लाम्दिक् 1
1
मिस्र लाजेॽओ इस्राइलिहाॽ ताप्फे़ःल्लिक् मे़मे़त्तुसि
1खुन्छिॽ आबाङे हिम्सयङ्हाॽ के़देॽबाआङ् याकुबे़न्नु मिस्र लाजेॽओ के़बेःक्पा इस्राइलरे़ कुस्सा ये़म्बित्छाहाॽरे़ खुन्छि मिङ्हाॽ—
2रुबेन, सिमियोन, ले़बि, यहुदा,
3इस्साखार, जबलुन, बेन्यामिन,
4दान, नप्तालि,
गाद नु आसेर मे़वये़॥
5याकुबरे़ कुमुॽइदाङ्हाॽ के़रे़क्ले़ नुबोङ् मे़वये़॥ खुने़ॽ कुस्सा योसेफे़न् तगिआङ्धोए मिस्रओ वये़॥
6मे़वये़ मे़युङे़ल्ले़ योसेफे़न् कुम्भुॽ कुन्साॽहाॽ नु खे़न् थाःक्कोबाहाॽ के़रे़क् मे़स्ये़॥ 7कर खे़ङ्हाॽरे़ खुनिॽ इस्राइलि मुॽइदाङ्साहाॽरे़ खुन्छिॽ यरिक् साएहाॽ मे़वये़॥ खे़ङ्हाॽ निःप्मा सुक्मे़न्दे़त् यरिक् नु मुक्साम्साबा मे़बोःक्खे़॥ मिस्र लाजेन् के़रे़क् इस्राइलिहाॽरे़ मे़धिम्सु॥
8खे़ब्याङ् मिस्रओ योसेफरे़ कुयाःम्बेओ थेआङ् कुसिङ् मे़न्निःप्मनाबा लत्छा वेॽ हाङ्धिक्ले़ हाङ्युक् चोःक्मा हेःक्तु॥ 9खे़ल्ले़ खुने़ॽ कुमनाहाॽ मे़त्तुसि, “ओमे़त्ते़म्मे़ॽ, कन् इस्राइलिहाॽ साॽरिक् यरिक् नु मुक्साम्साबा मे़बोःक्खे़आङ् मे़वाॽ॥ 10आल्ल आनिॽ कन्हाॽनु निङ्वाःल्ले़ याःम्बक् चोःक्मा पोङ्ॽ, मेःन्ने़भग्र खे़ःङ्हाॽ खानिःत्तो आल्लसाङ् यरिक् मे़बोर मे़बेःक्, हे़क्क्याङ् थङ् पोङ्ङिल्ले़ आनिॽ निङ्मिहाॽनु मे़धुक्सिङ्ङाङ् आनिॽनु थङ् मे़जोक् खे़ब्याङ् लाजेन् मे़ले़रुआङ् मे़बेःक्॥”
11कल्ले़चोगुल्ले़ खे़ङ्हाॽरे़ खुन्छिॽ सम्धाङ् मिस्रबा मना याःम्बक्को के़भम्बा साॽरिक् कुॽइगे़भे़म्बाहाॽ मुरा मे़मे़त्तुसि, खे़ङ्हाॽरे़ खुन्छिॽ साॽरिक् किप्मा के़घुबा नु के़साक्पा याःम्बक् चोःक्मा मे़बाङ्घुसिआङ् खुन्छिॽ निङ्साङ् साक्ख्रिक् पुगे़र मे़याःन्दुसि॥ हाङ् चिगक्वा फुङ्मा युङ्मारे़ लागि इस्राइलिहाॽरे़ पिताम नु रामसेस ये़क्यक्हाॽ मे़जोगु॥ 12कर मिस्रबा मनाहाॽरे़ इस्राइलिहाॽ आक्ख्यारिक् मे़युक्तुसि, खे़म्म्याक्के यरिक् खे़ङ्हाॽरे़ खुनिॽ खानिःत्तिन् पोरे़र पे हे़क्क्याङ् खे़ङ्हाॽ लाजेॽओ आल्लसाङ् यरिक् मे़बोःन्दे़र मे़बे॥ मिस्रिहाॽ खे़ङ्हाॽनु किमा मे़हेःक्ते़॥ 13हे़क्क्याङ् मिस्रिहाॽरे़ इस्राइलिहाॽ लुङ्माॽ मे़न्दुक्सिङ्ङे साॽरिक् ताप्फे़ःम्बा के़साक्पा योःग्बा याःम्बक्को मे़भत्छुसिआङ् इस्राइलिहाॽरे़ खुन्छिॽ हिङ्मे़न् तुक्खेलाक्खेओ मे़धासु मे़बिरुसि॥ 14हिम् चोःक्मा याःम्बक् नु खाम्ले़ ले़ःङ्मा याःम्बक् हे़क्क्याङ् प्याङ्सिओबा के़रे़क् परिक्ले़न् याःम्बक्को मिस्रिहाॽरे़ खे़ङ्हाॽ मे़युःत्तुसिआङ् लुङ्माॽ मे़न्दुक्तुसिन्॥
15खे़ब्याङ् सिप्रा नु पुआ मिङ् के़वाःप्मा ने़त्छि हुक्के़लामा हिब्रु मे़न्छुमाहाॽ मिस्रबा हाङ्ङिल्ले़ मे़त्तुसि॥ 16“हिब्रु मे़न्छुमाहाॽरे़ सा मे़गत्तुसिल्ले़ खे़ङ्हाॽ फाॽमासिरे़ लागि खिनिॽ के़बिगिल्ले़ ये़म्बित्छासा मे़गत्तुसिने़भग्र खे़ङ्हाॽ से़रे़म्सिम्मे़ॽ, कर मे़न्छुमासा मे़गत्तुसिने़भग्र कुहिङ्वे़त् ले़रे़म्सिम्मे़ॽ॥” 17कर खे़न् हुक्के़लामाहाॽ निङ्वाॽफुमाङ्ङिन्नु मे़गिसे़ हे़क्क्याङ् हाङ्ङिल्ले़ मे़त्तुसिबान् मे़ङ्घे़प्सुन्॥ खे़ङ्हाॽरे़ ये़म्बित्छा साहाॽआङ् कुहिङ्वे़त्ते मे़ले़रुसि॥ 18कल्ले़चोगुल्ले़ हाङ्ङिल्ले़ खे़न् ने़त्छि हुक्के़लामाहाॽ उःत्तुसिआङ् सेःन्दोसुसि, “खे़न्छिॽ थे के़जोःक्सुर के़वाॽसि? थेआङ् ये़म्बित्छा साहाॽआङ् कुहिङ्वे़त्ते के़ले़त्छुसिबा?”
19खे़ङ्हाॽरे़ नोगप् पिरे़सु, “हिब्रु मे़न्छुमाहाॽ मिस्रि मे़न्छुमाहाॽ हे़क्के मे़ल्लॽने़न्, खे़ङ्हाॽरे़ कुगत् नुॽर सामे़गत्तुसि, हुक्के़लामाहाॽ के़प्मानुःल्ले़ तगि खे़ङ्हाॽरे़ सामे़गत्तु मे़सुरुसि॥”
20हे़क्क्याङ् निङ्वाॽफुमाङ्ङिल्ले़ हुक्के़लामाहाॽ लुङ्माॽ तुक्तुसिआङ् इस्राइलिहाॽ आल्लसाङ् यरिक् मे़बोःन्दे़र मे़बे हे़क्क्याङ् खे़ङ्हाॽ मुक्साम्साबा मे़बोःक्खे़॥ 21हुक्के़लामाहाॽ निङ्वाॽफुमाङ्ङिन्नु मे़गिसे़बाल्ले़ चोगुल्ले़ खुने़ॽ खे़ङ्हाॽ खुन्छिॽ आबाङे मुॽइदाङ्साहाॽ पिरुसि॥
22खे़ब्याङ् कुनुप्मो फारो हाङ्ङिल्ले़ के़रे़क् कुमनाहाॽ अक्तङ्बा इङ्जाङ् पिरुसि, “हिब्रुहाॽरे़ खारक् सागे़वाःन्छिङ्बा खुन्छिॽ अङे़ःक्वा ये़म्बित्छासाहाॽ निल वहःङ्ङो लाप्फुसाम्से़ॽ कर मे़न्छुमा साहाॽ कुहिङ्वे़त्ते ले़रे़म्सिम्मे़ॽओ॥”
தற்சமயம் தேர்ந்தெடுக்கப்பட்டது:
लाम्दिक् 1: LIF
சிறப்புக்கூறு
நகல்
ஒப்பீடு
பகிர்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2009, 2023, Wycliffe Bible Translators, Inc. All rights reserved.