Arabic, North Levantine Spoken: العامية اللبنانية بالقافية (Portions)

العامية اللبنانية بالقافية

أوحى الله سبحانُه للنبي موسى (عليه السلام) وقال: "سماع منيح، إنّي جعلت إلَك سلطة على فرعون، وخلّيت هارون خيَّك
ينطق بإسمَك ويكون وزيرَك.
وإنتَ بتبلغُه كلّ شي بقلَّك.
وهارون بيحكي فرعون وبقلُّه: "أطلِق بني يعقوب من مصر أرضَك."
لكنّي رح خلّيه يتمادى بعنادُه،
وبالرغم رح كتِّر معجزاتي وعجايبي ببلادُه،
ما رح يسمعلكُن، وساعِتها رح أحكُم عمصر بضربات رهيبة.
ورح ضهِّر قومي بني يعقوب. وبقوّة عجيبة،
رح خلِّص بني يعقوب من المصريين.
وهيك رح يعرفوا إنّي أنا الله العليّ العظيم، ربّ العالمين."
واستجابوا لأمر سبحانُه موسى وهارون (عليهم السلام):
وكان موسى إبن تمانين سنة وهارون تلاتة وتمانين لمّا واجهوا فرعون بهالكلام.

أوحى الله للنبي موسى وهارون (عليهم السلام) وقال: "لمّا يطلب منكُن فرعون معجزة عصدق كلامكُن،
اطلوب يا موسى من هارون إنّه يرمي عصايته إدّام فرعون فبتتحوَّل لحيّة."
وهيك راح موسى وهارون لعند فرعون ونفّذوا أمر الله.
ورمى هارون عصاه،
إدّام فرعون وحاشيتُه. فتحوّلت لحيّة. وقام نادى فرعون لكلّ سَحرة مصر والمنجّمين،
وعملوا ذات الشّي بسِحْرُن المُبين.
كلّ واحد فيهُن رمى عصايتُه وتحوّلت العُصي لثعابين،
ولكّن عصا هارون بلعِت كلّ العصي التانيين.
ومع هيك ضلّ فرعون سايِق بالعناد،
متل ما سبق وأوحى ربّ العباد،
وما اهتمّ لكلام
موسى وهارون (عليهم السلام).

أوحى الله سبحانُه للنبي موسى (عليه السلام) وقال: "فرعون عنيد مش عم بتوب.
رافِض يطلُق قومي بني يعقوب.
وإنتَ وبإيدَك العصاية الّي تحوّلت لحيّة.
روح لعندْ فرعون الصبح نْطُرُه عالضفّة شويّة،
وهوّ نازِل عالنّيل. قلُّه: "الله ربّ بني يعقوب، أرسلني لعندَك تيقلَّك: "تطلُق قومي حتّى يعبِدني بالبريّة،
ولكنّ لحدّ هلّأ ما سمعتلُه ورفضت كلّ هالخبريّة.
بس بالمعجزة الجاية رح تعرِف الله من هوِّ.
وإنّه عندُه القوّة.
رح تشوف رح أضرُب بالعصاية الّي بإيدي ميّة النيل فبتتحوَّل لدمّ.
وبموت السّمك والميّ بِتْخِمّ،
وما بقى بيقدروا المصريين يشربوا من النهر."

وبعدين أمر تعالى النبي موسى (عليه السلام) وقال: "قول لهارون: "خود عصايتَك ومدّ إيدَك عكلّ مَيّة مصر،
عأنهارُن وسواقيُن وبِرَكُن، وكلّ مكان بتتجمّع فيه الميّ، حتّى خوابير الخشب والحجر."
وهيك عمل موسى وهارون (عليهم السلام) متل ما أمر رب العالمين.
رفع هارون العصا وضرب الميّ عمرأى فرعون والحاشية والباقيين،
فتحوّل النهر لدمّ ومات السّمك وخمِّت الميّ، وما بقى قدروا يشربوا منها المصريين.
وذات الشّي عملوا بسحرُن السحَرة والمنجّمين،
ومع هيك ضلّ فرعون سايِق بالعناد،
متل ما سبق وأوحى ربّ العباد،
وما اهتمّ لكلام
موسى وهارون (عليهم السلام).
وهوّ ومش فارقة مَعُه رجِع فرعون عالقصر.
وحَفَر المصريين تَيفتشوا عميّ حوالي الضفاف، لأنُّه ما بقى تنشرَب ميّة النهر.
وبقيت الحالة سبع تيّام بعد ما ضرب ربّ العالمين النهر.

వినండి قصة النبي موسى - الخروج 7