मत्ती 18
18
स्वर्गटा राज्यालं स्यानटैराई भन्डा घ्योव काङ्का
मर्कुस ९:३३-३७,४२-४८; लुका ९:४६-४८; १७:१-२
1हो बेलाकं येसुलो उसिसरं राडे, “स्वर्ग राज्यालं स्यान्टैराई भन्डा घ्योव काङ्का?” वार्डे येसुलाई यापजोयो। 2येसुये टोबो बाल्खलाई खुल्डे मान्झलं ओसच्यानो, 3होकाम हैओडोवरं, “डस्साज़ ङा जेलाई हैङाडाच्यो, आलिज़ा बाल्खराई यायुङ स्याव जियुङ जेमझैखे भने स्वर्गटा राज्यलं जेमनाडु। 4जो आव आलिज़ा बाल्ख स्यानाव ओल्लाई आलिज़ा झोयो, होज़ स्वर्ग राज्यालं स्यान्टैराई भन्डा घ्योव टानेले। 5जोये ङामिन्ट एटाव टोबो बाल्खलाई चाव ङप्सि होये ङालाई पनि चाव झैसोङो।”
पापलो ओपैचालो बारेलं येसुलो सिछ्या
मर्कुस ९:४२-४८; लुका १७:१-२
6“जोये ङालाई बिस्वास डाने आलिचारंलाम टोबोलाई ङालेवङं राने वोङो, होलाई के ओढेङलं रान्ठै सुर्डे बुडाव समन्डरलं ख्यासिव चाव टानेले।” 7पाप डोव परि:ङ्ने परिछ्याराई यालागिटं आव सङसारलाई बनै घ्योव डुखं ले। ऐटानाव घटनारंके रारंयेज़। हैनि पनि बनै घ्योव डुखं ले नो मीलाई जो लेवङाम नेटाव परिछ्यारं रारं! 8कि नखङ कि नकुइये पाप डोव यापरि:ङसोनोखे भने। होलाई कटंडे ख्या। नेबऱ्याङ नखङ कि नेबऱ्याङ नुकुइसं नर्गलं नाने भन्डाके बुरु लुला लङ्गारा टाडे खर्कज़ माखेम्ने जीबनलं नाने नलागिटं चाव। 9नमिलङये पाप डोव यापरि:ङसोनोखे भने नोलाई हाइडे ख्या। नेबऱ्याङ नमिलंङसं मे:लं नाने भन्डाके काना टाडे खर्कज़ माखेम्ने जीबनलं नाने नलागिटं चाव टाये।
ङोयो भेडालो ओसात्रो
लुका १५:३-७
10होस्यार लेच्यो, जे आव आलिचारंलाम टोबोलाई पनि हेला टाडाच्यो। कडालेकं ङा जेलाई हैङाडाच्यो, स्वर्गटं नोराई याकटंवालरं स्वर्गटा ङाबाबु परमेस्वरलो ओङा:कं एकसप्ड्या लेरंये। 11[कडालेकं मानवालो ओज़ा मा:वरंलाई जोगैनेरं ओराव ची।#18:11 आव बचन ग्रीक बाइबलटं सोनो कुइये सर्सिव कोइ-कोइ कितापटं माले] 12“जे कडि बिचार जेडोज़्या? टोबो मीलो टसय गोटा ओभेडारंलाम टोबो ङोइडे यानाखे भने, होये उनान्सै गोटा भेडालाई रा:डे ङोयो टोबो भेडालाई डान्डा यालं खेम्ने माना डोरो? 13डस्साज़ ङा जेलाई हैङाडाच्यो, हो मीये नो भेडालाई याडोयोखे भने, होका लिज़्याव उनान्सैरं भन्डा हो ङोयो भेडा ओडैकं बनै रेङनेले। 14ऐझैडेज़ स्वर्गटा लिज़्याव जेपरमेस्वर बाबुलो उइछ्या पनि एटावज़ ले, आव आलिज़ारंलाम टोबो पनि टामा:रंकं।”
अपराडिरासं डोने भाइ
लुका १७:३-४
15नभाइये नबिरोडलं अपराड याडोवखे भने, नाडे जिन नेबऱ्याङ याज़ जिलिज़्याकं होलो ओगल्ति सटन्ड्यो। नोये नपाङ याठोयो भने नभाइ नङ नमी टाये।#लुका १७:३ 16होकाम होये नपाङ पनि माठोयोखे भने, नङसं उरु टोबो, नेबऱ्याङ मी लाङडे नान होकाम नेबऱ्याङ सोम्बऱ्याङ मीरं साची टाडे स्यान्टै रो: पक्का गटाकं।#न्याम १९:१५ 17होकाम नभाइये होराई यारो: पनि माठोयोखे भने, मन्डलीलाई हैडो। होये मन्डलीलो ओरो: पनि ठैने माभनखे भने, हो नलागिटं यहुडीरंकाम उरु मीरं सोनो सिरमा डुप्नेरासं बराबरं टाये। 18“डस्साज़, ङा जेलाई हैङाडाच्यो, जे आव प्रिठीबीलं जो जेपो हो स्वर्गटं पोसिने ले। होकाम जे आव प्रिठीबीलं जो जेपंला हो स्वर्गटं पलासिने ले।” 19“फरि ङा जेलाई डस्साका रो: हैङाडाच्यो, प्रिठीबीलं जेलाम नेबऱ्याङ टोबो रो:टं मिलिडे कडि रो:रं जेनि:खे भने, स्वर्गटा लिज़्याव जेबाबु परमेस्वरये जेलाई हो झैड्याने ले, 20कडालेकं जोकं नेबऱ्याङ सोम्बऱ्याङ ङामिन्टाम डुप्सिरं, ङा होरासं लेनेङाले।”
छेमा माडोने नौकरलो ओसात्रो
21पत्रुस येसु लेवकं राडे हैओडोव, “प्रभु, ङाभाइये खा खेप समं ङाबिरोडलं पाप ओडोकं होलाई ङा माफ याने? सात पाला समं?” 22येसुये पत्रुसलाई हैओडोव, “ङा नङलाई हैङाडान, सात पाला माङ्क, सहतर गुना सात खेप।” 23“आव कारनये स्वर्गटा राज्या टोबो राजासं मेडैसिये, जोये ओनौकररासं हिसाब रैने युङ ओडोव। 24होकाम राजाये हिसाब रैने युङ याडोव, होकाम डस हजार तोडा#18:24 टोबो तोडालो ओये: छ हजार डिनार होकाम डसहजार तोडालो ओये: छ करोड डिनार टाये सुन रिन लाङने टोबोलाई ओङा:कं यारोयो। 25होकाम हो मीये रिन ओमफोडुकं साहुये हो मीलाई ओज्या ओज़ारं सोनो ओल्सका लिज़्याव स्यान्टै ओसम्पति येडे उरिन फोने वार्डे हुकुम ओयोव। 26होकाम नो नौकरये उघुन्डा टिकिसिडे हैओवारो, ‘मालिक, ङालाई टिगिडा समय याङ होकाम नरिन फोनेङाले।’ 27होकाम हो साहुये हो नौकरलाई उयुङ नाडे ओरा:व, होकाम उरिन पनि मन ओडोड्योव।” 28“होकामटानि हो नौकर पुलुडे ओनाकं ओनैरंकाम टोबोलाई ओडोयो, होये ओलकाम टसय चान्डीलो ढ्याक रिन लाङडे ओनैज़्याव। ओल के होलाई ओबोङ्कोरा क्योडे नरिन चानो गोफोके वार्डे हैओडोव।” 29“होकाम हो ओनैये फुलुप्सिडे हैओडोव ङालाई टिगिडा समय याङ, ङा नरिन फोडेङायान।” 30होये माभनये, होकाम नाडे होलाई उरिन ओमफोया समं झ्याललं ओझाव। 31ओनै नौकरराई नो र:ङडे बनै यायुङ उहुरो। नो र:ङडे आवरो: यासाहुलाई हैयाडोनाव। 32“होकाम राजाये हो नौकरलाई खुल्डे हैओडोव, ‘ए माचाव नौकर, नङ ङाङा:कं नुघुन्डा टिकिसिडे हैनवार्क नरिन मन ङाडानो। 33ङा नङलाई माफ ङायानो मान्टिव नङ पनि ननैलाई डया डोव मापरि?’ 34होकाम हो राजा रिसिडे हो नौकरलाई ओलाङो रिन ओमफोया समं सजै यानेराई याकुइटं उसुम्पिव। 35जे पनि जेभाइलाई जियुङलामज़ माफ जेमयोखे भने, स्वर्गटा लेने ङाबाबुये पनि जेलाई हैज़ झैनेले।”
Iliyochaguliwa sasa
मत्ती 18: NTWMK25
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The New Testament Books in Wale Magar Kham Language © The Word for the World International and Wale Magar Kham Translation Project, Nepal, 2025
