Abanya Galatĩa 2
2
Paũlo nʼabandi bakwenda
1Nʼenyũma wʼemyaka erĩkũmĩ nʼeyĩnĩ monahetukira kandi eYerũsalema haguma na Baranaba. Monatwala Tĩto haguma nage nibya. 2Monayayo kusangwa Nyamuhanga mwanyĩbĩsũlĩra, ati nyiyeyo. Monakanĩrya abakulu omwatsi oyo wʼEngulu Yowene eyo nabya ngatũlĩra Ebihanda, nĩkwa monabwirabo ĩbobene, nyiti sinyibye nga nabirikola kutse nyikinakola buyira. 3Na Tĩto, oyo wabya nage, nomo anabya Mũgĩrĩkĩ, mobatamuhatikana erĩbanĩbwa. 4Nĩkwa abandi abayahula mo balĩkyetu, mobasonda erĩmũbanĩa. Abandi aba mobĩngĩre omo katĩkatĩ ketu mo bũbĩso-bĩso, eriyalinga obwĩranda bwetu obo tuwite, itumatikene na Kristo Yesu, ibakasonda erituyira mo bakobe. 5Motũtalĩga omwatsi wabo nʼahake, itwatoka erĩteya ekwenene yʼEngulu Yowene busana nenyũ.
6Nĩkwa abo babya ngʼabakulu, ngabũga nyitya kusangwa sinyitsomenebo, kusangwa Nyamuhanga sialiyira ebitaga; abakulu abo mobatamba mwatsi. 7Kusangwa balangira ngoko Nyamuhanga abirimba erĩtũla Engulu Yowene oko bandu bʼEbihanda bitabwene, ngoko Nyamuhanga aha Petero erĩtũlayo oko Bayũda ababwene. 8Kusangwa oyo wakola na Petero omo bukwenda oko Bayũda, yo nʼoyo wakola nage omo bukwenda bwʼEbihanda. 9Neryo ababya ngʼabasondolĩ, ye Yakobo, na Petero, na Yoane, mobaminya ngoko Nyamuhanga abirimba omũbĩrĩ oyũ, mobanyĩkokya haguma na Baranaba ngʼabasangĩrĩ omo mũbĩrĩ, bati ĩtwe tukole omo katĩkatĩ kʼEbihanda, nabo bakole haguma nʼAbayũda. 10Nĩkwa bati twibuke abera babo, nage nabya nʼomũhwa wʼerikola nyitya.
Paũlo akakunga Petero eAntĩokĩa
11Nĩkwa omugulu Petero ahĩka eAntĩokĩa, monamukungira embere syʼabandu, kusangwa isialitakola ndeke.
12Kusangwa Petero abya akalya nʼabalĩkyetu bʼEbihanda, omugulu abandu abalũa ewa Yakobo bate bahĩkaho. Nĩkwa abandu abo babere babĩhĩka, Petero mwayigabula oko bʼEbihanda mwagana erirya haguma nabo, kusangwa abya akubaha abakakwama omwatsi wʼerĩbanĩa. 13Nʼabandi Bayũda bosĩ mobayihindula nga Petero, erĩyĩtendererya, kyaleka Baranaba naye iniakwama omwʼĩyĩtendererya lyabo. 14Nĩkwa omugulu nalangira ngoko baterendera omo kwenene ngoko litolere Engulu Yowene, monabwira Petero emuliro wʼabosĩ nyiti, Uwe Mũyũda, wabya ukalendera ngʼomundu wʼEbihanda, butsira ngʼOmũyũda. Busana nakĩ lino ukahatikana Ebihanda erirendera ngʼAbayũda kwehĩ?
Abayũda nʼEbihanda bakalamĩbawa omwʼĩkĩrĩrya
15Ĩtwe twabutawa mo Bayũda, Situli bakola-nabi bʼEbihanda. 16Nĩkwa tũnasĩ omundu sialitunganana embere wa Nyamuhanga busana nʼerikola Emigambo, nĩkwa busana nʼerĩkĩrĩrya Yesu Kristo. Netu twabĩrĩkĩrĩrya Kristo, itwatoka eribya batunganene, busana nʼerĩkĩrĩrya uku Kristo, butsira erikwama Emigambo. Kusangwa sihali mundu oyo wasyatũngananĩbwa embere wa Nyamuhanga busana nʼerikwama Emigambo. 17Nĩkwa omugulu tukasonda erĩtũngananĩbwa busana nʼerimatikana na Kristo, itukabanika mo bakola-nabi ngʼEbihanda, neryo Kristo akatuyira mo bakolanabi kwehĩ? Iyehe, nʼahake! 18Kusangwa namaswahĩmba kandi ebyo nasambula, ĩnamayĩkangya ko nyiri mundu wʼamalolo. 19Nĩkwa omo mwatsi wʼEmigambo nabirihola, nyitoke eribyaho busana na Nyamuhanga. 20Nabiribambwa oko musalaba haguma na Kristo. Nĩkwa lino nyineho; nĩkwa butsira ngye, Kristo aneho omwisi wage. Nʼengebe eyo nyiri nayo lino omo mubiri, nyiri nalyo busana nʼerĩkĩrĩrya Omugala wa Nyamuhanga, oyo wanyanza, nʼeriyiha busana nage. 21Sindigana olukogo lwa Nyamuhanga; kusangwa omundu amatũngananĩbwa busana nʼEmigambo, neryo Kristo imwahola busa!
ప్రస్తుతం ఎంపిక చేయబడింది:
Abanya Galatĩa 2: KB80
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Bible in Kinandi © Bible Society of the Democratic Republic of Congo, and Bible Society of Uganda, 1980.