Efesios 6
6
Ja tatal sok ja untikal jumasa
1Untik jumasa, k'u'anik ja yab'al ja wa nan a tatexi. Ja we'nlexi sb'ajexni ja Kajwaltik Jesús, sok ja' jaw ja jel t'ilan oj ja k'u'lukexi. 2Ja jas b'ajtan yala ja Dyosi, wax cho yala ay b'i jas tuk oj sk'u'luk ti yala jastal iti: —K'u'anik ja yab'al wa nan a tatexi sok talnayik. 3Ja jachuki, jel lek oj ek'uk a wujilex, sok jel oj alb'uk wa sak'anilex ja b'a lu'um iti—.
4Jaxa we'nlex nanal tatal jumasa, mok wa tajkukex lom wa wuntikilexi. Alawik yab' toj ja jas oj sk'u'luki sok je'awik yi ja yab'al ja Dyosi.
Ja ma'tik moso ayi
5Ja ma'tik moso ayexi, winik ma' ixuk, k'u'anik ja yab'al wa wajwalex b'a lu'um iti. Kisawik sok k'u'anik toj lek ja jas oj yal'e'i, lajan sok jastal ye'n wa'nex ya'teltajel ja Kajwaltik Jesusi. 6-7Ja iti, jel t'ilan jach' oj ja k'u'lukex tola bida, sok mi kechan ja ti oj ja k'u'lukex ja yajni ti wax yilawex wa wajwalexi. Ja we'nlexi, moso xa ayex yuj ja Kajwaltik Jesusi, ja'yuj sb'ej jel gusto oj ja k'u'lukex sok tsatsal k'ujolan a b'ajex b'a oj ja k'u'lukex ja jas wa sk'ana ja Dyosi, lajan sok jani wa'nex sk'u'lajel yi ja Kajwaltik Jesusi, mi kechan ja oj ja k'u'lukex yi wa wajwalexi. 8Jel t'ilan oj ja na'ex lek, ja Kajwaltiki, oj ya'yi jun smajtan ja ma'tik lek ja jas oj sk'u'luki, a'nima moso ayukex libre ayex, ja ye'n junxta a wab'al oj yil'ex.
9Jachuk ja we'nlex ajwalal jumasa, t'ilan oj ja wil'ex jun yab'al ja ma'tik yib' k'ab'al ay a wujilexi, jach'ni jastal waxa kisawex ja tuki, mok a le'ex yi smule'. Na'awik t'unuk ja we'nlex sok ja ye'nle'i, june ita ja ma sb'ajexi. Ja ma' sb'ajexi ja'ni ja Dyos it tey b'a satk'inali, ja ye'n mi wanuk ita stsa'a ja ma oj syajta.
Ja jastal chapan oj ajyokotik sok ja Dyosi
10Ja ya'n a'a b'ajik b'a ye'n oj ya' wa wipex ja Kajwaltik Jesús b'a wax yila t'ilani. 11Lapawik ja yab'al ja Dyos it ya'oj a wi'exi, b'a jach' oj b'ob' a kolta b'ajex ja yajni wa sk'ana oj yil k'ujolukex ja tan pukuji. 12Mi yuj wa'nukotik tiro'anel sok kristyano jastal ke'ntik, ja ma' mix kila jb'ajtik sok leki, ik' ason aye ek' b'a satk'inal ye'n wax yalawe jasunk'a oj sk'u'luke'i, ti wa sje'a ja yipe b'a lu'um iti. 13Ja'yuj —Pots'o a b'ajik ja yab'al ja Dyosi—. Jachuk, ja yajnix k'ot ja sk'ak'u'il ja jas mi lekuki, b'a jach' oj kuchuk a wujilex ja yajni oj sk'an oj sk'ulukex ganar wa kontra ex jumasa, jaxa we'nlexi toj ajyanik man stik'anal.
14—K'elan jakan ajyanik—. Ja Dyosi oj spots ex sok jas merani sok ja jas toji b'a sb'aj ye'n oj spotso'ex lek sok ja yab'ali. 15Ala ab'ajex ja tsamal ab'al it wax ya'wotik lamani; —Chapan ajyanik b'a oj waj ja wal'ex. 16Ja sniwanil wa k'ujolex sok ja Dyosi, ja oj skoltayex jastal jun smakb'al bala, ojni cho kom ja yip ja spulte' ja tan pukuj wa sk'ana oj sjip a b'ajexi. 17Jawa koltajelexi, jach' oj makunuk a wujilex jastal jun tsatsal smakb'al omal, cho jach' oj skoltayex lek ja yab'al ja Dyosi, ja wa machitexi ja Espiritu Santo.
18Mok ch'ayuk a k'ujolex sk'umajel ja Dyosi. K'umanik b'a spetsanil k'ak'u, a'a b'ajik yi ja Espiritu Santo b'a ye'n oj sje'a wi'ex jastal oj ja k'umukex. Mok ochuk a wayelex ajyanik sak'an k'ak'u a'kwal, mok a wa'a b'ajex b'a oj kula jananik ganar. Jaxa yajni waxa k'umanex ja Dyosi, k'anawik yi yuj spetsanil ja yuntikili. 19Cho k'umanik ja Dyos yuj ja ke'n, k'anawik yi a ya'ki kip b'a oj kal ja jas chapan yuj it mitox jna'atiki. 20Ye'n sjekawon ja Kajwaltik b'a oj kal ja jas chapan yuji, ja'yuj ja jaw ja ti lutanon ja ya'n. K'anawik yi ja Dyos a ya'ki kip b'a mi oj xiwkon oj kal ja tsamal yab'ali.
Ja spatulab'il k'ujolal jumasa b'a stik'anali
21-22Wax jeka a wi'ex ja Tiquico, jun jmojtik jel toj wax ya'telta ja Kajwaltik Jesusi, b'a oj stsatsal k'ujolukex b'a oj cho yala wabyex jastal ayon, sok jasunk'a wax k'u'lani.
23Wax k'ana b'a sb'i'il ja Dyos Tatali sok ja Kajwaltik Jesusi, a ya'ex laman, a ya'wi'ex ja syajal sk'ujoli, sok a ya' sniwanil sk'ujole' petsanil ja jmoj alijeltik jumasa. 24Sok oj majla jel lek oj yil ja Dyos spetsanil ja ma mix ya'kan yajtajel ja Kajwaltik Jesusi.
Iliyochaguliwa sasa
Efesios 6: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021