülo ighi. 2Kughou Paul kusü keno, Tertullus no Paul nguku keu Felix zülo peighi no pi, “Ovechewo ningu ye ado kushuwa alokughuno shi ighivea, eno ow jukuchho hu no aghakhu hipau lo akikili süghitsüe. 3Akiqheu Felix, aqha kümtsü eno alaghi jeli kümtsü ningu no hipau ikhilu akeu gholo shishe oshikimthi ani. 4Ikemu hinguno alau oshipünamo nike ghenguno ino qhüiniju akeu ye opelo kimiye no ikhonhei ningu tsà iniju tsüpe nishi ani.

5“Ningu no phulu keu no timi hipau ye aküpüna shikichemi, ayeghiqha kümtsü lo Jewmiqo dolo heküpüsa xukutho chekemi lakhi ke. Pa ye Nazarene muqo gholo atou sakipheu ke 6eno achineki kutólo shipixive niye shiju ke ghenguno ningu no pa küghaluve ke. Ningu no ni yeza kiqi lono pa shou küghathaveni cheke, 7ikemu zatsüu Lysias no ighino ighono muqhumüzai shi püzü ningu lau no pa sasü wuve ke.#24:7 Kaku khami lo ye Apos 24:7 ye küha eno hitoi peitha cheni. 8Eno pa no Paul ngukube akemi vilo ozülo ighilo pike. No ampi no pa vilo inijukideküdai aye ningu no pa nguku keu süghi akeu kümtsü kuchou kepi nono ithive nani.”

9Jewmi kütamiqo ghí ngukube akeu lo küqha ghi hipaqo kümtsü kuchou ke ipi.

10Kughou angh no Paul pelo pi penike kichetsü keno, Paul no khochile: “Ino ithi akeu ye no ye ampe kushuwa shiye hipau shou küghaküthau shi ighivea; ikehu ilokivi shi ilikhi isüsho keu tsà pìní. 11Nono mülalei phuluve nani ke, hi atsala chighí kinia shi ani, ino Alhou mülá niye Jerusalem lo iqho ke. 12Inguku akemiqo ye ino achineki lo khuala sasü kütsala aghí keu, momu synagog lo momu aphughi lo khilela timiqo xukutho aghí keu ithumlae. 13Eno panongu no ishou ngukube akeu mütsümishei hi kepi opiye müla nani. 14Tishimu, panongu no akumou ke ipi chekeu Laghi hu ino püla chekemi lakhi shi püzü ningu pù-asüqo Lhou mülá cheni kepi ni ye ikhilu ani. Ino pülü akeu ye hi kümtsü Ayeza eno Tungkupumiqo kaku lo yèpüa keu kiqi lono ke, 15timi hipaqo no Alhou lau lakuju aketoi ni ghí lakuju acheni, ike tiye achipiumikuchomi eno alhoküsami kinikujo akìthí lono xüputhuve nani. 16Ikehu ni ye Alhou eno timi zülo ilolo lomije akeu mütsümishei qhini ke pükapütsa acheni.

17“Ampe hami thikhau ni ye Jerusalem lo ighi, tiye niw timiqo no aghò tsükeu pesü kumlhomiqo tsü eno akümlaghoqo mülá niye ighike. 18Panongu no ino achineki khala lo hipau shi aghí keu ithulu kelo ni ye chine-chini kukhuaye kiqi lono ishikimtheve no ake. Tilehi timi aqokitikhi mu igholo küha momu ni ye khiuala aküpüna lomu chhosümoe. 19Ikemu tile Jewmiqo khami Asia bocho lono ighi kemi ake, panongu ampi no hile ozülo aghí kepu shia eno ishou kiula ngukube kepu aghí aye süghi kepu shi ake. 20Momu hile ngo akemi no ino Jewmi Hoho zülo puthugho kelo panongu ye ino ayeza heküxá kümlà kiu shipe püaghi keu ithulu keno piju pelo, 21thime hipau ghenguno kumo kena pi aye, ino panongu gholo puthugho kelo asheshu chekeu, ‘tiye, kithimi ye xüputhuve nani pikeu ghenguno ni ye ishí nongu zülo atsa kükügha lo ani.’ ”

22Ikelo Felix, khuu Ampeu Là püla chekemi ghili akivishi ithi akeno pa no atsa kügha akeu tukiqhe puwuve. Eno panoqo vilo ishi pi, “Kughou zatsüu Lysias no ighini keno tile no ino otsa xatha tsüní ipive.” 23Pa no aqhe shou zatsüu vilo Paul khekuto lo pi azah tsüve, tishimu Paul lakhamo no kiu shikepu keno shilu pe eno pa küsàmiqo pelo pa vehupu jeliqo jukuto penike puloza tsüve.

24Atsala hami thiu Felix no pa nipu Drusilla sasü ighi, li ye Jewmi ke. Pa no Paul ku puwu eno Paul no Khristo Jisü pülü akeu ghili kütsü kelo inia. 25Paul no achipiumikucho, alikhi aghasükulu eno küghakütha ighi niye akeu ghili pi akelo Felix ye müsàve eno pi, “Itehi ghengu ye tino taveni! No ye wuluve nani. Ino ado shilu kelo no okupuwuni.” 26Tishi akelo Felix ye Paul no kulugho pesü pa tsü nani küghashi lakuju shi ae, tighenguno pa ye müamzü Paul ku puwu no pütsa ache.

27Kughou ampe kini wove keno, Porcius Festus no Felix theli lo Angh shiluve, ikemu Felix ye Jewmiqo lopu shitsü niye Paul pesü akughu shipe qhive.

ప్రస్తుతం ఎంపిక చేయబడింది:

Apostolmi 24: STB

హైలైట్

కాపీ

సరిపోల్చండి

షేర్ చేయి