Matius Tentang kitab ini

Tentang kitab ini

Brita Baik Yang Matius Tulis ni, ini de crita tentang Yesus Kristus pu hidup, mulai dari Yesus De lahir, dapa salib, sampe De hidup kembali. Matius crita tentang Yesus kas ajar orang, kas sembu orang sakit, usir setan dari orang yang krasukan, kas hidup orang mati, kas ampun orang pu dosa, deng bikin tanda-tanda heran. Habis smua itu jadi, Yesus dapa tangkap, dapa siksa, dapa salib, tapi De hidup kembali di hari ketiga. Trus Yesus pesan ke De pu murid-murid untuk kastau Brita Baik tentang De ke smua bangsa di dunia.

Kitab ini orang bilang Brita Baik, karna ini crita tentang bagemana Allah utus Yesus Kristus untuk mati trus hidup kembali, untuk ganti manusia tanggung dong pu dosa-dosa, supaya sapa saja yang percaya Yesus, de bisa baku baik kembali deng Allah, deng hidup trus deng Allah.

Sapa yang tulis kitab ini: Di dalam kitab ini tra bilang sapa yang tulis kitab ini. Kalo dari pemimpin-pemimpin greja yang dulu, yang tulis kitab ini ni de pu nama Matius. De tu orang Yahudi, de tu satu dari Yesus pu 12 murid (10:3) yang dulu tukang tagi pajak untuk pemrinta Roma (9:9). De su liat sendiri apa yang Yesus bikin, deng de su dengar sendiri apa yang Yesus kas ajar. Itu yang de tulis di dalam kitab ini.

Kitab ini untuk sapa: Matius tulis kitab ini untuk orang Yahudi. Jadi de kas masuk Yesus pu garis keturunan mulai dari Abraham (1:1-17), de pake ayat-ayat dari Alkitab Janji Lama, trus de pake istila-istila deng gaya bahasa yang biasa orang Yahudi dong pake. Orang Israel ato orang Ibrani biasa dapa panggil orang Yahudi. Dong tu bangsa yang Allah pili untuk jadi Allah pu orang-orang. Allah su janji nanti De angkat satu Orang untuk kas slamat dong (Yesaya 11:1-9; 53:1-12; Mikha 5:1). Itu yang dong ada tunggu-tunggu apa yang Allah janji itu.

Knapa Matius tulis kitab ini: Matius tulis kitab ini untuk kas tunjuk kalo Yesus tu raja Daud pu turunan yang Allah su janji dari dulu. Itu yang, dari pertama buka kitab ini de su tulis tentang Yesus pu garis keturunan, mulai dari Abraham, raja Daud, sampe ke Yesus. Mala Yesus tu Imanuel, yang arti Allah ada sama-sama deng kitong (1:23). De yang pu kuasa untuk angin, ombak, penyakit, setan, dosa, kuasa yang bikin orang mati.

Tema satu di Matius tu tentang Krajaan Surga. Ini arti sama deng “Allah pu Krajaan” yang kitab Markus, Lukas deng Yohanes pake. Maksud itu tu Allah yang pegang kuasa atas dunia smua. Memang Allah slalu pegang dari pertama tapi waktu Yesus jadi Raja yang Allah su janji De lebi kas tunjuk itu lewat tanda-tanda heran yang Yesus bikin. Trus Yesus kas kala kuasa yang bikin orang mati waktu De hidup kembali. “Allah pu Krajaan” juga mulai skarang di dalam kitong, waktu Allah yang pegang kuasa di tong pu hidup. Trus waktu Yesus datang kembali De nanti kas kala smua kuasa lain sampe dong tra bisa bikin apapa lagi. Waktu itu smua orang percaya nanti tinggal sama-sama deng Allah di surga sampe trada akir.

Ulang kali Matius kas bukti kalo apa yang dulu-dulu Allah bilang lewat De pu nabi-nabi tu su jadi lewat Yesus pu diri deng lewat apa yang Yesus De bikin (Yesaya 35:5-6; Matius 11:2-6). Yesus yang Allah su pili untuk kas slamat manusia (1:16; 16:16). De datang kasi De pu diri untuk mati untuk kas slamat manusia dari dong pu dosa-dosa.

ప్రస్తుతం ఎంపిక చేయబడింది:

Matius Tentang kitab ini: MPapua

హైలైట్

కాపీ

సరిపోల్చండి

షేర్ చేయి

మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి

Melayu Papua గురించి మరింత తెలుసుకోండి

Matius Tentang kitab ini