San Lucas 1

Lhomet tojh tachen

1Nitokw tojh yenchelhi latshonhay wit yomeñhen mañhay n'ajhi tojh Jesús iwuyey tojh iyej lhalhamilh, 2wit lhamilh tojh ifwelhlhi hopehen iñhojh tojh hiw'eneshen Jesús tolhey tojh nech'afwajh iche wit tojh lapesey lhamilh tachemlo Dios Lhomet wit nech'a yikchefwi Jesús lachefwenyajh tojh is. 3Teófilo, ahope hin'u tojh lawefwyajh ihi, n'lham lhoy'a lhip tojh n'lhichefweneshen mañhayna tolhey tojh tachen wit n't'eynlok n'yom is n'tshonhayna tojh n'chen amey tojh yomey mañhay n'ajhi, 4hopkhilak lhoy'a lhip tojh latofwelej mak tojh matche tojh tichefwenn'ajh amej.

Dios lachenek ituyenlo tojh Juan Bautista ihikla

5Fwalas p'ante, tojh Herodes hope niyat tojh ihi judío lhayis kahunhat, iche sacerdote tojh lhey Zacarías, lham tolheshu Abías kawichi, wit lach'efwa tojh lhey Isabel, tolhejlo Aarón hop sacerdote tojh tachen. 6Lhamilh hopehen wichi tojh ische alhuhu wit matche tojh iwuyey nufwu mak tojh Dios t'eynlok iwuyey, wit nem lates inlo Dios. 7Tha Isabel lham hawuhisey che iwulhosa hote lham lhoy'a lach'efwa pajhche hich'ethen.

8Iche p'ante fwala tojh Zacarías ka sacerdote lhayis yiwitlo lawhoy tojh tachema lachemet tojh tolha Dios. 9Molhyej sacerdote lakeyis p'ante, yiwitlo hop Zacarías hopkhilak yihukfwi Dios Law'etch'u tojh T'amajhchet wit hip'u mak tojh lanij akojhche. 10Tojh kamajh hip'u mak tojh lanij akojhche, nufwu wichi tojh iche alhu iwuhen lat'alhyajha. 11Wit ángel tojh Dios chenek lhipoyna hop Zacarías wit takasit ihi lafwumkat hop Dios lakasthaw'et lhip tojh Zacarías ihi tojh hip'u mak tojh lanij akojhche. 12Wit Zacarías hiw'en Dios chenek t'iselitej wit lhoy'a lhip tojh nuwaya. 13Tha Dios chenek ifwenhu Zacarías tojh yuk:

–Yajh nuwayn'uya hoptojh Dios ilotey hat'alhyajh, wit hach'efwa Isabel iwunlalhosa, wit lhenlalheya Juan. 14Wit akojhyajh ihinla wit nitokw tojh akoslawitho tojh nech'a ihikla, 15hoptojh os hopkhila elh tojh wefw tojh ihi tojh Lhawekw tatache, hayohiyej mak tojh tapay, wit Espíritu tojh T'amajhchet ihinla han'ofwajh, tolhey tojh kamajh ihi laku kachuwej. 16Lham tamenhisha nitokw wichi tojh Israel lhayis inech'aynhihichela lahesey wit tapileñhen hop Lawekw Dios. 17Hop Juan tachenlach'uya Lawekw, wit lakopfwayajh lhoy'a lakhajhñhayajh tojh ihisha hop lham molhhisha Dios lhometwu Elías p'ante, hopkhilak yopilwekw no'tshas lhoy'a lhukwey wit wichi tojh kakhantses iwuye mak tojh Dios icheta hopkhilak nufwu lhiwa'lhathen wit tachemlo Lawekw.

18Zacarías tay'otna hop ángel tojh Dios chenek wit yuk:

–¿Ap n'wuye che n't'eynlok kalelhojh mak tojh lafweln'uhu? Hoptojh n'lham n'lhoy'a n'ch'efwa tich'ethen.

19Wit ángel tojh Dios chenek nichelhu tojh yuk:

–N'hope Gabriel, wit n'tchemejlhi hop Dios; lham ichenn'u amey wit t'eynlok n'fwel amhu tolhañhi tojh is. 20Tha athana tojh lakache mak tojh n'fwel amhu, añhi tatoynla wit ha'iwuhisey che lhomlhi pajhlatha wak'alh wit n'ol mak tojh n'fwelne amhu.

21Tojh kamajh wichi ihi alhu inifwlhi hop Zacarías wit lhaty'otnahen hats'iyej yip pajha tojh inepho tojh tolhchefwi Dios Law'etch'u tojh T'amajhchet. 22Tojh pajh inepho tojh tolhchefwi Dios Law'etch'u tojh T'amajhchet, lham hawuhisey che yomlhi; ne lhamilh yihanej tojh lham hiw'en mak tojh tipoyna tojh ikfwine Dios Law'etch'u tojh T'amajhchet wit lham lhañhi tatoy, tojhlhama tojh ichemyenlhi takweyay.

23Zacarías tojh nufw lachemet yopley hop law'et. 24Tojh lach'efwa hich'utshan wit sinku wel'as tojh hayip nehipho tojh ikfwi law'et, wit nitichenlhi, 25"Lhawekw iwuynejn'uye tojha hopkhilak wichi nem yenwetmayechan'u."

Dios lachenek ituyenlo tojh Jesús ihikla

26Tojh yomey seis wel'as tojh hich'utshan, Dios icheney lachenek ángel Gabriel hop lhip tojh lhey Nazaret tojh ihi hunhat tojh Galilea, 27wit lhiptsu iche tsinha lhetsha tojh lhey María; lham ihisha hin'u tojh lhey José, tojh hope niyat David lapiynek elh, 28wit ángel tojh Dios lachenek yihukfwi hep tojh María ikfwi wit yuk:

–¡Lhawekw i'amej hop tojh Dios wefw lakopfwayajh tojh i'amej!

29María t'iseltej tojh ilota lhomettsu wit tay'otshanlhama hat'ehala makpa hope tojh hatsu. 30Hop ángel tojh Dios chenek yuk:

–María, yajh nuway, tojhlhama tojh is che wefw tojh akojhlhilhamej hoptojh Dios lakopfwayajh i'amej. 31Athana han'ofwajh inla amhi wit lawunla'osa, lawunlalheya lheynla Jesús. 32Hop han'ofwajha hopkhila hin'u tojh kalelhojh wit lheynla Dios tojh ikpho Lhos wit Lhawekw Dios yenlaniyata hotewuye lates p'ante David, 33wit lajh lapesa tojh niyatej Dios lakawichi, laniyatyajh hayip ihi chek nufwila.

34María tay'otshana ángel tojh Dios chenek wit yuk:

–¿Ap hotenlak hatsu, ya'tse lajha n'ch'efwaya?

35Wit Dios chenek nichelhu wit yuk:

–Dios laka Espíritu tojh T'amajhchet nomla a'pe wit hote Dios tojh ikpho lakhajhñhayajh wefw tojh inla amej. Hop tojh han'ofwajh tojh ihikla lheynla T'amajhchet wit Dios Lhos. 36Hote a'elh Isabel, tejche hope tsinha tojh hich'et, lhos ihinla; wit iñhojh tohajh yuk Isabel ha'ihi chek lhos ihinla, tha athana ihi seis wel'as tojh hich'utshan. 37Hote Dios haw'enhi mak che athahumma hop lham.

38Wit María nichelhu wit yuk:

–Is, n'hope elh Lhawekw lakwenek wit is che hatsu mak tojh Dios t'eynlok iwuynejn'uye.

Dios chenek ilota tojh María iwuytsu tojh yomlhi, nech'a yik.

María t'isikaye hop Isabel

39Hop fwalas p'ante hatsu María yik nakellhi yihuye hunhat tojh chenhas ihi tojh ihi Judea, 40wit tojh yomey Zacarías law'et yihukfwi wit inokwiyej Isabel. 41Tojh Isabel ilotey María tojh inokwiyej hop lham wit lhosajh tojh ihi lakachuwej iloylhi, ne Espíritu tojh Dios T'amajhchet tapuyej hop lham Isabel. 42Wit t'onpe María wit yuk:

–¡Dios wefw tojh iti amej lakopfwayajh hotehi tsinhay iñhojh, hote wefw lakopfwayajh tojh iyej hop os! 43¿Hat'ep n'hope n'lham che lahun'uya tojh ahopeha N'wekw laku? 44Tojh n'lot ama tojh lawu n'lheya, han'ofwajh tojh ihi n'kachuwej iloylhi wit akojhlhi. 45¡Matche tojh Dios takopfway ama tojh lamatitche mak tojh Lhawekw Dios ifwel amhu!

46María yuk:

"N'hesek iwefwyen Lhawekw.

47N'hesek wefw tojh akojhejlhi Lhawekw Dios tojh hope

N'fwaynthi.

48Hoptojh Dios iyahinn'u,

tojh n'hope lakwenek tojh wetmayekfwajh,

tolhey fwalasna wit lajhi lapesa tojh wichi yomhijlhinan'u

tojh n'hope tsinha tojh Dios lakopfwayajh iyej.

49Hoptojh Dios tojh takhajhay iwuyejn'uye mak tojh wefw,

wit lham lhey Tot'amajhchet.

50Dios mattojh itiyejpej lap'altseyajh elh che hope

tojh inokwiyej hop lham.

51Hin'olit lakhajhñhayajh:

wit itiyej kanhi mañhay tojh wichi lhichojhejwitho.

52Isuyej niyatey tojh lhamha laniyatyajhay

wit iwefwyen iñhojh tojh wetmayekfwas.

53Hiw'enhu iñhojh tojh nicheyhen mak tojh isej

wit itiyej kanhi iñhojh tojh hiw'enhen mayek

wit hahiw'enhihu mak che isej.

54Tach'uta Israel lhayis tojh hopehen Dios lakawus

wit hahip'ethiynlo tojh itiyej hop lhamilh lap'altseyajh.

55Hap'antetsu fwalas tojh pajhche ifwenhumche lhatetselh, tojh hope Abraham wit lapiynhay."

56Ihi tales wel'as tojh María imolheyej Isabel wit tojh lapesey yopley law'et.

Juan Bautista nefwajh iche

57Isabel tojh yomhu lawhoy iwulhosa wit tojh iche hin'ufwajh. 58Wit iñhojh, lhoy'a law'etfwas, tojh yihanej tojh Lhawekw wefw tojh itiyej lhamilh lap'altseyajh, yihuyeñhen yomthilak iwulakojhyajhalhameshen. 59Wit tojh ocho fwalas, yihoney hop han'ofwajh tojh iwutetnechayej tojh toyiset lhu t'ojh lhip, wit t'eynlok yenlheya lafwcha lhey, Zacarías. 60Tha laku yuk:

–Kha. Watlok lhey Juan.

61Lhamilh yuk:

–Ha'ihiche elh akawichi tojh lhey hatsu.

62Wit ne lhamilh ichemyenlhi takweyay tojh tay'otna han'ofwajh lafwcha, t'eynlok lham tojh iwulheya. 63Wit lafwcha t'alha hop hal'o lhip wit itshonhi, "lheynla Juan." Wit nufwu tojh t'iselteshen. 64Wit hop lawhoytsu Zacarías nech'a yomlhi, wit iwutesayej tojh iwunit hop Dios. 65Nufwu hop iñhojh t'iselteshen, wit y'ajhpe Judea kahunhat tachenhas tojh hayomhiye mak elh tojh iche. 66Nufwu tojh ilotey tay'otshanlhamahen wit yuk:

–¿Hat'e mak tojh iwuhiynla han'ofwajha?

Matche tojh Lhawekw hin'oltej lakhajhñhayajh hop lham.

Zacarías iwulatenecha

67Zacarías, hop han'ofwajh lafwcha, Espíritu tojh T'amajhchet tapuyej wit yomejlhi Lhawekw lhomet, wit yuk:

68"¡Nawefwyen Lhawekw hop Israel ka Dios,

is che lakopfwayajh iyej,

hoptojh nom hopkhilak ifwañhat lakawichi!

69Wit ichenn'uyeñhen Lhafwaynthi tojh takhajhay,

tolhejlo lakawu David p'ante.

70Hop tojha mak tojh pajhche p'ante Dios ifwelh,

hop tojh isej Lham lhometwus

tojh t'amajhchetes tojh yenlhometa:

71ifwaynthilanameshen hop lhatayfwas

wit lhoy'a nufwu tojh n'oyen'uhumche,

72Lham hin'olthisha lap'altseyajh lhatetselh

wit nip'ethataynlo lhomet tojh t'amajhchet

tojh iwuyeshey hop lhatetselh p'ante.

73Hop tojha lhomet tojh hit'enhatche

tojh ifwenhu hop Abraham lhates p'ante:

mak tojh yenhilhna hopkhilak

74nemla tonuwaynyajh iyej mak che hope,

natfwayej hop lhatayfwas, wit natchemejlhi hop Lham Dios

75wit is che newej hop Lham,

wit nat'amajhlhameshen wit nawuye mak tojh is alhuhu

nufwu fwalas tojh nehi hunhatna.

76N'fwel amhu, tojh am ahope n'lhos,

eynla Dios tojh ikpho lhometwu,

hoptojh latachenlach'uya Lhawekw wit lawa'lhat hop lan'oñhoy,

77hopkhilak yihantej lakawichi tojh Dios itoyntej hop lasukwyajhay

wit hiw'enhu lafwaynyajh.

78Hoptojh lhaka Dios, wefw lap'altseyajh tojh tamenej,

ichojhn'uyeñhen Elh tojh tolhkapho

hotewuye fwala tojh inepho,

79hopkhilak yihetenpe hop iñhojh tojh lhoy'a lhip tojh ihi hunatajh,

tojh ihi tot'ilek lakampelh

wit yihonn'ukwehen hop n'oyij tojh totamsek ihi".

80Hop han'ofwajh lhaychiñhelit wit Espíritu tojh T'amajhchet ikhajhyen, wit tojh pajh chiñhel wit ihi ts'anis hunhat tojh tamchoy pajhtha nichotey hop fwala tojh lham lhitofwnhatej hop Israel lhayis.

தற்சமயம் தேர்ந்தெடுக்கப்பட்டது:

San Lucas 1: WBNT

சிறப்புக்கூறு

பகிர்

நகல்