Arabic, North Levantine Spoken: العامية اللبنانية بالقافية (Portions)

العامية اللبنانية بالقافية

بوحي من الله تعالى، قال النبي إشعيا (عليه السلام)، للمؤمنين المتّجهين عالقدس هالكلام:
"أرض البادية والبريّة رح تفرح،
والفلا رح يحتفل ويتعبّى بالزهور المطرح،
رح تزهِّر بكترة، وتغنّي بقلب فرحان،
وتصير الدني خضرا متل جمال أرز لبنان،
وبهاء جبل الكرمل، وجنوبُه ساحل شاران،
وبيتجلّى جلالُه تعالى والكلّ بشوف عظمة الرحمن.
يا مؤمنين، شدّوا الضعاف بيناتكُن، قوّوها،
والمقطوع قلبُن من الخوف شجعوها،
قولولُن: "ما تخافوا، قوّوا قلبكُن،
ربنا قريب، رح يجازي عدوّكُن،
وينجّيكُن وينصركُن."
ووقتا، رح يرجع النظر للعميان،
ويرجع السمع للطرشان،
وينطّوا العرجان متل الغزلان،
وبصيروا يغنّوا غناني فرح كلّ الخرسان.
وبتتفجَّر الميّ بالبراري،
وبتمشي الأنهار بالصحاري،
وبيتحوّل الجفاف لواحات،
والأرض العطشانة لميّ ونبات.
ومحل سكن الدياب، بينمى القصب والبردى،
وبصير فيه درب جديدة عطول المدى،
تُدعى "طريق الطهارة"،
ما بيمرُق فيها إلّا الطّاهرين،
وبتكون طريق الصّالحين،
وكلّ مين بيمشي عهالدرب ما بتوه ولو كان من الجّاهلين.
هونيك، ما في لا أسد مفترس ولا أي حيوان شرس،
فالطريق سالكة وكلّها أمان،
ما بيمرُق منها إلّا لّي نجّاهُن الرحمن،
هولة الناجيين عالقدس راجعين،
رح يدخلوا عليها وصواتُن عم بترندِح غناني.
وطول العمر وجوهُن رح تضلّ فرحانة،
وبالسعد والرضى قلوبهُن مليانة،
والحزن واليأس منها هربانة.

వినండి من الوحي إلى النبي أشعيا 35