Паччагьлугъар-3 7

Сулеймандин гъала

1Амма чан гъала тикмиш дапӀну ккудубкӀайиз Сулеймандин йицӀишубуд йис гъубшнийи. 2Дугъу чав «Ливандин ярквран гъала» ччвур туву гъала тикмиш гъапӀнийи – варж юкӀ ярхишин, хьуцӀур юкӀ яркьушин ва сумчӀур юкӀ ягълишин алиб#7:2 Саб юкӀ тахминан 50 см ву. Яни Сулеймандин гъала ярхишнаъ 50 м, яркьушнаъ 25 м ва ягълишнаъ 15 м алиб вуйи., кедрйирин хамхрарикк юкьуб жерге мурхьлар ккудукьнайиб. 3Дидин гъваъ гьарсаб жергейиъ йицӀихьуб мурхьул айи ягъчӀвурна хьуб мурхьлиин али чӀулариин илирчнайи кедрйирин кьуларикан вуйи. 4Гъалайин унчӀвар гьарсаб жергейиъ шубуб унчӀв ади, саб сабдиз гъаншарди, гъивнайи. 5Раккнарин дарчаригъ юкьуб мурччвнан раккнар ва унчӀварин дарчаригъ юкьуб мурччвнан унчӀвар гъяйи, ва шубуб жерге унчӀвар тмуну терефнаъ айи цалиъ айи унчӀварин шубуб жергейиз гъаншарди вуйи.

6Сулейманди «Мурхьлар ккайи зал» хьуцӀур юкӀ ярхишин ва сумчӀур юкӀ яркьушин алиб гъапӀнийи. Дидин улихь ккучӀврушв хьайи, дидин гъваъра мурхьлари дебккнайи.

7Дугъу, диван апӀбан бадали, тахтнан зал гъапӀнийи, дидиз «Диван апӀбан аьхю хал» гъапнийи, ва думу жилилан гъваиккна кедрйихъди гъабалгнийи. 8Хъа Сулейман яшамиш духьну ккуни хулар жара гьяятдиъ, залин кьяляхъ хъайи, думура «Диван апӀбан залсиб» вуйи. Хъана Сулейманди гьациб, гьадму зализ ухшар вуйи гъала, чав хпирди гъадагъу фяряуьндин шураз тикмиш гъапӀнийи.

9Гьаму вари дараматар ва РАББИЙИН Хулан аьхю гьяят шибритӀиан гъваиккна саб кьадарнаъди ктау ва айтӀанра, чӀатанра дурхнихъди гъядярхю багьайин гъванарикан гъапӀнийи. 10ШибритӀиъ йицӀуб ва миржиб юкӀ али багьайин аьхю гъванар дивнийи. 11Зиин саб кьадарнаъди ктау багьайин гъванар ва кедрйин чӀулар алийи. 12РАББИЙИН Хулан аьхю гьяятдиланси, айтӀан гьяятдилан шубуб жерге ктау гъванарин цал ва саб жерге кедрйин чӀулар илтӀикӀнийи. Гьациб вуйи РАББИЙИН Хулан улихь хьайи ккучӀврушв.

Кемшрин уста Хирам

13Сулейман паччагьди Тир шагьриан вуйи Хирамдиз теклиф гъапӀнийи ва думу кьабул гъапӀнийи. 14Думу Нефталимдин тухумдиан вуйи ачӀни хпирин бай вуйи. Хурамдин адаш Тириан вуйи. Думу кемшрин сяняаьткар вуйи. Хурамдик заан устадвал кайи, ва дугъаз кемшрихъди вари жюрейин ляхнарин тажруба айи. Думу Сулейман паччагьдихьна гъафнийи ва чаз табшурмиш гъапӀу вари ляхин гъапӀнийи.

Кемшрин кьюб мурхьул

15Хурамди кемшрин кьюб мурхьул урзнийи. Саб мурхьул йицӀимиржиб юкӀ ягълишин алиб вуйи, ва, эгер дидлан гъахма илбижиш, дидин гергмишин йицӀикьюб юкӀ шуйи. Кьюбпи мурхьулра гьациб вуйи. 16Гьацира дугъу, кемшир убзну, мурхьлариин иливру кьюб таж ктаънийи. Мурхьлариин иливру тажарин гьарсабдин ягълишин хьуб юкӀ вуйи. 17Мурхьлариин али тажар илдижнайи зунжрарикан дапӀнайи кемшрин чулари балгуйи, гьарсаб мурхьул – ургуб кемшрин чули. 18Дугъу, мурхьлар балгбан бадали, гьарсабдилан илдижнайи чулихъна кьюб жерге нарар ктаънийи. Мурхьлариин иливру тажар кьюбибра дугъу сабсдар гъапӀнийи. 19КкучӀврушвахь мурхьлариин иливру тажар лилия кюкдиз ухшар вуйидар, юкьуб юкӀ ягълишин айидар вуйи. 20Кьюбиб мурхьлариин иливру тажарин захсиб пайнан зиин чуларин багахь жергйириъди кьюдварж нар илтӀикӀнийи.

21Дугъу мурхьлар РАББИЙИН Хулан учӀврушвахь дивнийи. Кьибла терефнаъ айи мурхьлиин дугъу Яхин (Дугъу тасдикь апӀиди) ччвур иливнийи, хъа кафари терефнаъ айибдиин – Боаз (Дугъаъ кьувват а). 22Мурхьлариин иливру тажар лилия кюкдиз ухшар вуйидар гъапӀнийи. Гьаддиинди мурхьлариин лихувал ккудубкӀнийи.

Кемшрин гьявуз

23Хурамди саб гъирагъдихъан тмуну гъирагъдихъна йицӀуб юкӀ ва ягълишнаъ хьуб юкӀ али кемшрин гергми гьявуз убзнийи. Дидʼин «гьюл» ччвур иливнийи. Гьявуздин гергмишин, эгер гъахмайихъди гъеебциш, сумчӀур юкӀ шуйи. 24Гьявуз исиккди кьюб жерге гъарпзариз ухшар вуйидари дабалгнайи, гьарсаб юкӀ манзилнаъ йицӀуб гъарпуз ади. Гъарпзар гьявуздихъди сатӀиди урздар вуйи.

25Гьявуз йицӀикьюб йицриин дийибгънайи, дурарикан шубуб кафарийизди, шубуб ригъ алабхъру терефназди, шубуб кьиблайизди ва шубуб ригъ гьудубчӀвру терефназди лигурайи. «Гьюл» дурарин зиин алийи, хъа йицарин кьяляхъишвар айитӀинди, гьацӀкьялазди, илтӀикӀнайи. 26Гьявуздин даргнан ацӀушин хилин гагьсиб, хъа дидин даргар захранстар, лилия кюкюсиб вуйи. Гьявуздиъ кьюд агъзур бат#7:26 Кьюд агъзур бат: тахминан 44 агъзур литр. шид убшуйи.

Кемшрин аьрабйир

27Хурамди кемшрин йицӀуб аьраба#7:27 Кемшрин аьраба: 405-пи машнак кайи шиклиз лиг. гъапӀнийи. Гьарсаб аьраба ярхишнаъ юкьуб юкӀ, яркьушнаъ юкьуб юкӀ ва ягълишнаъ шубуб юкӀ алиб вуйи. 28Аьрабйир гьамци кадаънайидар вуйи: дурарин гъваларихъ рамкйирин арайиъ айи кемшрин кьулар хъайи. 29Думу кьулариъ ва рамкйириъ асланар, йицар ва малайикар-херувимар адатӀнайи. Асланарин ва йицарин зиин ва исикк кюкйирин кунцӀар адатӀнайи. 30Гьарсаб аьрабайикк кемшрин самар айи кемшрин юкьуб чарх ккайи, ва гьарсаб аьрабайиин гьарсаб терефнаъ кюкйирин кунцӀар адатӀнайи юкьуб самриин али аьхю зах албагнайи. 31Аьрабайин айитӀ саб юкӀ деринвал айи гергми йишв албагнайи, дидин яркьушин сабна гьацӀ юкӀ вуйи. Гергми йишван гъирагъарихъ жюрбежюр накьишар адатӀнайи. Аьрабайин кемшрин кьулар юкьбмурччвнандар вуйи, гергмидар дайи. 32Кемшрин кьуларикк юкьуб чарх ккайи, ва дурарин самар кьуларик ижмиди китӀнайи. Гьарсаб чархнан аьхюшин сабна гьацӀ юкӀ вуйи. 33Чархар гьяйвнар ккитӀру дявдин фургънаринсдар дапӀнайи: чархарин самар, дарчар, рягъяр ва рягъяр китӀрушв – вари урзнайидар вуйи.

34Гьарсаб аьрабайик дидхьан гьитӀигънайи юкьуб хли бисрушв кайи, гьарсаб мурччвʼин саб. 35Аьрабайин зиин гьацӀ юкӀ ягълишнан гергми дарч алийи. Ккудукьнайи рамкйир ва кешрин кьулар аьрабайин кӀакӀнак ижми дапӀнайи. 36Аьрабайин ва кемшрин кьуларин йишв кайишварик варишварик дугъу малайикар-херувимар, асланар ва пальмйир адатӀнийи, хъа юкьуб тереф – кюкйирин кунцӀар. 37Гьаци дугъу йицӀуб аьраба гъапӀнийи. Дурар вари сабси урздар ва саб кьадарнандар ва жюрейиндар вуйи.

38Хъасин Хурамди гьарсабдиъ ягъчӀвур бат#7:38 ЯгъчӀвур бат: тахминан 800 литр. шид гъябгъру ва гьарсабдиин юкьуб юкӀ али кемшрин йицӀуб аьхю зах гъапӀнийи, йицӀуб аьрабайикан гьарсабдихъна саб зах. 39Дугъу дурарикан хьуб аьраба РАББИЙИН Хулан кьибла терефнаъ ва хьуб аьраба кафари терефнаъ, хъа кемшрин гьявуз Хулан кьиблайинна-ригъ гьудубчӀвру терефнан мурччваъ дивнийи.

40Хурамди гьацира чӀакьар, бицӀи кьасйир ва гъурбан апӀруган рибчру ифи уч апӀру захар гъапӀнийи.

Заанурин Хулан мутмйир

Гьаддиинди РАББИЙИН Хулаъ Сулейман паччагьдиз апӀру вари ляхин Хурамди ккудубкӀнийи. Дугъу гъапӀнийи:

41кьюб мурхьул;

мурхьлиин иливру кьюб таж;

мурхьлиин иливру таж балгру кьюб чул;

42кьюб чулихъна юкьудварж нар (мурхьлиин иливру тажар балгру гьарсаб чулихъна кьюб жерге нарар);

43аьхю захар хъади йицӀуб аьраба;

44гьявуз ва дидикк йицӀикьюб йиц;

45чӀакьар, бицӀи кьасйир ва гъурбан апӀруган рибчру ифи уч апӀру захар.

РАББИЙИН Хулаз Сулейман паччагьдиз Хурамди гъапӀу вари мутмйир сакӀал дапӀнайи кемшриндар вуйи. 46Паччагьди думу мутмйир Ярдан дерейиъ Суккутдин ва Цартандин арайиъ ругдин ичӀариъ урзуз амур гъапӀнийи. 47Сулейманди думу шейʼар гъеерцундайи, гьаз гъапиш дурар кьадарсуз гизаф вуйи. Ишлемиш гъапӀу кемшрин гъагъ мялум дарди гъубзну.

48Гьацира Сулейманди РАББИЙИН Хулаз гьамцдар мутмйир гъапӀну:

гъизилин гъурбан апӀрушв;

РАББИЙИН уьл дивру гъизилин стол;

49марцци гъизиликан шамднар (Гирамидарик Гирамишван улихь арчул терефназ хьуб ва гагул терефназ хьуб);

гъизилин кюкйир, лампйир ва машйир;

50гъабар, лампйирин пилтйир гьадатӀру убрушвар, гъурбан апӀруган рибчру ифи уч апӀру захар, иццидар ниар апӀру шейʼар ургру захар – вари марцци гъизиликан,

ва айтӀан хулан, Гирамидарик Гирамишван раккнариз, хъа гьацира РАББИЙИН Хулан чӀатан раккнариз гъизилин петлийир.

51Сулейман паччагьди РАББИЙИН Хулаз апӀру вари ляхин ккудубкӀиган, дугъу чан адаш Давудди РАББИЙИН Хулаз бахш гъапӀу шейʼар – арс, гъизил ва жара мутмйир – гъахнийи ва РАББИЙИН Хулан хазнаханйириъ дивнийи.

ప్రస్తుతం ఎంపిక చేయబడింది:

Паччагьлугъар-3 7: ТабГК

హైలైట్

షేర్ చేయి

కాపీ

మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి

Гирами Китаб గురించి మరింత తెలుసుకోండి

Паччагьлугъар-3 7