Apostolmi 19

Paul no Ephesus lo Wu keu

1Kughou Apollos no Korinth lo akeno Paul ye alaghi akushuu küdau no Ephesus lo ighi. Tile pa no küpülümiqo khami kusholu 2eno pa no panongu vilo ishi ighiju, “Kughou nongu no pülüluve keno nongu ye Aghungú Kimthe ithulu kema?”

Panongu no khochile pi, “Moe, ningu ye Aghungú Kimthe ani ipikeu ghí chimla aphie.”

3Ikehu Paul no iniju, “Tishiaye nongu ye kiu lo baptiz shisülu kea?”

“Johnʼw baptiz,” ipi panongu no khochile.

4Paul no pi, “Johnʼw baptiz ye amlo pebideve kemiw baptiz ke. John no timiqo vilo timi lakhi pa thiu ighi nani ke pa shou pülübe lo ipi ke eno timi tipau ye Jisü ke.” 5Hipau tsà chilu kelo panongu ye Ampeu Jisü je lono baptiz shiluve. 6Kughou Paul no pa u pesü panongu shou be keno Aghungú Kimthe no panongu shou ikughi, eno panongu no amili kithé#19:6 Momu kütami shiaye tsà pie. lono atsa pi eno tungkupu tsà piwuve. 7Tilehi panongu kümtsü aqó lo timi chighikini toi keu ae.

8Paul no synagog lo ilo no aqhi küthü kutólo amlo kumtoshi timiqo pütsa, tamo no kütsala eno Alhou kükaqha ghili pesü pikülha ae. 9Ikemu panoqo gholo khami ye amlo kuthò shiauve no pülütsümo eno aqha zülo no Ampeu là püla chekemi ghili lhoküsa piae. Tishi no Paul ye panoqo qhive no wuve. Pa no pa gholo küpülümiqo sasü wu no tsalakipetsü akükütsü ki Tyrannus lo kumqo no küptsa ache. 10Asia bocho lo xü akemi Jewmiqo ngò Greekmiqo kümtsü pelo Ampeu tsà chilu penike ghenguno Paul ye Ampe kini kutólo hitoi shi.

11Alhou no Paul vechewo müzamghalei kepu amichipu kümlàqo shie, 12tiye pa bulu keu tiphimini eno aküghüsüpu phì kutólo pesü wu no küsükinimi eno tüghaküsa ghawu akemi lau peighi aye aküsǜ jeliqo viluve eno tüghaküsaqo no panongu qhive no pove ake.

13Jewmiqo khami iqho-iqi tüghaküsa ghawu haphe chekeqo no Ampeu Jisü je pesü tüghaküsa ghungú sà akeqo shou peitha ju niye shi. Panongu no ishi piche, “Paul no pikülha chekeu Jisü je lono opelo ipeghive penike ino azah otsü ani.” 14Jewmi gholo achinetou Sceva ipikeu nuli tsünì no hitoi shi ache. 15Ghulo lakhi tüghaküsa ghawu hu no panoqo vilo ishi khochile, “Ni ye Jisü ithi ani eno Paul ghí ithi ani, ikemu nongu ye khunoqo kea?” 16Tisheno timi khuu phi lo tüghaküsa ghawu akeno tipau hu no panoqo shou ilhe ikughi no kümtsü qhasüluve. Pa no aloqhi panoqo heqhive kehu panongu ye aphiminimu pepumo püzü aghüzaku lo ajì ipeghi ghi aki lono poipeve.

17Kughou Ephesus lo küami Jewmi ngò Greekmiqo no hipau tsà chilu keno panongu kümtsü akümsa no chhive, eno Ampeu Jisü je pesü akiqheu lo qhi no agigihu tsüe. 18Khunoqo anileshi pülüluve keno kutomo no ighi püzü panongu no kiu mülà che keno aqha zülo no piphe. 19Tumu chekemi muqo khami no panonguw liküküzü kakuqo aqoshi pesü ighino aqha zülo no pitileve. Panongu no liküküzü kakuqo me kihikülai ju kelo ghükayi 50,000#19:19 Hipau ghuloki lo ghükayi lakhi lo atsala lakhi jume shi ake. me kutólo shi aghí. 20Hitoi shi no Ampeu tsà alau akumtoshi thuwu eno veküpha wove.

21Hipaqo kümtsü shive kethiu Paul ye Macedonia ngò Achaia vechesü Jerusalem lo kicheghüzü shini keu vehu kughuluve. Pa no ishi pia, “Ino tilau wuve kethiu ni ye Rome ghí xuju moayesa anie.” 22Pa no pa kuphu chekemi Timothy ngò Erastus pama Macedonia lo puwuve püzü pa ye Asia bocho lo ado khami ngove.

Ephesus lo Mutomushu keu

23Tipau dolo tilehi Ampeu là püla chekeu vehu lo aküpüna kijè ipeghive. 24Ghükayi kiyiqimi lakhi Demetrius ipikeu no ghükayi pesü Artemis chineki kimihi lhophe che eno pa no hipau lhidi shikeu lono tilehi külalú kümlamìqo ghí kutomo alá shilu che. 25Ikehu Demetrius no akümlàmi eno tipau lhidi shi chekemiqo kümtsü ku kumqo püzü ishi pi, “Iküsàmiqo, nongu no ithi anike, ningu ye lhidi hipau lono kutomo alá shilu achenie. 26Nongu ampi no ithulu eno chiluvea ke, hilau Ephesus lo likhi kumo no kuchou lo ye Asia bocho kuchopu lo Paul ipikeu hipau no timi kutomo müsüluvea eno sà küghüzüvae. Pa no pikeu no timi u no mülà keu lhou ye khilemu alhou kumoe ipie. 27Ike akümsapu akeu ye, ninguw lhidi hipau lo aju-aje küsa sholu nikeu likhi kumo no akiqheu lhouliu Artemis chineki hu ghí aju-aje küsa shiveni cheni, eno lhouliu khuu Asia bocho lo eno ayeghiqha kümtsü no mülá cheni keno li küká jekipi ghí shipühave tsüní chenie.”

28Kughou panongu no hi chilu keno, panongu ye muqhumüzaive no ishi igha thuve: “Ephesiamiʼw Artemis no Akughushuu ke!” 29Paikhavi no aphughi kuchopu lo muqhumüza igha thuve. Timiqo no Paul gholo Macedonia lono kicheghüzü shi ighi keu Gaius ngò Aristarchus pama tsüqüluve eno panongu kümtsü aqoshi züphu-zügha ghiliqa lo kohakive ilove. 30Paul ye pa ampi no timiqo zülo wu niye shi, ikemu akhopemiqo no pa pelo wupemoe. 31Tipau bocho lo Paul küsàmiqo kijemi khami ghí pa pelo züphu-zügha ghiliqa lo wutsü pemo nike qhüiniju keu tsà pi puwu.

32Timi kumqo pe akemiqo ye kübangüve: khami no hiu ke ipi aye, kütami no huu ke ipi igha akhae. Timiqo akichiù no panongu ye kushiye tilehi kumqo pe ani keno ti ghí mütha no ae. 33Aqokitikhi dolo Jewmiqo khami no Alexander tuhape agizüu puwu, eno pa ye kíshi pi moayesa keno panongu no ighamuku pa vilo pi. Timiqo zülo pa likhi pa shokha keu tsà pinike ghenguno pa u kihí püzü iqünheive lo ipi. 34Ikemu kughou panongu no pa ye Jewmi kepi ithive keno, panongu kümtsa qhai shi püzü ayì kihedo kinia kutólo hitoi ighae: “Ephesiamiʼw Artemis ye Akughushuu ke!”

35Aphughi lo kijemi lakhi no timiqo hasüve püzü ishi pi: “Aküsàmi Ephesiamiqo, ayeghiqha kümtsü no Ephesus phughi ye akughushuu Artemis chineki kheu, eno li julho ye atsütsǘ lono iqighi keu ke ipi ithi anike kumo keshea? 36Hipaqo ye kuchou eno lachile müla keu ke, tighenguno nongu ye iqünhei kepu eno kiumu chho-chhoshi kepu kumoe. 37Timi hipaqo ye achineki lo pükapüamoe momu ningu lhouliu thaigha keu tsà pipe püamoe, ikeghi nongu no panongu hilehi saighike. 38Tsalá tishimu, Demetrius ngò pa kümlamìqo no khuala shou akipimí pi kepu aghí aye küghaki ye alhokuthu khaqhipe acheni eno tile anghqo akhanie. Panongu no akipimíqo pesü ngukubelu nani. 39Tsalá nongu no tinguno alau kiuala peighi kepu aghí aye, ayeza xaküthami no kumqo ake lono pekithiluve moayesae. 40Ishí kiu shivea keno hipau vechewo ningu ye muqhumüza ani ipikeu lono ningu akipimí tsüve kepu kümsapu lo auvea. Tipau kiqi lo, ningu ye mubumghu akepu kiumu akiqi kühae, eno ningu ye kiu ghenguno keno kiumu piluni chemoe.” 41Hi pive kethiu, pa no timi kumqo akeqo hapupo khave.

ప్రస్తుతం ఎంపిక చేయబడింది:

Apostolmi 19: STB

హైలైట్

కాపీ

సరిపోల్చండి

షేర్ చేయి