Epesoon 1
1
1Ege sini wargatɛ sinɔ taapɛɛrɛɛ seey lak Paawuloos sinɛ wosɛytan Yeese Kereseek oko ɗɛyan Waakoyotoŋk, joopa Waakoyotoŋk sigaaga ŋaadtaanakik sigɛ atu Epesoonek. 2In wookan a bɔdɛ sooy lak Ɛpɛn eteŋka Waakoyok a Suumi naŋk Yeese Kereseek.
Geet Wɛɛŋakoŋk Sinɔ Laŋɛɛ Kereseek
3In dakɛr pɔɔsiyɛɛk Waakoyota Jooka Ɛpɛna Suumiya naŋk Yeese Kereseya, sinaanakɔ tina gaki geetiyɛ darik goy Kereseek. 4Daamɓa tin Waakoyot Keresee a inɓa kɛɛ riiɓɛɛ ɗoo kɛnɔ eteŋk geetitaanak a tin kɛɛ laaganyɛ taamɛkɛ gɛɛnɛk. 5Ariɓa tin jeemɛ mɛyin nɛɛkɛk goy Yeese Kereseek kɛnɔ eteŋk tɔɔmɔk gɛɛŋk oko ɗɛyan nɛɛk, 6ariɓa sini kɛnɔ in pɔɔsɛɛ wookan sinɛ eemɛyɛɛk sinɛɓa tina gaɓɛ sɔkɔnk goy Tɔɔn nɛɛk sinɛ porɛɛ jɛtik. 7Laŋiiɓa tɔŋɔɗ tikiyɛ gaŋkik ɓaliiɗ yɛrom tɔɔn nɛɛk sinɛ poruk oko obiika wookan nɛɛkik. 8Gupatikɓa tina wookan nɛɛk a obiiŋ ɗegerɔɔn a koɓiiɗ. 9Ariɓa Waakoyot jeemɛ kɛnɔ ɗegerii any sinɔ dugaaŋɔŋk ɗɛyan nɛɛkik mentankaat nɛɛkɛ oko sinɛɓa gaamiɗik. 10Saakoy gayɛɛɗ eme sinɛɓa gaamu Waakoyotuk, nɛkoy sonysoomɛ ola sigɛ atu dari a ɗookuk baŋɛ a atu ɓaŋkawukaat suumiikent nɛɛkɛ goyse ɗeek.
11Daamɓa tin jeemɛ oko sinɛɓa gaamiiɗ Waakoyot sinɛɓa ijaag any baŋɛ oko ɗɛyan nɛɛkik oko sinɛɓa gaamiiɗ kɛnɔ eteŋk tɔɔmɔk gɛɛŋk. 12Nɔɓa ijaagiiɗ sinik kɛnɔ eteŋk sigɛ tuktaanak ŋaadiyɛɛkɛ sigaagɛ kookoriik kɛnɔ dakii a pɔɔsiyɛ eemɛyɔna Waakoyotoŋk.
13Iinak ɓɔrɔ sigɛkan tiyɛɛr Pɛɛni sinɔ Ɓɛlkɛɛstank eekeeroŋk sinɛ bɔdɛ noŋkuk, ɛkan ŋaadiɗikari Keresee, wɛɛŋakɛ ŋaadiyɛ sigɛ kookorɛk ɛɓa kɔnu ɗonyɛɛ Wɛɛŋakɛ sigɔɔgɛ Geetitaanakik. 14Ege wɛɛŋa sigi any gaamitoŋk mɛlɛɛɗa nɔkoy ɓaliiɗ Waakoyot joop gɛɛŋk yaakataak kɛnɔ dakɛr pɔɔsiyɛɛk eemɛyɔɔna Waakoyotoŋk.
Ɗanɗamɔn Paawuloosuk
15Nɛ agut sini tiyaakɔ ŋaadiyɛ sigɛ latukari Suumii Yeeseek a mɛyin sinɛ latukari joopa Waakoyotoŋk baŋɛkiŋ. 16Nɛ kɔnu koɓuka ɗanɗamɔɔn naakɛk, ɛ kaa sukuun sinɔɔnɛ widerkiɗa pɔɔsiyɛ Waakoyota agut iinakik. 17Ɛ kalɛɗika kɛnɔ ɗegerari Waakoyo sinɛ Ɛpɛn eemɛyɔɔnaak, sinɛ Waakoyo Suumi naŋk Yeese Kereseek kɛnɔ kɔna gaɓɛ Wɛɛŋa ɗegerɔɔnoŋk a yaaŋiyɛɛkoŋk. 18Ɗanɗamaaka kɛnɔ ɓuukiɗi kalbiyɛ goŋk ɛ kɛnɔ ɗegerari kɛ riygiɗɛɛkan kɔnu ŋaadiyɛ sigɛ kookoriik kɛ jikonak ɛ kɛnɔ ɗegerari kɛ obi geet sinɛkoy gaɓɛ Waakoyot joopa gɛɛnaakik a ɛtɛ ɛk. 19Ɛɓɔrɛ ɗanɗamaaka kɛnɔ ɗegerari ɓaŋkawuka sinɛ ijaagɗi eteŋkɛ sigaagɛ joop Waakoyotoŋkuk kɛ obi a ɛtɛ ɛk, 20nɛɓa yaaŋɛ Ɛpɛna eteŋka Waakoyot ɓaŋkawuka sini Keresee aɓa boŋku ret walasa nɛɓa riiɓe dari ɗiɗikakɛ gɛɛnɛk. 21Nɛɓa gageeɗ ɔɗɔwikeen a tapaaɗikeen a ɓaŋkawuka baŋɛ sinɔ ar suumiikent baŋɛ rakaayk, moko eme sineene dakɛɗa kɛygun ɓɔrɛ eme sinaanɛ koy mɛlkik. Gageeɗɓa tiriya sigɔ eemɛyɛɛŋɔŋk sigɔ atu tiriyaakɛ baŋɛ rakaayk. 22Nɛɓa argeeɗ ola baŋɛ a atu ɓaŋkawukaat nɛɛkɛ goyse ɗeek kɛnɔ ɓalɗi sɛɛna, gaɓɛɓa godeya Sambatɛyoŋk kɛnɔ dakɛ a ɔɗɔ olaatɛ baŋɛ raŋk. 23Sɛɛn ɛɛk sinɛ enyɛr ola baŋɛ olaatɛ baŋɛk enyakaat nɛɛkɛkik.
Iliyochaguliwa sasa
Epesoon 1: KSTM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia