ಪ್ರಕಟನೆ 20
20
ಆಯಿರ ಕಾಲತ್‍ರ ದೇವಡ ರಾಜ್ಯಬಾರ
1ದೇವದೂತ ಒಬ್ಬ ಪರಲೋಕತ್ಂಜ ಪಾತಾಳತ್‍ರ ಬೀತ್‌ಕೈನ ಪಿಂಞ ಬಲ್ಯ ಸರ್ಪಣಿನ ಕೈಯಿಲ್ ಪುಡ್‍ಚಂಡ್ ಬಾನತ್ಂಜ ಇಳ್ಂಜಿತ್ ಬಪ್ಪಾನ ಕಂಡಿಯೆ. 2ಪಿಶಾಚೀಂದ್ ಕಾಕುವ ಸೈತಾನನಾಯಿತ್ಂಜ ಪಳೆಯ ಪಾಂಬಾಯಿತುಳ್ಳ ಘಟಸರ್ಪತ್‍ನ ಪುಡ್‌ಚಿತ್, ಆಯಿರ ಕಾಲಕ್ ಅದ್‍ನ ಕೆಟ್ಟಿ ಬೆಚ್ಚತ್. 3ಆ ಆಯಿರ ಕಾಲ ನೆರೆವೇರುವಕತ್ತನೆ ಅದ್ ಜನಳ ಮೋಸ ಮಾಡತನೆಕೆ ಅದ್‍ನ ಪಾತಾಳತ್‍ಲ್ ತಳ್ಳಿತ್ ಅದ್ಂಡ ಬಾಯಿಕಂಡಿ‍ನ ಮುದ್ರೆ ಇಟ್ಟತ್. ಆ ಆಯಿರ ಕಾಲ ಆನ ಪಿಂಞ ಅದ್ ಚೆನ್ನ ಕಾಲ ಬುಡ್‍ಗಡೆ ಆಪ.
4ಪಿಂಞ, ನಾನ್ ದುಂಬ ಸಿಂಹಾಸನತ್‍ನ ಕಂಡಿಯೆ. ಅದ್ಂಡಮೇಲೆ ಅಳ್‍ಪಯಿಂಗಕ್ ನ್ಯಾಯತೀರ್ಪ್ ಕೊಡ್‍ಪ ಅದಿಕಾರತ್‍ನ ಕೊಡ್‌ತಿತ್ಂಜತ್; ಯೇಸುರ ವಿಷಯತ್ ಉಳ್ಳ ಸಾಕ್ಷಿಕಾಯಿತ್, ದೇವಡ ವಾಕ್ಯಕಾಯಿತ್ ಮಂಡೆನ ಕೆತ್ತ್‌ಚಿಡ್‌ವಕ್‌ ಕೊಡ್‌ತಯಿಂಗಡ ಆತ್ಮತ್‌ನ, ಮೃಗತ್‍ನ ಅದ್ಂಡ ವಿಗ್ರಹತ್‍ನ ಆರಾದನೆ ಮಾಡತೆ, ತಂಗಡ ನೆತ್ತಿಲ್ ಪಿಂಞ ಕೈಯಿಲ್ ಅದ್ಂಡ ಮುದ್ರೆನ ಇಡತಯಿಂಗಳ ನಾನ್ ಕಂಡಿಯೆ. ಅಯಿಂಗ ಜೀವವಾಯಿತ್ ಬಂದಿತ್, ಕ್ರಿಸ್ತಂಡ ಕೂಡೆ ಆಯಿರ ಕಾಲ ರಾಜ್ಯಬಾರ ಮಾಡ್‍ಚಿ. 5ಬಾಕಿ ಚತ್ತಯಿಂಗ ಆಯಿರ ಕಾಲಕತ್ತನೆ ಜೀವವಾಯಿತ್ ಎದ್ದಿತ್‌ಲ್ಲೆ. ಇದೇ ಆದ್ಯವಾಯಿತ್ ಜೀವತ್‍ಲ್ ಬಪ್ಪದ್. 6ಆದ್ಯವಾಯಿತ್ ಜೀವತ್‍ಲ್ ಬಪ್ಪಕ್ ಯೋಗ್ಯವಾನಯಿಂಗ ಆಶೀರ್ವಾದ ಪಡ್ಂದಯಿಂಗಳು ಪವಿತ್ರವಾನಯಿಂಗಳು ಆಯಿತುಂಡ್; ಈಂಗಡ ಮೇಲೆ ದಂಡನೆ ಚಾವ್‍ಕ್ ಅದಿಕಾರ ಇಲ್ಲೆ; ಈಂಗ ಕ್ರಿಸ್ತಂಡ ಮಿಂಞ ದೇವಡ ಯಾಜಕಂಗಳಾಯಿತ್ ಇಂಜಂಡ್ ಅಂವೊಂಡ ಕೂಡೆ ಆಯಿರ ಕಾಲ ರಾಜ್ಯಬಾರ ಮಾಡ್‌ವ.
7ಆ ಆಯಿರ ಕಾಲ ನೆರವೇರುವಕ, ಸೈತಾನ ತಾಂಡ ಕೆಟ್ಟ್‌ಯಿಂಜ ಬುಡ್‍ಗಡೆ ಆಪ. 8ಅಕ್ಕ, ಅಂವೊ ಪೊರಮೆ ಬಂದಿತ್, ಬೂಮಿರ ನಾಲ್ ದಿಕ್ಕ್‌ಲ್ ಉಳ್ಳ ಗೋಗ್ ಮಾಗೋ‍ಗ್ ಎಣ್ಣುವ ಜನಳ ಮೋಸ ಮಾಡ್‌ವಕಾಯಿತ್ ಮರ್‍ಳ್ ಮಾಡಿತ್, ಅಯಿಂಗಳ ಯುದ್ದಕ್ ಪೋಪನೆಕೆ ಮಾಡ್‌ವಕ್ ಪೊರಟಿತ್ ಪೋಪ; ಅಯಿಂಗಡ ಲೆಕ್ಕ ಸಮುದ್ರತ್‍ರ ಮಣರಚ್ಚಕ್ ಇಪ್ಪ. 9ಅಯಿಂಗ ಬೂಮಿಯೆಲ್ಲ ಹರಡಿಯಂಡ್, ದೇವಡ ಮಕ್ಕ ಕೂಡುವ ಜಾಗತ್‍ನ, ಪ್ರೀತಿರ ಪಟ್ಟಣತ್‍ನ ಸುತ್ತಿಯಂಡತ್; ಅಕ್ಕ ಬಾನತ್ಂಜ ತಿತ್ತ್ ಬಂದಿತ್ ಅಯಿಂಗಳ ಚುಟ್ಟ್‌ರ್‍ವ. 10ಇದ್‍ಲ್ಲತೆ, ಅಯಿಂಗಳ ಮರ್‍ಳ್ ಮಾಡ್‍ನ ಸೈತಾನನ, ಮೃಗತ್‍ನ, ಕಳ್ಳ ಪ್ರವಾದಿನ ಪ್ರವಾದಿ ಬೆಚ್ಚಿತ್ಂಜ ತಿತ್ತ್ ಕತ್ತಿಯಂಡ್ ಉಳ್ಳ ಗಂಧಕತ್‍ರ ಕಡಲ್‍ಲ್ ಇಟ್ಟಿರುವ. ಅಯಿಂಗ ಅಲ್ಲಿ ಪೋಲ್ ಬಯಿಟಾಯಿತ್ ಎಕ್ಕಾಲು ಹಿಂಸೆ ಪಟ್ಟಂಡಿಪ್ಪ.
ಚತ್ತಯಿಂಗಕುಳ್ಳ ನ್ಯಾಯ ವಿಚಾರಣೆ
11ಅಲ್ಲಿಂಜ, ನಾನ್ ಬೊಳ್‍ತ ಸಿಂಹಾಸನತ್‍ನ, ಅದ್ಂಡಮೇಲೆ ಅಳ್‌ತಿತ್ ಉಳ್ಳಂವೊನ ಕಂಡಿಯೆ; ಅಂವೊಂಡ ಸನ್ನಿದಾನತ್ಂಜ ಬೂಮಿಯು ಬಾನವು ಕಾಂಗತೆ ಆಯಿಪೋಚಿ. ಅದ್ ಇಂಜ ಜಾಗ ಸಹ ಇಲ್ಲತೆ ಆಚಿ. 12ಚತ್ತಯಿಂಗಳಾನ ಚೆರಿಯಯಿಂಗಳ, ಬಲ್ಯಯಿಂಗಳ, ದೇವಡ ಸಿಂಹಾಸನತ್‍ರ ಎದ್‍ಕೆ ನಿಂದಿತುಳ್ಳಾನ ಕಂಡಿಯೆ. ಅಕ್ಕ ಪುಸ್ತಕ ಎಲ್ಲಾ ತೊರ್ಂದತ್, ಅಲ್ಲಿಂಜ ಜೀವ ಪುಸ್ತಕ ಎಣ್ಣುವ ಬೋರೆ ಒರ್ ಪುಸ್ತಕವು ತೊರ್ಂದತ್; ಅಕ್ಕ ಆ ಪುಸ್ತಕತ್‍ಲ್ ಒಳ್‍ದಿತುಳ್ಳನೆಕೆ, ಚತ್ತಯಿಂಗಕ್ ಅಯಿಂಗಯಿಂಗ ಮಾಡ್‍ನ ಕ್ರಿಯೇಕ್ ತಕ್ಕಂತ ನ್ಯಾಯತೀರ್ಪ್ ಕ್‍ಟ್ಟ್‌ಚಿ. 13ಸಮುದ್ರ ತಾಂಡಲ್ಲಿ ಇಂಜ ಚತ್ತಯಿಂಗಳ ಒಪ್ಪ್‌ಚಿಟ್ಟತ್. ಚಾವೂ, ಪಾತಾಳವೂ ತಾಂಡಲ್ಲಿ ಇಂಜ ಚತ್ತಯಿಂಗಳ ಒಪ್ಪ್‌ಚಿಟ್ಟತ್. ಎಲ್ಲಾರ್‌ಕು ಅಯಿಂಗಯಿಂಗ ಮಾಡ್‍ನ ಕ್ರಿಯೇಕ್ ತಕ್ಕಂತ ನ್ಯಾಯತೀರ್ಪ್ ಕ್‍ಟ್ಟ್‌ಚಿ. 14ಅಕ್ಕ, ಚಾವ್ ಪಿಂಞ ಪಾತಾಳತ್‍ನ ತಿತ್ತ್‌ರ ಕಡಲ್‍ಕ್ ಚಾಡಿರ್‌ತ್. ಇದ್ ದಂಡೆನೆ ಚಾವ್. 15ಜೀವ ಪುಸ್ತಕತ್‍ಲ್ ಪೆದ ಒಳ್‍ದಿತ್ ಇಲ್ಲತಯಿಂಗಳಾಯಿತ್ ದಾರ್ ಉಂಡೋ ಅಯಿಂಗಳೆಲ್ಲ ತಿತ್ತ್‌ರ ಕಡಲ್‍ಕ್ ಚಾಡಿರ್‌ತ್.
ప్రస్తుతం ఎంపిక చేయబడింది:
ಪ್ರಕಟನೆ 20: ಕೊಡವ
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2017, New Life Literature (NLL)
