PAU-PAUWANNA SIKONJO SURO-SURO 1
1
Nyaha Tangkasa risapattaang
1:1-5
1 #
Luk. 1:1-4
Oe Teofilus, lalang ri kitta' bungasa injo kuukiri risesena nulageokang na nulapangajarang Isa, 2sa'genna ri allo tarangka'Na mange ri Suruga. Rigelenapa injo Ia maeng lapabattui passuroanNa ri Nyaha Tangkasa mange risikonjo suro lajo'jo' injo. 3Mange ri iyai Ia maeng lapappijanjangangi kalenNa sungka'i a'maemmo kasissaanNa, na surangang lohe pole tanra lapappijanjangang ma'nassana Ia attallasai muliang. Saba' patampulo allo sallona Ia akkuling-kulingi lapappijanjangang kalenNa na a'bisarai mange ri iyai risesena Pakkaraengang Allataala.
4 #
Luk. 24:49
Rie' se're allo rihattunna nganrei surangang Ia, Ia lapisangkai ngase'i labokoi Yerusalem, na lasuro ngase'i ammari ri injo attajang sapattana Amma – anteekamua ripappauNa – ”maeng mulangngere injo battu ri Nakke. 5#Mat. 3:11; Mark. 1:8; Luk. 3:16; Yah. 1:33Saba' Yahya ere jua lapario, mingka gelemu lasallo kau laririo ri Nyaha Tangkasa.”
Isa tarangka' mange ri suruga
1:6-11
6Jari rihattu asse'reinna, akkuta'nangimu mange ri Ia, ”Karaeng, a'ra' juaKi rikonni-konnina appaenteng poleang pakkaraengang ri Israele?” 7PappihalinNa ri iyai, ”Kau gele parallu muisse' allo na hattu latantuang injo Amma assituru' kahasaNa. 8#Mat. 28:19; Mark. 16:15; Luk. 24:47-48Mingka lanarimaiko kahasa ampa ladongkokimoko Nyaha Tangkasa, na laa'jariko sa'biKu ri Yerusalem na risibatu Yudea na Samaria na sa'genna battu riappa'na lino inni.”
9 #
Mark. 16:19; Luk. 24:50-51 Rimaenna Ia appau appakonjo, Ia tarangka'mu mange ri suruga na lasa'bii ngase'i, na lalenguki rammang battu ripanjanjannai. 10Sungka'i ammonga ngase' nai' ri langi' rihattunna Ia nai', sikalinna rie' rua tau ammenteng makeang pute riampi'nai, 11na lakua mange ri iyai, ”Oe tau Galilea, ngura ammentengiko ammonga nai' ri langi'?” Isa inni, ”Tutarangka' injo mange ri suruga labokoiko, larie'i muliang mae assimpole mujanjanna Ia nai' ri suruga.”
Sikonjo suro attajang-tajangi
1:12-14
12Jari muliammu sikonjo suro mange ri Yerusalem battu ri se're bonto nuriare' Bonto Zaitun, derena injo larie'i sijaang rilingkai battu ri Yerusalem. 13#Mat. 10:2-4; Mark. 3:16-19; Luk. 6:14-16Sungka'i antamakimo ri kota injo, nai' ngase'i ri tanggaruma ri tampa' pamminsanboanna. Iamo intu Petrus na Yahya, Yakobus na Andreas, Filipus na Tomas, Bartolomeus na Matius, Yakobus ana'na Alfeus na Simon tau Zelot injo na Yudas ana'na Yakobus. 14Ngase'iai tulusu too' na aju'lu ati lalang ripangera dowaang, surang pole rie' sikura bahine na Maria, idonna Isa na urang siana'na Isa.
Matias rijo'jo' lasambeangi Yudas
1:15-26
15Rie' se're allo ammentengi Petrus ri tangngana urang siana' julu katappakang rieki injo asse're, barang larie'i sibilangang ruampulo tau lohena, ampai appau, 16”Oe urang siana', pauna Kitta' Tangkasa inni parallui ripa'rupa nulapabattu la'bi riolo injo Nyaha Tangkasa lapattetei babana Daud risesena Yudas, ponggahana risikuanna tau lajakkali injo Isa. 17Riolo Yudas antama'i sala se'renna battu ri kambe na ngallei dahuang lalang ripanjampangi inni.” 18#Mat. 27:3-8Yudas inni maeng nguppamu dahuang siteppo' tana battu risahala sipa' daana, maeng injo ia tattopai, na bissa'rua pomponna jari ansulu' ngase'mu assi pomponna. 19Passala injo laisse' ngase'i tau ri Yerusalem, jari tana injo laarekimu ”Hakal-Dama”, battuanna Tana Rara. 20#Mzm. 69:26, 109:8”Saba' rie' ta'ukiri lalang ri Kitta' Zaburu:
Lappasammu mange pammarianna a'jari sino,
na lappasammu mange gele rie' tau ammari ri injo,
na: Lappasammu mange pattolonganna laalle tau maraeng.
21Jari, parallui ritambai ri kambe sitau battu ri iangase'na tau sanging rie' injo asse're-se're na assurang-surangkang rihattunna juapa Karaeng Isa rie' ri kambe, 22#Mat. 3:16; Mark. 1:9, 16:19; Luk. 3:21, 24:51iamo intu pakaramula rihattu anriona Yahya sa'genna allo ritarangka'na Isa mange ri suruga labokoi ngase'kang, laassurangkang aj'ari sa'bi risesena pattallasa'Na muliang.”
23Jari rie'mo rua tau latappu'i: Yusuf turiareng injo Barsabas na riarengi pole Yustus na Matias. 24Ngera dowaang ngase'mu na lakua, ”O Karaeng, Ditte Riisse'i atina sikonjo rupatau inni, jari ripijanjangiangkang inaiang rijo'jo' ri tau rua inni, 25lanarima jamaang pajampangi, iamo intu jamaang nulabokoi injo Yudas tua'lampa injo mange ri tampa' nusiratang injo ri ia.” 26Jari lagossangimu arenna tau rua injo na Matiasmo nai' arenna na ri appakonjona ia ripatambai mange ri suro-suro sampulo se're injo.
Iliyochaguliwa sasa
PAU-PAUWANNA SIKONJO SURO-SURO 1: LAI_SLY
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
@LAI 2012 Indonesian Bible Society (Lembaga Alkitab Indonesia)
