ಜ್ಞಾನತ್‌ರ ಪಡಿಮ 2
2
1ನಾಡ ಮೋನೇ, ನಾನ್‌ ಎಣ್ಣುವ ತಕ್ಕ್‌ನ ಕ್‍ೕಟಿತ್, ನಾಡ ಆಜ್ಞೆನ ಒರ್‌ ಬಂಡಾರನೆಕೆ ಕಾಪಾಡಿತ್,
2ನಾಡ ಜ್ಞಾನತ್‌ರ ತಕ್ಕ್‌ಕ್‌ ಚಾಯಿತೆ ಕೆಮಿ ಕೊಡ್. ಅದ್‌ನ ಅರ್ಥ ಮಾಡಿಯೊಕ್‌ ದುಂಬ ಪ್ರಯತ್‌ನ ಪಡ್.
3ಬುದ್ದಿ ಕ್‌ಟ್ಟ್‌ವಕಾಯಿತ್‌ ಬೋಡಿಯಂಡ್, ಅರ್ಥ ಮಾಡಿಯೊಕ್‌ ಮೊರೆ ಇಡ್.
4ಅದ್‌ನ ಬೊಳ್ಳಿನ ತ್‍ೕಡ್‌ವನೆಕೆ ತ್ೕಡ್. ಒಳ್‌ಪ್‌ಚಿಟ್ಟಿತ್‌ ಬೆಚ್ಚ ಬಂಡಾರತ್‌ನ ತ್‍ೕಡ್‌ವನೆಕೆ ತ್ೕಡ್
5ಇದ್‌ನೆಲ್ಲಾ ಮಾಡ್‌ಚೇಂಗಿ, ಯೆಹೋವಂಗ್‌ ಬೊತ್ತ್‌ವದ್‌ ಎಂತ ಎಣ್ಣಿಯಂಡ್‌ ನೀಕ್‌ ಅರ್ಥ ಆಪ, ದೇವಡ ಅರಿವ್‌ ನೀಕ್‌ ಕ್‌ಟ್ಟುವ.
6ಯೆಹೋವನೆ ಜ್ಞಾನ ತಪ್ಪಂವೊ. ಅಂವೊಂಡ ತಕ್ಕ್‌ಯಿಂಜ ಅರಿವು ಬುದ್ದಿಯು ಕ್‌ಟ್ಟ್‌ವ.
7ಅಂವೊ ನೀತಿವಂತಯಿಂಗಕಾಯಿತ್‌ ನೇರಾನ ಜ್ಞಾನತ್‌ನ ಕೂಟಿ ಬೆಚ್ಚಿತುಂಡ್; ಸತ್ಯತ್‌ಲ್‌ ನಡ್‌ಪಯಿಂಗಕ್‌ ಅಂವೊ ಪಡೆತಟ್ಟೆಯಾಯಿತ್‌ ಇಪ್ಪ.
8ಅಂವೊ ನೀತಿವಂತಯಿಂಗಡ ಬಟ್ಟೆನ ಕಾಪಾಡಿತ್, ಅಂವೊಂಡ ಬಕ್ತಂಗಡ ಬದ್‌ಕ್‌ನ ಕಾಪಾಡುವ.
9ಅಕ್ಕ ನೀನ್‌ ನೀತಿನ, ನ್ಯಾಯನ ನಲ್ಲದ್‌ನ ಅರ್ಥಮಾಡಿಯಂಡ್, ನೇರಾನ ಬಟ್ಟೇನ ಅರ್‌ಂಜೊವಿಯ.
10ಅನ್ನನೆ ಜ್ಞಾನ ನೀಡ ಹೃದಯತ್‌ಲ್‌ ಪ್ರವೇಶ ಮಾಡಿತ್, ಅರಿವು ನೀಡ ಆತ್ಮಕ್‌ ಸುಕವಾಯಿತ್‌ಪ್ಪ.
11ನಲ್ಲ ಯೋಚನೆ ನಿನ್ನ ಕಾಪಾಡುವ. ಬುದ್ದಿ ನಿನ್ನ ಬದ್ರವಾಯಿತ್‌ ಬೆಚ್ಚೊವ.
12ಅನ್ನನಾಯಿತ್‌ ನೀನ್‌ ದುಷ್ಟಂಗ ಪೋಪ ಬಟ್ಟೆಯಿಂಜ, ಪಿಂಞ ಕಪಟಿ ಜನಯಿಂಜ ಬಚಾವ್‌ ಆಪಿಯ.
13ಆಚೇಂಗಿ ದುಷ್ಟಂಗ ಇರ್‌ಟ್‌ರ ಬಟ್ಟೆಲ್‌ ನಡ್‌ಕಂಡೂಂದ್‌ ನೀತಿರ ಬಟ್ಟೆನ ಬುಟ್ಟಿತ್ ಪೋಯಂಡುಂಡ್.
14ಅಯಿಂಗ ಕ್‍ೕಡ್‌ ಮಾಡ್‌ವದ್‌ಲ್‌ ಕುಶಿಪಟ್ಟಿತ್, ದುಷ್ಟಂಗಡ ಕಪಟತನತ್‌ನ ನೋಟಿತ್‌ ಸುಕತ್‌ಲ್‌ ಕಳಿಪ.
15ಅಯಿಂಗಡ ಬಟ್ಟೆ ಕಪಟವಾನದು, ಅಯಿಂಗಡ ನಡತೆ ಕ್‍ೕಡಾನದು ಆಯಿತ್‌ ಉಂಡ್.
16ತಾಂಡ ಬಾಲ್ಯಕಾಲತ್‌ರ ವಡಿಯನ ಬುಟ್ಟಿತ್, ತಾನ್‌ ದೇವಡ ಮಿಂಜತ್‌ ಮಾಡ್‌ನ ಒಡಂಬಡಿಕೆನ ಮರ್‌ಂದಿತ್,
17ನೊಣೆ ತಕ್ಕ್‌ ಪರ್‌ಂದಿತ್‌ ತಾಂಡ ಬಲೇಕ್‌ ಬೂವನೆಕೆ ಮಾಡುವ. ವ್ಯಬಿಚಾರಿಯಾನ ಇವಡ ಕೈಯಿಂಜ ಜ್ಞಾನ ನಿನ್ನ ಕಾಪಾಡುವ.
18ಅವಡ ಮನೆಕ್‌ ಪೋಪದ್, ಚಾವಕ್‌ ಪೋಪನೆಕೆ ಇಪ್ಪ, ಅವ ಪೋಪ ಬಟ್ಟೆ ನರಕಕ್‌ ಪೋಪ ಬಟ್ಟೆಯಾಯಿತುಂಡ್.
19ಅವಡ ಪಕ್ಕ ಪೋಪಯಿಂಗ ದಾರು ತಿರಿತ್‌ ಬಪ್ಪದು ಇಲ್ಲೆ, ಜೀವತ್‌ರ ಬಟ್ಟೆನ ಪುನಃ ಕಂಡ್‌ ಪುಡಿಪದು ಇಲ್ಲೆ.
20ಆನಗುಂಡ್, ನೀನ್‌ ನಲ್ಲ ಮುನುಷ್ಯಂಗಡ ಬಟ್ಟೆಲ್‌ ನಡ್‌ಂದಿತ್, ನೀತಿವಂತಯಿಂಗಡ ಬದ್‌ಕ್‌ರನೆಕೆ ಬದ್‌ಕೊಂಡು.
21ಎನ್ನಂಗೆಣ್ಣ್‌ಚೇಂಗಿ ಸತ್ಯವಂತಯಿಂಗಳೇ ಈ ಬೂಮಿಲ್‌ ವಾಸ ಮಾಡ್‌ವ. ಸತ್ಯತ್‌ಲ್‌ ನಡ್‌ಪಯಿಂಗ ಅದ್‌ಲ್‌ ನೆಲೆಗೊಳ್ಳುವ.
22ಆಚೇಂಗಿ ದುಷ್ಟಂಗ ಈ ಬೂಮಿಯಿಂಜ ಪಾಳಾಯಿ ಪೋಪ; ದ್ರೋಹಿಯ ಬೂಮಿಲ್‌ ಇಲ್ಲತನೆಕೆ ನಾಶ ಆಯಿಪೋಪ.
ప్రస్తుతం ఎంపిక చేయబడింది:
ಜ್ಞಾನತ್‌ರ ಪಡಿಮ 2: ಕೊಡವ
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2017, New Life Literature (NLL)