Abanya Kolosaĩ 3

1Neryo kusangwa mwabĩrĩlũbũkĩbwa haguma na Kristo, mũhĩre emitima yenyũ oko myatsi yʼendata aho Kristo ĩkere oko luhande lwʼamali lwa Nyamuhanga. 2Mũhĩre obũlengekanĩa bwenyũ oko myatsi yʼendata, butsira oko myatsi ya muna-kihugo. 3Kusangwa mwabirihola, na lino engebe yenyũ ĩbĩseme haguma na Kristo omwisi wa Nyamuhanga. 4Kristo ni ngebe yenyũ, neryo omugulu asyamĩnyĩkalĩbwa nenyũ mwasyamĩnyĩkalĩbwa haguma naye omo lukengerwa.

Eribyaho lya kera nʼerya sesene

5Neryo mwĩte esyongumbu syenyũ syʼekihugo, syesĩ: erĩsĩngĩra, ebĩtĩsĩrĩre, engumbu nyibi, erisonda ibi, nʼobururu bʼomũsĩndo wʼerikwama esyosanamu. 6Busana nʼemyatsi ngʼeyĩ erihitana lya Nyamuhanga lĩkahĩka oko bandu abatĩowa. 7Nenyũ momwabya mukakola ngʼabo, omugulu mwahĩra emitima yenyũ, oko myatsi eyo.

8Nĩkwa lino, nenyũ mugane eyosĩ eyĩ: erihitana, eriagalirwa, ekĩnĩga, eritsuma; kandi Sĩmũbũge ebĩtĩsĩrĩre. 9Muleke eribihirana, kusangwa mwabirigabana nʼomundu wa kera nʼemĩbĩrĩ yiwe. 10Kandi mwabiriambala omundu muhya-muhya, oyo Nyamuhanga, mũhangĩkĩ wuwe akabindula, itwatoka erimusosa nʼerimuminya ndeke. 11Neryo sihakiri kandi omundu wʼEbihanda nʼOmũyũda, kutse oyubwene nʼoyutabwene kutse omũyĩra, kutse mundu wʼomolĩ, kutse omukobe, kutse owʼobwĩranda, nĩkwa Kristo ni mukulu wʼabosĩ, kandi Kristo ali omwisi Wʼebyosĩ.

12Neryo muli bandu ba Nyamuhanga. Abiribanza, abiriyisoga nywe. Busana nʼekyo muyire emitima yʼeriganyira, omutima wʼobubuya, owʼerĩyĩkehya, owʼobolo, owʼeriyibombeka. 13Neryo muganyirane, mubuyirane omugulu omundu awite omwatsi oko gundi. Ngoko Mukama ababuyira, nenyũ ko mwangabuyira abandi bo mutya. 14Kandi kwilaba ebyosĩ, muyire omutima wʼolwanzo olũkahĩkanaya ebyosĩ haguma omo buguma. 15Neryo muleke Obuholo bwa Kristo butabale emitima yenyũ. Kusangwa mwabiribirikirwa na Nyamuhanga eribya nʼobuholo obo haguma, omo mubiri muguma. Kandi mubye bandu bʼewasĩngya. 16Ebĩnywa bya Kristo, omo bubuya bwabyo bosĩ, bĩkale omo mitima yenyũ. Mũkangĩrĩranaye, nʼerihana obuli mundu mũlĩkyabo omo menge gosĩ. Mwimbe esyonyimbo, esyonyimbo syʼeripipa, nʼesyonyimbo syʼerĩramya, mwimbire Nyamuhanga nʼemitima yʼewasĩngya. 17Nʼebyosĩ mukakola, omo kĩnywa, kutse omo mũbĩrĩ, mukole ebyosĩ omo lĩna lyʼomukama Yesu, imunemuha ewasĩngya uku Tata Nyamuhanga busana na Yesu.

Ebyo mwanganakola oko bandi

18Abakalĩ, mowe abĩba nywe, ngoko litolere imwakola ngʼAbakristo.

19Abĩba, mwanze abakalĩ benyũ, simukale kubo.

20Abana, mowe ababũtĩ benyũ omo myatsi yosĩ, kusangwa ekĩ kĩkatsemesaya Omukama.

21Ĩnywe abotata, sĩmũhĩtanaye abana benyũ, bakasyaluha.

22Abakobe, mowe abakama benyũ ba muna-kihugo omo myatsi yosĩ. Simukole kusangwa bakabasamalira, imuli ngʼabakatsemesaya abandu basa, nĩkwa mukole nʼomutima owene, imukakenga Omukama Yesu. 23Ebyosĩ mukakola, mukole nʼomutima gʼomuhwa, nga mukakolera Omukama, butsira bandu. 24Ĩmũnasĩ ngoko Mukama asyabahemba. Mwasyangirira ebyo abĩkĩre busana nʼabandu buwe. Kusangwa Omukama Kristo, yo mukakolera. 25Nʼoyukakola nabi asyalihwa busana nʼebibi biwe, butsira butaga.

ప్రస్తుతం ఎంపిక చేయబడింది:

Abanya Kolosaĩ 3: KB80

హైలైట్

కాపీ

సరిపోల్చండి

షేర్ చేయి