ଜହନ 9

ଜିସୁ ରଃଅଞ୍ଜି ପ୍ଲିତାୱିଃଆଟେଃଏ କାଡ଼ାଙ୍ଗ୍‌ଗାଟାଞ୍ଜିକି ନେହି କିଅନ୍

1ଜିସୁ ହାଜ୍ଜିଚ୍ଚି ତୁକାତାୱା ପ୍ଲିତାୱିଃଆଟେଃଏ କାଡ଼ାଙ୍ଗ୍‌ଗାଟି ରଃଅଞ୍ଜି କୁଏଞ୍ଜିକି ହୁଡ଼ିତେଞ୍ଜି । 2ଆଟେ ତା ଗ୍ରାମ୍ୱାଗାଟାରି ତାଙ୍ଗେ ୱେଚ୍ଚେରି, “ଏ ଗ୍ରାପାଗାଟାତି, ଏମ୍ୱେ ପାପ କିଆଚ୍ଚେ ଜେ, ଇୱାଞ୍ଜି କାଡ଼ାଙ୍ଗ୍ ଆନାହି ପ୍ଲିଆନ୍ନେଞ୍ଜି ? ତାନୁ ପାପ କିଆଚ୍ଚି ବାଗାଟି କି ତା ଇୟାଆବା ପାପ କିଆଚ୍ଚି ବାଗାଟି ?”

3ଜିସୁ ଏୱାରିକି ୱ୍ଡେପ୍‌ଚ୍ଚି ୱେସ୍ତେଞ୍ଜି, “ଇୱାଞ୍ଜି ଅଟେ ଇୱାଞ୍ଜ୍‌ତି ଇୟାଆବା ପାପ କିଆଚ୍ଚି ବାଗାଟି ଆଃଏ, ମତ୍ର ମୁଲାପେନୁତି କାମା ଇନିମିଡି ଇୱାଞ୍ଜ୍‌ତାୱାଟି ପଙ୍ଗିନେ, ଏଦାବାଗା ଇଦି ଗଟି ଆନ୍ନେ । 4ଦିନା ମାଞ୍ଜି ମାଞ୍ଜି ନାଙ୍ଗେ ପାଣ୍ଡାଞ୍ଜାନ୍ କୁଏଞ୍ଜ୍‌ତି କାମା ମାଙ୍ଗେ କିଅନ୍‌ତିକି ଆନେ; ଇମ୍ୱିନ୍ ତୁକାତାୱା ଏମ୍ୱେ କାମା କିଅନ୍ ମୁଃଏ, ଇହିଙ୍ଗ୍‌ତି ଡାଡ଼ିଙ୍ଗ୍ ୱାଇନେ । 5#ମାତି ୫:୧୪; ଜହ ୮:୧୨ନାନୁ ଏଚ୍ଚେ ଦିନା ଟିକ୍‌ନା ପୁର୍ତିତାୱା ମାଃଇ, ଏଚି ଦିନା ଟିକ୍‌ନା ନାନୁ ପୁର୍ତିତି ଅଲା ।”

6ଇଦା ୱେସାନ୍ ୱିର୍ରାତାୱା ହୁପୁଡ଼୍ ହୁପାନାହି ଏ ହୁପୁଡ଼୍‌ତିଦି ଗେଦ୍ଦେ କିତେଞ୍ଜି, ଆଟେ ଏୱାଞ୍ଜ୍‌ତି ରିଣ୍ଡା କାଡ଼୍‌କାତାୱା ଗେଦ୍ଦେ ମ୍ରାଡ଼ାହିତେଞ୍ଜି । 7ଆଟେ ତାଙ୍ଗେ ୱେସ୍ତେଞ୍ଜି, ହାଲ୍‌ମୁ, ସିଲହ ବାନ୍ଦାତାୱା ନି ମ୍ରୁମ୍ବୁ ନଗ୍‌ମୁ ସିଲହତି ଅର୍ତ ପାଣ୍ଡନି ଏମ୍ୱାଟି ଏୱାଞ୍ଜି ହାଜ୍ଜାନ୍ ନଗ୍‌ଦେଞ୍ଜି ଅଟେ ହୁଡ଼ିତେଞ୍ଜି ।

8ଏଦାବାଗା ହଡ଼୍‌ଗି ଇଡ୍ଡୁତାରି, ଅଟେ ଏମ୍ୱେନାରି ତାଙ୍ଗେ କାହେ ରଃଅଞ୍ଜି ବିକାରି ଇଞ୍ଜାନ୍ ପୁଞ୍ଜାଚ୍ଚେରି, ଏୱାରି ତାଙ୍ଗେ ୱେଚ୍ଚେରି, “ଇୱାଞ୍ଜି ଇନ୍ନା ପାହେରିଃଆ କକ୍‌ଚ୍ଚାନ୍ ବିକ ୱ୍ରିହ୍‌ପେହେଃଲ୍ଲାତେଞ୍ଜି ?” 9ଏମ୍ୱାଟି ଏଚ୍ଚେ ଦାଲ୍ଲା ୱେସ୍ତେରି, “ହାଁ ଇୱାଞ୍ଜି ଏୱାଞ୍ଜେଃଏ” ଆଟେ ତୁଲ୍ଲେତାରି ୱେସ୍ତେରି, “ବାଃଏ ଇୱାଞ୍ଜି ତା ଡେହେଙ୍ଗ୍ ତଞ୍ଜେନ୍ନାଞ୍ଜି ।”

ମତ୍ର ଏୱାଞ୍ଜି ୱେସ୍ତେଞ୍ଜି, “ନାନୁ ଏୱାଞ୍ଜ୍‌ତାନୁନେଃଏ ।”

10ଏମ୍ୱାଟି ଏୱାରି ତାଙ୍ଗେ ୱେଚ୍ଚେରି, “ଏହେଙ୍ଗ୍ ଆତେସି ନିନୁ ଇନିମିଡି ହୁଡ଼ନ୍ ମୁପିଞ୍ଜି ?” 11ଏୱାଞ୍ଜି ଏୱାରିକି ୱ୍ଡେପ୍‌ଚ୍ଚି ୱେସ୍ତେଞ୍ଜି, “ଇନ୍ଦାରିକି ଜିସୁ ଇଞ୍ଜିନ୍ନେରି, ଏୱାଞ୍ଜି ଗେଦ୍ଦେ କ୍ଡାଚ୍ଚାନ୍ ନା କାଡ଼୍‌କାନାୱା କାହାନାହି ନାଙ୍ଗେ ୱେସ୍ତାତେଞ୍ଜି, ହାଲ୍‌ମୁ, ସିଲହ ବାନ୍ଦାତାୱା ନି ମ୍ରୁମ୍ବୁ ନଗ୍‌ମୁ; ଏମ୍ୱାଟି ନାନୁ ହାଜ୍ଜାନ୍ ନଗ୍‌ଦେଏ ଅଟେ ହୁଡ଼ନ୍ ମୁତେଏ ।” 12ଏୱାରି ତାଙ୍ଗେ ୱେଚ୍ଚେରି, “ଏୱାଞ୍ଜି ଇମ୍ୱିନାଞ୍ଜି ?”

ଏୱାଞ୍ଜି ୱେସ୍ତେଞ୍ଜି, “ନାନୁ ପୁଞ୍ଜାହେଃଲ୍ଲାନୁ ।”

ପାରୁସିଙ୍ଗ୍ କାଡ଼ାଙ୍ଗ୍‌ଗାଟାଞ୍ଜି ନେହିଆଅନ୍‌ତି କୁଲାଟି ଦାହ୍‌ପନି

13ଏମ୍ୱେନାଞ୍ଜି କାହେ କାଡ଼ାଙ୍ଗ୍ ଆନ୍ ମାଚ୍ଚେଞ୍ଜି, ଏୱାଞ୍ଜିକି ଦାଲ୍ଲା ପାରୁସିଙ୍ଗ୍ ଟାକ୍କେ ତାଚ୍ଚିୱାତେରି । 14ଜିସୁ ଇମ୍ୱିନ୍ ଦିନା ଗେଦ୍ଦେ ମ୍ରାଡ଼ାନ୍ ତା କାଡ଼୍‌କା ୱ୍ରିକ୍‌ଚ୍ଚା ହିଆଚ୍ଚେଞ୍ଜି, ଏ ଦିନା ୱାହୁଜାମ୍ବା ୱାରା ମାଚ୍ଚେ । 15ଇଦାବାଗା ଏୱାଞ୍ଜି ଇନିସ୍ ହୁଡ଼ନ୍ ମୁତେଞ୍ଜି, ଇଦା ପାରୁସିଙ୍ଗ୍ ୱାଡ଼େ ଆଟେ ତାଙ୍ଗେ ୱେଚ୍ଚେରି, ଏମ୍ବାଟି ଏୱାଞ୍ଜି ଏୱାରିକି ୱେସ୍ତେଞ୍ଜି, “ଏୱାଞ୍ଜି ନା କାଡ଼୍‌କାତାୱା ଗେଦ୍ଦେ ମ୍ରାଡ଼ାହିଆତେଞ୍ଜି, ଡେଗ୍ଗା ନାନୁ ନଗ୍‌ଦେଏ ଅଟେ ହାଦାଡ଼ି ହୁଡ଼ନ୍ ମୁପିମାଃଇ ।” 16ଏମ୍ବାଟି ପାରୁସିଙ୍ଗ୍‌ତାୱାଟି ତୁଲ୍ଲେତାରି ୱେସ୍ତେରି, “ଏୱାଞ୍ଜି ମୁଲାପେନୁତାୱାଟି ୱାହେଃଲ୍ଲେଞ୍ଜି, ଇନାକି ଏୱାଞ୍ଜି ୱାହୁଜାମ୍ବା ୱାରା ପାଲ୍‌ନି ଆଏହେଃଲ୍ଲେଞ୍ଜି ।” ଆଟେ ତୁଲ୍ଲେତାରି ୱେସ୍ତେରି, “ପାପିଗାଟାଞ୍ଜି ଇନିସ୍ ଇହିଙ୍ଗ୍‌ତି ଆକ୍କାବାଡ଼ାଙ୍ଗ୍‌ତି କାମା ହାବେ କିଅନ୍ ମୁନେଞ୍ଜି ?” ଇହିଙ୍ଗିସି ତାରୁ ତାରୁ କାତା ଆତେରି । 17ଏଦାବାଗା ଏୱାରି ଆଟେ ରଲି ଏ କାଡ଼ାଙ୍ଗ୍‌ଗାଟାଞ୍ଜିକି ୱେଚ୍ଚେରି, “ଏମ୍ୱେନାଞ୍ଜି ନି କାନ୍ନୁ ହୁଡ଼ିକିଆତେଞ୍ଜି ତା କୁଲାଟି ନିନୁ ଇନ୍ନା ୱେସ୍‌ପିଞ୍ଜି ?” ଏମ୍ୱାଟି ଏୱାଞ୍ଜି ୱେସ୍ତେଞ୍ଜି, “ଏୱାଞ୍ଜି ରଃଅଞ୍ଜି ବାବବାଦି ।”

18ଏୱାଞ୍ଜି ନିଜ୍ଜାନେଃଏ କାଡ଼ାଙ୍ଗ୍ ଆନ୍ ମାଚ୍ଚେଞ୍ଜି ଅଟେ ହାଦାଡ଼ି ହୁଡ଼ନ୍ ମୁପିନ୍ନେଞ୍ଜି ଇଞ୍ଜାନ୍ ଇ କାତା ତା ଆବାଇୟାନିକି ଆର୍‌ଚାନ୍ ୱେଃନାନ୍ ଟିକ୍‌ନା ଜିହୁଦିଙ୍ଗ୍ ଏ କୁଲାଟି ମାଞ୍ଜାଡ଼ି କିଅନ୍ ବାଗା ଇଚ୍ଚା କିହେଃଲ୍ଲାତେରି । 19ଏଦାକି ଜିହୁଦିଙ୍ଗ୍ ତା ଇୟାଆବାନିକି ୱେଚ୍ଚେରି, “ଇମ୍ୱିନ୍ ମ୍ରିଃଏଞ୍ଜି କାଡ଼ାଙ୍ଗ୍ ଆନ୍ ପ୍ଲିଆଚ୍ଚେଞ୍ଜି; ଇୱାଞ୍ଜି ଇନ୍ନା ମି ଏ ମ୍ରିଃଏଞ୍ଜି ? ଏହେଙ୍ଗ୍ ଆତେସି ଏୱାଞ୍ଜି ହାଦାଡ଼ି ଇନିସ୍ ହୁଡ଼ନ୍ ମୁପିନ୍ନେଞ୍ଜି ?”

20ଏମ୍ବାଟି ଏୱାଞ୍ଜ୍‌ତି ଇୟାଆବା ୱ୍ଡେପ୍‌ଚ୍ଚି ୱେସ୍ତେରି, “ଇୱାଞ୍ଜି କାଡ଼ାଙ୍ଗ୍ ଆନ୍ ପ୍ଲିଆଚ୍ଚି ମା ମ୍ରିଃଏଞ୍ଜି, ଇଦା ମାମୁ ପୁଞ୍ଜାନ୍ନାମୁ; 21ମତ୍ର ଏୱାଞ୍ଜି ଇନିସ୍ ହୁଡ଼ନ୍ ମୁପିନ୍ନେଞ୍ଜି, ଏଦା ମାମୁ ପୁଞ୍ଜାହେଃଲ୍ଲାମୁ, ଆଟେ ଏମ୍ୱେନାଞ୍ଜି ତା କାଡ଼୍‌କା ନେହି କିଆନ୍ନେଞ୍ଜି, ଏଦା ୱାଡ଼େ ମାମୁ ପୁଞ୍ଜାହେଃଲ୍ଲାମୁ; ତାଙ୍ଗେ ୱେଞ୍ଜୁ, ଏୱାଞ୍ଜି ତ ପୁନ୍‌ବନ୍‌ତାଞ୍ଜି ଆନ୍ନେଞ୍ଜି, ଏୱାଞ୍ଜି ତା କାତା ତାନୁ ୱେସ୍ତାନେଞ୍ଜି ।” 22ତା ଇୟାଆବା ଜିହୁଦିଙ୍ଗ୍‌ତି ଗାମିନାରିନିକି ଆଜ୍ଜେଚ୍ଚି ବାଗା ଇ ହାବେତ୍ କାତା ୱେସ୍ତେରି, ଇନାକି ଜଦି ଏମ୍ବେନାରି ତାଙ୍ଗେ କ୍ରିସ୍ଟ ଇଞ୍ଜାନ୍ ସ୍ୱିକାର କିନେରି, ତାଙ୍ଗେ ହାଜା ଇଡ୍ଡୁତାୱାଟି ରେପ୍‌ନେରି ଇଞ୍ଜାନ୍ କାହେନେଃଏ ଜିହୁଦିଙ୍ଗ୍ ର ମତ ଆଚ୍ଚେରି । 23ଏଦାବାଗା ତା ଇୟାଆବା ୱେସ୍ତେରି, “ଏୱାଞ୍ଜ୍ ତ ପୁନ୍‌ବନ୍‌ତାଞ୍ଜି ଆନ୍ନେଞ୍ଜି, ତାଙ୍ଗେ ୱେଞ୍ଜୁ ।”

24ଏମ୍ବାଟି ଏ କାଡ଼ାଙ୍ଗ୍‌ଗାଟାଞ୍ଜିକି ରିହିକ୍ ଆର୍‌ଚାନ୍ ୱେଚ୍ଚେରି, “ମୁଲାପେନୁନିକି ଗଉରବ ହିମୁ, ଏ କୁଏଞ୍ଜି ପାପିଗାଟାଞ୍ଜି ଇଦା ମାମୁ ପୁଞ୍ଜିନ୍ନାମୁ ।” 25ଏମ୍ବାଟି ଏୱାଞ୍ଜି ୱ୍ଡେପ୍‌ଚ୍ଚି ୱେସ୍ତେଞ୍ଜି, “ଏୱାଞ୍ଜି ପାପିଗାଟାଞ୍ଜି କି ଆଃଏ, ଏଦା ନାନୁ ପୁଞ୍ଜାହେଃଲ୍ଲାନୁ; ୱାର୍ରି ଇଦା ପୁଞ୍ଜିମାଃଇ, ନାନୁ କାଡ଼ାଙ୍ଗ୍ ଆନ୍ ମାଚ୍ଚେ, ମତ୍ର ହାଦାଡ଼ି ହୁଡ଼ନ୍ ମୁପିମାଃଇ ।” 26ଏଦାବାଗା ଏୱାରି ତାଙ୍ଗେ ୱେସ୍ତେରି, “ଏୱାଞ୍ଜ୍ ନିଙ୍ଗେ ଇନ୍ନା କିଆତେଞ୍ଜି ? ଏୱାଞ୍ଜି ଇନିମିଡି ନି କାଡ଼୍‌କା ୱ୍ରିକ୍‌ଚ୍ଚା ହିଆତେଞ୍ଜି ?” 27ଏମ୍ବାଟି ଏୱାଞ୍ଜି ଏୱାରିକି ୱ୍ଡେପ୍‌ଚ୍ଚି ୱେସ୍ତେଞ୍ଜି, “ନାନୁ ୱେସ୍ତାତେଃଏ, ମତ୍ର ମିରୁ ୱେଃନାତେରି; ଇନାବାଗା ଆଟେ ରଲି ୱେନ୍‌ବନ୍ ବାଗା ଇଚ୍ଚା କିଞ୍ଜେରି ? ମିରୁ ୱାଡ଼େ ଇନ୍ନା ତା ଗ୍ରାମ୍ୱାଗାଟାର୍ ଆଅନ୍ ଇଚ୍ଚା କିଞ୍ଜେରିମା ?”

28ଏମ୍ବାଟି ଏୱାରି ତାଙ୍ଗେ ୱ୍ଲିଚାନାହି ୱେସ୍ତେରି, “ନିନୁ ଏୱାଞ୍ଜ୍‌ତି ଗ୍ରାମ୍ୱାଗାଟାତାତି, ମତ୍ର ମାମୁ ମସାତି ଗ୍ରାମ୍ବାଗାଟାମୁ । 29ମାମୁ ପୁଞ୍ଜିନ୍ନାମୁ ଜେ, ମୁଲାପେନୁ ମସାନିକି କାତା ୱେସାନ୍ନେଞ୍ଜି, ମତ୍ର ଇ କୁଏଞ୍ଜି ଇମ୍ୱିନାୱାଟି ୱାନ୍ନେଞ୍ଜି, ଏଦା ମାମୁ ପୁଞ୍ଜାହେଃଲ୍ଲାମୁ ।” 30ଏୱାଞ୍ଜି ଏୱାରିକି ୱ୍ଡେପ୍‌ଚ୍ଚି ୱେସ୍ତେଞ୍ଜି, “ନା କାଡ଼୍‌କା ୱ୍ରିକ୍‌ଚ୍ଚା ହିଆତେଞ୍ଜି, ମତ୍ର ଏୱାଞ୍ଜି ଇମ୍ୱିନାୱାଟି ୱାନ୍ନେଞ୍ଜି ମିରୁ ପୁଞ୍ଜାହେଃଲ୍ଲେରି, ଇଦି ଆଇନେ ଆକ୍କାବାଡ଼ାଙ୍ଗ୍‌ତି କାତା । 31ମୁଲାପେନୁ ଜେ ପାପିଗାଟାର୍‌ତି କାତା ୱେଞ୍ଜେହେଃଲ୍ଲେଞ୍ଜି, ଇଦା ମାରୁ ପୁଞ୍ଜିନ୍ନା, ମତ୍ର ଜଦି ଏମ୍ବେନାଞ୍ଜି ମୁଲାପେନୁତି ବକ୍ତ ଆନ୍ ତା ଇଚ୍ଚା ପାଲ୍‌ନି ଆଇନ୍ନେଞ୍ଜି, ଇଚ୍ଚେସି ମୁଲାପେନୁ ତା କାତା ୱେଞ୍ଜିନ୍ନେଞ୍ଜି । 32ପୁର୍ତି ମ୍ରାନ୍ଦନ୍‌ତି କାହେଟେଃଏ ଏମ୍ୱେନାଞ୍ଜି ରଃଅଞ୍ଜି କାଡ଼ାଙ୍ଗ୍ ଆନ୍ ପ୍ଲିଆନ୍ନାଞ୍ଜିକି ନେହି କିଅନ୍‌ତି କାତା, ଏଚ୍ଚେକ୍‌ୱାଡ଼େ ୱେନ୍‌ବନ୍ ଆହେଃଲ୍ଲାତେ । 33ମୁଲାପେନୁତାୱାଟି ୱାହେଃଲ୍ଲାତେସି ଏୱାଞ୍ଜି ଇନ୍ନା କିଅନ୍ ମୁଃଏଞ୍ଜ୍‌ମା ।” 34ଏୱାରି ତାଙ୍ଗେ ୱ୍ଡେପ୍‌ଚ୍ଚି ୱେସ୍ତେରି, “ନିନୁ ତ ପାପଟି ପ୍ଲିଆଞ୍ଜି, ଆଟେ ନିନୁ ମାଙ୍ଗେ ଇନ୍ନା ଗ୍ରାପେଞ୍ଜାଦି ?” ଏମ୍ବାଟି ଏୱାରି ତାଙ୍ଗେ କାଟ ହପ୍‌ତେରି ।

ଆତ୍ମିକ କାଡ଼ାଙ୍ଗ୍

35ଏୱାରି ତାଙ୍ଗେ ହପ୍‌ଚ୍ଚାନ୍ନେରି ଇଞ୍ଜାନ୍ ପୁଞ୍ଜାନାହି, ଜିସୁ ତାଙ୍ଗେ ପୁଁଣ୍ଡାନ୍ ୱେସ୍ତେଞ୍ଜି, “ନିନୁ ଇନ୍ନା କୁଏଞ୍ଜି ମ୍ରିଃଏଞ୍ଜିକି ମାଞ୍ଜାଡ଼ି କିଞ୍ଜିମା ?” 36ଏୱାଞ୍ଜି ୱ୍ଡେପ୍‌ଚ୍ଚି ୱେସ୍ତେଞ୍ଜି, “ଏ ଆଗ୍ୟାଁ, ଏୱାଞ୍ଜି ଏମ୍ୱେନାଞ୍ଜି ? ନାଙ୍ଗେ ୱେସ୍ତାମୁ, ଇନିସ୍‌କି ନାନୁ ତାଙ୍ଗେ ମାଞ୍ଜାଡ଼ି କିଃଇ ।”

37ଜିସୁ ତାଙ୍ଗେ ୱେସ୍ତେଞ୍ଜି, “ନିନୁ ତାଙ୍ଗେ ହୁଡ଼ାଞ୍ଜି, ଆଟେ ଏମ୍ୱେନାଞ୍ଜି ନି ଡ଼ାହି କାତା ଆଇଞ୍ଜାନେଞ୍ଜି, ଇୱାଞ୍ଜେଃଏ ଏୱାଞ୍ଜି ।”

38ଏମ୍ବାଟି ଏୱାଞ୍ଜି ୱେସ୍ତେଞ୍ଜି, “ଦାର୍ମୁ, ନାନୁ ମାଞ୍ଜାଡ଼ି କିମାଃଇ ଇଞ୍ଜାନ୍ ଏୱାଞ୍ଜି ତାଙ୍ଗେ ମେଣ୍ଡାଙ୍ଗୁତାନ୍ ଜୁହାରି କିତେଞ୍ଜି ।”

39ଆଟେ ଜିସୁ ୱେସ୍ତେଞ୍ଜି, “ହୁଃଡ଼ାନାରି ଇନିସ୍ ହୁଡ଼ିନେରି ଅଟେ ହୁଡ଼େନ୍ନାରି ଇନିସ୍ କାଡ଼ାଙ୍ଗ୍ ଆନେରି, ଇ ବିଚାର ବାଗା ନାନୁ ପୁର୍ତିଇନ୍ଦା ୱାମାଃଇ ।”

40ପାରୁସିଙ୍ଗ୍‌ତାୱାଟି ଏମ୍ବେନାରି ତା ଡ଼ାହି ମାଚ୍ଚେରି, ଏୱାରି ଇଦା ୱେଞ୍ଜାନ୍ ତାଙ୍ଗେ ୱେଚ୍ଚେରି, “ମାମୁ ୱାଡ଼େ ଇନ୍ନା କାଡ଼ାଙ୍ଗ୍‌ଗାଟାମୁ ?”

41ଜିସୁ ଏୱାରିକି ୱ୍ଡେପ୍‌ଚ୍ଚି ୱେସ୍ତେଞ୍ଜି, ଜଦି ମିରୁ କାଡ଼ାଙ୍ଗ୍ ଆଞ୍ଜେର୍‌ମା ଇଚ୍ଚେସି ମିରୁ ପାପ କାମା କିଃଏର୍‌ମା, ମତ୍ର ମାମୁ ହୁଡ଼େନ୍ନାମୁ ଇଞ୍ଜାନ୍ ୱେସ୍‌ପିନ୍ନି ବାଗାଟି ପାପତାୱା ମାଞ୍ଜିଞ୍ଜେରି ।

Iliyochaguliwa sasa

ଜହନ 9: DWK

Kuonyesha

Shirikisha

Nakili