Ku̱lu̱gha 16
16
Maanu na nkwali
1Ki̱bbu̱la kyona kya Banai̱saaleeli̱ kyalu̱gha Eli̱mu̱ kandi kyaki̱dha mu elungu lya Si̱i̱ni̱, haagati ya Eli̱mu̱ na Si̱naai̱, haa kilo kyʼeku̱mi̱ na bitaano kya kweli̱ kwakabili haanu̱ma ya ku̱lu̱gha mu nsi ya Mi̱si̱li̱. 2Obu baabaagha banali mu elungu eli, ki̱bbu̱la kya Banai̱saaleeli̱ kyona kyatongana na Musa na Alooni̱. 3Banai̱saaleeli̱ aba baabaghila bati, “Twekumbulagha hakili nguli Mukama aatwitiiye mu nsi ya Mi̱si̱li̱, nanga eghi twasitamagha tuliya nyama sikani̱ye na byokuliya kandi tuukuta. Bhaatu mwaleeti̱ye mu elungu lini ki̱bbu̱la kini kyona ku̱twi̱ti̱ya njala.”
4 Mukama aaghila Musa ati, “Nkuleka byokuliya bya mbaghani̱ja bilaghalike hansi ku̱lu̱gha mu mwanya nga mbu̱la. Bantu aba bali na kutuwa kandi kukumaani̱ya ebikubamala kilo eki kyonkaha. Eki kikuleka nimanye bakaakuba mbahu̱ti̱ya kilaghilo kyanje kedha bbaa. 5Kilo kyamukaagha bu̱li̱ wi̱i̱ki̱, obu balabaagha mbakumaani̱ya byokuliya, bakumaani̱yaghe milundi ebili nga bya bu̱li̱ kilo.”
6Musa na Alooni̱ baaghambila Banai̱saaleeli̱ boona bati, “Obwalo lwagholo mukumanya ngoku Mukama aaniiye aabaahi̱ye mu nsi ya Mi̱si̱li̱ 7kandi nkyambisi mukubona ngoku Mukama ali na ki̱ti̱i̱ni̱sa, nanga aaghu̱u̱ye ngoku mukwete kutongana naye. Buuye ni̱i̱tu̱we baki enu̱we kutongana naatu?” 8Musa aatodha aabaghila ati, “Lwagholo Mukama alabahaagha nyama sya kuliya kandi nkyambisi byokuliya ebi mukuliya kandi muukute, nanga aaghu̱u̱ye ngoku mukwete kutongana naye. Obu mukwete kutongana naatu, majima niibuwo mwatongana na Mukama.”
9Niibuwo Musa aaghi̱li̱ye Alooni̱ ati, “Oghambile ki̱bbu̱la kyona kya Banai̱saaleeli̱ oti, ‘Mwise mu maaso ghaa Mukama, nanga aaghu̱u̱ye ngoku mukwete kutongana.’ ”
10Alooni̱ naanabu̱gha na ki̱bbu̱la kya Banai̱saaleeli̱, baalola mu elungu kandi baabona ku̱bbeni̱ya kwa ki̱ti̱i̱ni̱sa kya Mukama mu kicu.
11 Mukama aaghila Musa ati, 12“Naaghu̱u̱ye ngoku Banai̱saaleeli̱ bakwete kutongana. Obaghile oti, ‘Bu̱li̱ lwagholo balaliyaagha nyama kandi bu̱li̱ nkyambisi baliyaghe byokuliya kandi baakute. Du̱mbi̱ mukumanya ngu ndi Mukama Luhanga waanu.’ ”
13Lwagholo olu nkwali syasa kandi syamalakaka hambali baghooneeye kandi nkyambisi ki̱me kyakwata hambali baghooneeye. 14Obu ki̱me kyahooyʼo, baabona mu elungu eli bintu bijelu biinabwana bikwataane nga ki̱me hansi. 15Obu Banai̱saaleeli̱ baabiboone baabu̱u̱lani̱ya bati, “Ebi mbiki?” Nanga bakaba batabimani̱ye.
Musa aabaghila ati, “Ni byokuliya ebi Mukama aabahaaye kuliya. 16Kini niikiyo eki Mukama aalaghiiye ati, ‘Bu̱li̱ omui mu enu̱we akumaani̱ye byokuliya ebi akugubha kuliya kandi kumalʼo. Bu̱li̱ muntu akumaani̱ye jaaga emui ya byokuliya haabwa bu̱li̱ muntu oghu ali mu ka yee.’ ”
17Banai̱saaleeli̱ baakola ngoku baabaghambiiye. Bamui mu bantu aba baakumaani̱ya byokuliya bikani̱ye na banji baakumaani̱ya bikee. 18Bhaatu obu baabi̱pi̱i̱mi̱ye haa ki̱pi̱i̱mo, abaakumaani̱i̱ye bikani̱ye tabaati̱ghaai̱ye kantu kandi abaakumaani̱i̱ye bikee tabaabu̱lu̱u̱we kantu. Bu̱li̱ muntu aakumaani̱ya byokuliya ebi akugubha kuliya kandi kumalʼo.
19Musa aabaghila ati, “Hatabʼo muntu nʼomui oghu akubiika haa byokuliya ebi ku̱hi̱ki̱ya nkyambisi.”
20Bhaatu bamui mu bantu aba baabhenga ku̱u̱ghu̱wa Musa, baabiika haa byokuliya ebi kandi nkyambisi baasanga biisuuyemu bi̱su̱ni̱ kandi bi̱nu̱nki̱ye. Musa aasaaliluwa na bantu aba.
21Bu̱li̱ nkyambisi muntu aakumaani̱yagha byokuliya ebi akwetaaghisibuwa kandi musana ghwakasaakalagha, ebi̱ti̱ghaaye hansi binuunuuta. 22Haa kilo kyamukaagha, bantu baakumaani̱yagha byokuliya bya milundi ebili, bu̱li̱ muntu aakumaani̱yagha jaaga ebili sya byokuliya ebikumala bilo bibili. Beebembeli̱ baa bantu baaghenda kandi baaghambila Musa. 23Aabaghila ati, “Eki niikiyo Mukama aalaghiiye ati, ‘Munkiya ni kilo kya kuhuumula, kilo kya Sabhato ki̱hi̱ki̱li̱i̱ye kya Mukama. Nahabweki mukumaani̱ye byokuliya byona ebi mukubbala kwomeleli̱ya kedha kuteeka kuliya, ebi̱ku̱ti̱ghalʼo mubibiike kubiliya munkiya.’ ”
24Bantu aba baabiika haa byokuliya ebi ku̱hi̱ki̱ya nkyambisi, ngoku Musa aabalaghiiye, tabyaghaghi̱ye kedha kubaamu bi̱su̱ni̱. 25Musa aaghila bantu aba ati, “Obwalo muliye byokuliya ebi nanga ni kilo kya Sabhato kya kulami̱ya Mukama. Obwalo tamukubona hansi byokuliya bbaa. 26Bilo mukaagha bu̱li̱ wi̱i̱ki̱ mulakumaani̱yagha byokuliya, bhaatu haa kilo kyamusanju̱, kilo kya Sabhato, tabilabaaghʼo bbaa.”
27Haa kilo kyamusanju̱, bamui mu bantu aba baaghenda kukumaani̱ya byokuliya, bhaatu bataasangayo kantu. 28Mukama aaghila Musa ati, “Mu̱ku̱hi̱ki̱ya haa kubhenga kukwata bilaghilo byanje na ndaghikiililo syanje? 29Mulole, si̱ye Mukama, ni̱i̱si̱ye naabahaaye kilo kya Sabhato, nanga haa kilo kyamukaagha nkubahaagha byokuliya bya bilo bibili, bu̱li̱ muntu aatalu̱ghagha mu ka yee haa kilo kyamusanju̱.” 30Nahabweki bantu aba baahuumulaghe haa kilo kyamusanju̱.
31Banai̱saaleeli̱ baaluka byokuliya ebi li̱i̱na maanu. Ekaba eli nga kasigho kati̱i̱ kanjelu kandi enuliliiye nga capati basi̱i̱ghi̱yʼo njoki. 32Musa aaghila ati, “Mukama aalaghiiye ati, ‘Mubiike ki̱lo ebili sya maanu, mughibiikile baasukulu baanu, niikuwo babone byokuliya ebi naahaaye enu̱we kuliya mu elungu, obu naayagha enu̱we mu nsi ya Mi̱si̱li̱.’ ”
33Musa aaghila Alooni̱ ati, “Okwate jaaga kandi otemu kilo ebili sya maanu, oghite mu maaso ghaa Mukama, ebiikuwe mu mijo yaanu yoona.”
34Alooni̱ aata jaaga eghi mu maaso ghaa sandu̱u̱ku̱ ya ndaghaano, kuukalʼo, ngoku Mukama aalaghiiye Musa. 35Banai̱saaleeli̱ baaliya maanu haabwa myaka maku̱mi̱ anaa, ku̱hi̱ki̱ya baki̱dhi̱ye haa mutaano ghwa nsi ya Kanaani̱ hambali baaghendagha kuukala.
36(Bwile obu Banai̱saaleeli̱ baakoleesi̱yagha jaaga ku̱pi̱i̱ma byokuliya byabo. Jaaga emui ekaba yengaane na ki̱lo ebili kandi jaaga eku̱mi̱ syasu̱li̱yagha dhebe emui.)
Iliyochaguliwa sasa
Ku̱lu̱gha 16: Lubwisi
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Talinga-Bwisi: New Testament and 15 Old Testament books in Lubwisi
© Wycliffe Bible Translators, Inc., 2025
