2 Abanya Korĩnto 11
11
Paũlo nʼabakwenda bʼamabehĩ
1Nyiti kumbe mwanganyihulikirira omo bũkĩrũ bwage buke, nyiti, kĩsĩ-kĩsĩ munyihulikirire. 2Kusangwa nyĩbanzĩre kutsibu ngoko Nyamuhanga naye abanzĩre. Kandi nabĩrĩbasĩmolya ngʼomumbesa mubuya oko mundu muguma ye Kristo. 3Nĩkwa ngubaha nyiti, Ngoko Eva atebĩbawa nʼamenge mabi wʼenzoka, kwʼamalengekanĩa wenyũ asyatsandĩbwa atya, imwaleka erikwama Kristo nʼolwanzo lwenyũ losĩ, nʼomutima wenyũ gosĩ. 4Kusangwa mũkahũlĩkĩrĩraya lũba omundu oyukasa nʼerĩtũla omwatsi wʼogundi Yesu, butsira Yesu oyo twabakangĩrĩraya. Kandi mukangirira ekindi kĩrĩmũ ekite Omũlĩmũ ogo mwangirira erĩmbere, kandi mũkalĩga eyindi ngulu eyite Engulu Yowene eyo mwalĩga erĩmbere.
5Kusangwa ngaganĩraya nga Sindi muke nʼahake oko bakwenda abo mukahula mo bakulu. 6Nomo nangabya Ĩsĩnyasĩ erĩbũga ndeke-ndeke, nĩkwa sindibula menge; ngoko twabĩrĩbakangya ehosĩ engendo nyingi.
7Omugulu nabatũlĩra Engulu Yowene ya Nyamuhanga mondabalĩhĩsya kindu, kandi monayĩkehya, imomwatoka erĩhamĩbwa. Monakola nabi kwehĩ? 8Omugulu nabya ngabakolera, awandi makanĩsa mobanyihemba. Nabya nga ngĩba ebyʼawandi makanĩsa busana nʼeribakolera. 9Kandi omugulu nabya omo katĩkatĩ kenyũ inyine nʼobwaga, mondanũbya mundu; nĩkwa abalĩkyetu abalũa eMakedonĩa mobanyiretera ebyosĩ ebyo nabya ngabula. Neryo omo myatsi yosĩ mondabanũbya, kandi sindiendĩsyabanũbya nibya. 10Ngoko mwatsi wʼekwenene wa Kristo ali omwisi wage, ngabũga kwenene, sindiendĩsyũmbya eriyihalamba busana nʼomwatsi oyũ omo bihugo byosĩ byʼAbagĩrĩkĩ. 11Ngabũga nyitya busana nakĩ kwehĩ? Kusangwa sĩnyĩbanzĩre kwehĩ? Iyihi, Nyamuhanga anasĩ ko nyĩbanzĩre.
12Nĩkwa ebyo ngakola, byo ngandisyakola, inatoka erĩkakĩrya abandi bakwenda abo eribana omwanya wʼeriyihalamba, nʼerĩbũga bati, bakakola ngoko ĩtwe tukakola. 13Abandu abo ni bakwenda bʼamabehĩ abakateba, bakayĩsosekanaya ngʼabakwenda ba Kristo. 14Oyũ si mwatsi wʼeriswekera, kusangwa Satanĩ nayo ĩkayĩsosekanaya ngʼomũlaĩka wʼekyakakala. 15Neryo si mwatsi akalĩre busana nʼabagombe bayo, bamayĩsosekanĩa ngʼabagombe bʼeritunganene. Nĩkwa oko ndũlĩ basyahembwa ngʼemĩbĩrĩ yabo ko yiri.
Eriagalwa lya Paũlo busana nʼeribya mukwenda
16Kandi ngabũga nyiti, Sihabye mundu Oyukanyiganza ngʼomũkĩrũ. Nĩkwa wamanyiganza utya, neryo ũnyĩkokaye ngʼomũkĩrũ, inatoka eriyihalamba hake. 17Ebyo ngabũga lino sĩndĩbũgabyo ngʼebyʼOmukama, nĩkwa omo mwatsi wʼeriyihalamba ngabũga ngʼomũkĩrũ. 18Nĩkwa kusangwa hali bangi abakayihalamba ngʼabandu bʼekihugo, nage ngandiyihalamba nibya. 19Kusangwa ĩnywe muli bandu bʼamenge, mũkahũlĩkĩrĩraya abakĩrũ nʼobutseme. 20Ĩnywe mũkahũlĩkĩrĩraya omundu oyũkabanũbaya, kutse eribanyega, kutse erĩyĩhamya, kutse abakabaswĩraya omo bũsũ. 21Ngakwa esĩsonĩ kusangwa twabya bandu bolo abatetoka erikola batya.
Nĩkwa omundu amasonda eriyihalamba, ngabũga ngʼomũkĩrũ, nage ngasonda eriyihalamba. 22Nabo ni Baebrania kwehĩ? Nage ko nyine nyitya. Nabo nĩ Baĩsraelĩ kwehĩ? Nage ko nyine nyitya. Nabo ni bana ba Abrahamũ kwehĩ? Nage ko nyine nyitya. 23Nabo ni bagombe ba Kristo kwehĩ? (ngabũga ngʼomũsĩre), Nage ko nyine nyitya kutsibu! Nabirikola kwilababo kutsibu, nabĩrĩhĩrwa omo mũlĩkĩ esyongendo nyingi kwilababo, nabĩrĩswĩrĩbwa ngendo nyingi kwilaba, nabiribya hakũhĩ nʼoluholo ngendo nyingi kwilababo. 24Esyongendo ĩtanu monaswĩrĩbwa esyonyambĩ makũmĩ asatu nʼomwenda. 25Esyongendo ĩsatu monahũnzwa omo myũtso, engendo nguma monaswĩrĩbwa. Esyongendo ĩsatu monasonda erisenda omo bwato, nʼengendo nguma monasiba omo magetsi esyosaa makũmĩ abiri nʼesĩnĩ. 26Nabiribya oko lugendo esyongendo nyingi, omo bwĩko bwʼesyonyũsĩ, omo bwĩko bwʼabarahĩ, omo bwĩko bʼAbayũda bʼewetu, omo bwĩko bwʼEbihanda, omo bwĩko omo mũyĩ, omo bwĩko omo mbwarara, omo bwĩko bwʼengetsi, omo bwĩko bwʼabalĩkyetu bʼamabehĩ. 27Nabya ngakola nʼeribana obũlĩge; ngendo nyingi ĩnĩngakũbato, ĩnĩngakwa enzala nʼenyota, esyongendo nyingi iningabula akalyo, ĩnĩngakwa embeho, nʼeribula esyongimba. 28Kandi butsira eriahula emyatsi eyo misa, ngwite omũbĩrĩ owakalĩre wʼerĩteya amakanĩsa gosĩ. 29Omugulu omundu akabya molo, nage sindibya molo kwehĩ? Omundu amakola ebibi, nage sindiagalĩbawa kwehĩ?
30Lyamabya litolere inayihalamba, ngandiyihalamba omo myatsi eyĩkakangaya obolo bwage. 31Nyamuhanga na Tata wʼOmukama Yesu, erĩna liwe lipipawe kera na kera, iye anasĩ ko ndebiha. 32Omugulu nabya eDamasĩkĩ, omũtabalĩ wʼOmwami Areta mwabya akateya esyongyo syʼomũyĩ, ati akanyihamba. 33Nĩkwa mobanyandagalya omo kitiri omo mwanya wʼolũhĩmbo, neryo monabala ebyala biwe.
ప్రస్తుతం ఎంపిక చేయబడింది:
2 Abanya Korĩnto 11: KB80
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Bible in Kinandi © Bible Society of the Democratic Republic of Congo, and Bible Society of Uganda, 1980.