Abanya Efeso 3

Omũbĩrĩ wa Paũlo busana nʼEbihanda

1Busana nʼomwatsi oyũ, ĩngye Paũlo ngasaba Nyamuhanga, ĩngye mundu wʼomũlĩkĩ wa Kristo Yesu busana nenyũ, abandu bʼEbihanda. 2Kusangwa mwabĩrĩowa ngoko Nyamuhanga omo lukogo luwe abirimba omũbĩrĩ wʼerĩbawatĩkya. 3Nyamuhanga mwabĩsũla erĩkũmbo liwe nʼerĩnyĩmĩnyĩsyalyo, ngoko nabasakira erĩmbere omo bĩnywa bike. 4Neryo mwamasoma ebyo mwasyaminya ebyo nyasĩ omwʼĩkũmbo lya Kristo. 5Omo migulu yalaba Nyamuhanga mwatamĩnyĩsya abandu bʼerĩkũmbo erĩ; nĩkwa lino omo Mũlĩmũ Abũyĩrĩre abĩrĩbĩsũlĩralyo abakwenda buwe babũyĩrĩre nʼabamĩnyererĩ. 6Erĩkũmbo eryo liti, busana nʼEngulu Yowene, Ebihanda bakabya nʼomũyĩsa haguma nʼAbayũda, kandi omo kĩtũnga kiguma bakasangira ebyo Nyamuhanga alagabo omwisi wa Kristo Yesu.

7Nyamuhanga omo lũsũnzo lwʼolukogo luwe mwanyĩhĩra mo mugombe wʼerĩtũla Engulu Yowene. Kandi mwambalo omo bũtokĩ buwe bunene. 8Ĩngye indi muke kutsibu omo katĩkatĩ kʼabandu ba Nyamuhanga, nĩkwa omo lukogo luwe Nyamuhanga mwamba omũbĩrĩ gowene oyũ wʼerĩtũlĩra Ebihanda engulu yʼobuteke obũlengĩre, obwa Kristo, nabo bũlabĩre obũlengekanĩa. 9Kandi mwamba omũbĩrĩ wʼerĩmĩnyĩsya abandu bosĩ ngoko Nyamuhanga akatondekanaya omwatsi wʼerĩkũmbo erĩ. Nyamuhanga oyo wahangika ebindu byosĩ, mwabĩsa omwatsi oyo gʼoko migulu yosĩ yalaba, 10iniatoka, oko mugulu ono, omo kanĩsa yiwe, erĩkangya oko batabalĩ nʼabʼehamũlĩ omo kyanya, amenge wuwe mũsĩndo-mũsĩndo. 11Nyamuhanga mwakola ebĩ ngoko ayĩsũnza kera na kera, neryo lino abĩrĩberereryabyo omwisi wa Kristo Yesu Omukama wetu. 12Kusangwa tumatikene naye, kandi kusangwa twabĩrĩmwĩkĩrĩrya, tuli nʼobwĩranda bwʼerĩhĩka embere wa Nyamuhanga butsira buba. 13Kikaleka inabahatikana nyiti, simuluhe busana nʼamalĩge wage busana nenyũ; kusangwa amalĩge ayo nĩ ndũndĩ busana nenyũ.

Olwanzo lwa Kristo

14Busana nʼekĩ ngakũkamira Tata. 15Iye akahula obuli kĩtũnga omo lĩna lyakyo, ekiri omo lubula nʼekiri munakihugo. 16Ngamusaba nyiti, omo lukengerwa luwe lunene, abahe obũtokĩ bwʼOmũlĩmũ wuwe Abũyĩrĩre imwatoka eribana amaka omo mitima yenyũ. 17Kandi ngasaba nyiti, Kristo ĩkale omo mitima yenyũ busana nʼerĩkĩrĩrya lyenyũ; kandi nyiti, muhande emĩrĩhĩ yʼolwanzo lwenyũ, ĩmũnasĩkĩre omo lwanzo olo.

18Imwatoka haguma nʼabandu bosĩ ba Nyamuhanga eriminya ndeke obunene bʼolwanzo luwe, nʼobugali bwalo, nʼobuli bwalo, nʼobuli bwʼendata bwalo, nʼobuli bwʼeyĩkwa bwalo. 19Kandi mutoke eriminya kutsibu olwanzo lwa Kristo olũlabĩre eriminya lyʼabandu. Kandi nyiti, imwatoka erĩũsũlĩbwa omwʼĩhĩkana lyosĩ lya Nyamuhanga.

20Olukengerwa lubye ukwʼiye oyuwite obũtokĩ bwʼerikola ebyosĩ ebyo tũkabũlaya kutse ebyo tũkalengekanaya, ngʼobũtokĩ obukakola omwisi wetu. 21Olukengerwa lubye ukwʼiye omo kanĩsa nʼomwisi wa Kristo Yesu oko migulu yosĩ, kera na kera. Amina.

ప్రస్తుతం ఎంపిక చేయబడింది:

Abanya Efeso 3: KB80

హైలైట్

కాపీ

సరిపోల్చండి

షేర్ చేయి