Efesios 5
5
1Ja we'nlexi, yuntilexa ja Dyosi, jaxa ye'n jel wa syajtayex. Ja'yuj jel t'ilan jach' oj ajyanik ja jastal ja ye'n. 2T'ilan oj ja yajtayex ja tuk jumasa, jach' jastal syajtayotik ja Kajwaltik Jesusi sok cham yuj ja ke'ntiki. Yuj ja jastal cham ja Kajwaltik Jesusi, jach' wax yila ja Dyos jastal jun perjume b'a jex ajb'ani ja yik'ili.
3Ja we'nlexi, ti'xa ayex sok ja yuntikil ja Dyosi; Ja'yuj mokxa a ta'ex ti ja mulal jumasa jastal wax yi'a sb'aje ja ixuke sok ja winike jumasa, ch'ayaxa a k'ujolex ja tantik mi lek jastal jex ok' ak'ujolex oj ja k'u'lukex ajyi. 4Mok k'umananik b'a mi sb'ejuk, mok a wal'ex jun lo'il b'a mey sb'ej, mok jas a wal'ex b'a mi meranuk b'a lom oj ja le'ex yi smul ja wa mojexi, yuj ja jastal jawi mi stojoluk. A'wik makunuk wa ti'ex b'a oj ja wa'wex yi ts'akatal ja Dyosi. 5Ja we'nlexi, waxa na'awex lek ja wax yi'a sb'aj sok pilan ixuki, ma pilan winik, ma' mi lek ja jas wa sk'u'lani, ja ma mi gusto ay sok ja janek' yi'oji, mi oj ochuk ja b'a chapan yuj ja Kajwaltik Jesús sok ja Dyosi. Ja jastal jawi mini jun sb'ej ja lajan sok jastal ja ma wa sk'u'an ja k'u'lub'al dyosi.
Ja b'a jsak'aniltiki la jk'u'uktik ja Dyosi
6Mok a wa'a b'ajex lo'lajel sok jun lo'il ta ay ma ay jas oj yala wabyex mey sb'ej, yuj k'a oj ja k'u'ukex ja it jumasa jel tsats oj ya'a tup'ex ja Dyosi. 7Ja'yuj mok a wila b'ajex sok lek sok ja kristyano jastal jawi.
8Ta mi k'ax na'atik sb'aj ja Dyosi, lajan sok tito aytik b'a yoj k'ik'inal ja we'nlex ja mas b'ajtani, jach'ni ajyiyexa, yuj mixa na'awex sb'aji. Ja ya'n wanxa xa na'awex sb'aj, ja'yuj ti'xa ayex b'a sakal k'inal; ja ya'ni jach' la ajyiyex jastal ja ma wa'nxa sna'a sb'aj ja Dyosi. 9Ja Espiritu Santo wax ya ajyuk syajal jk'ujoltik, wax ya' ajyukotik toj smeranil. 10Le'awik jastal oj b'ob' a k'u'lukex ja jastal wa sk'ana ja Dyosi. 11Mok a laj a b'ajex sok ja ma mi sk'u'an ja Dyosi; je'awik yi'e ja jas mi lek wa sk'u'lane'i, yuj ja jas wa'ne sk'u'lajeli mini jas wax koltajiye yuj ja. 12—Ja smeranili wax ya'a k'ixwel ja oj alxuk ja jas nak'ul wa sk'u'lane'i. 13Jaxa yajnix ijlab'ani ja k'ak'i, spetsanil oj ch'ak chiknajuk, ti oj ilxuk jastal ja smeranili. 14Ja'yuj, ay ma sts'ijb'an kan jastal iti:
—Sak'tes k'inal ja we'n yuj ja wa'na wayeli—
Tulu a b'aj ja b'a yoj cham winik jumasa,
ja Kajwaltik Jesusi, oj ya ijlab'anan—.
15Talna a b'ajik ja jastal waxa k'u'lanexi. Jach' la ajyiyex jastal ja ma wa sna'a lek ja jas wa sk'u'lani, mok ja a laj'ex ja ma mi sna'a jastal ayi. 16Na'awik jastal oj ja k'u'lukex ja b'a leki, yuj ja k'ak'u jumasa wa'n ek'eli, mini ay slekila. 17Mok a wa'a b'ajex yuj mi jasxa na'awex, le'awik jastal oj ja na'ex jasunk'a wa sk'ana ja Dyos oj ja k'u'lukexi.
18Mok lom yakb'anik porke oj ch'ay a k'ujolex ja jastal waxa k'u'lanexi. A'wik och ye'n ja Espiritu Santo b'a oj sb'ut'ex sok b'a oj stojb'esex. 19-20Yajni oj ja tsom a b'ajexi, ts'eb'ojtayik ja salmo jumasa, ts'eb'ojtayik ja ts'eb'oj jumasa sb'a Dyosi. Toyowik sok spetsanil a k'ujolex ja Dyos b'a sb'i'il ja Kajwaltik Jesusi, spetsanil k'ak'u a'wik yi ts'akatal yuj spetsanil ja jas ayi.
21Ja we'nlex ma'tik waxa toyowex ja Kajwaltik Jesusi, t'ilan toj oj ja k'u'uk a wab'al a b'ajex. 22Ja ixuke jumasa jel t'ilan oj sk'u'uk ja yab'al ja statami, jach' jastal waxa k'u'lanex yi ja Kajwaltik Jesusi. 23Yuj ja tatamali, ye'n olomal yuj ja sche'umi, jach' jastal ja Kajwaltik Jesús ye'n olomal yuj ja jmoj aljeltik jumasa, cho ye'nani wax koltani'a. Ja Kajwaltik Jesusi, ye'na ni olomala, jaxa jmoj aljeltik jumasa ja'ni ja skwerpo'a. 24Ja'yuj ja che'umali, jel t'ilan oj sk'u'l spetsanil ja jas oj sk'an ja statami, jach' jastal wa sk'u'lan ja yuntikil ja Kajwaltik Jesusi.
25Ja tatamal jumasa jel t'ilan oj syajta ja sche'ume jach jastal syajta jmoj aljeltik jumasa ja Kajwaltik Jesusi, sok ya'a sb'aj b'a oj cham yuj ja yuntikil jumasa. 26Jach' sk'u'lan b'a kechan ye'n oj sb'ajuk, sak'a lek sok ja yab'ali, cho jach'ni sok ja yi'jel ja'i. 27Ja Kajwaltik Jesusi k'eb'ub'al ya'a sb'aj yuj ja ma'tik toj lek wax k'u'aji yuji, mini jun smul ay toj ay lek jach' jastal jun juna'al mi wuts'ub'aluk sok b'a mini jun skuxil ay, cho mini b'a jas tuk oj slaje. 28Ja tatamali jel t'ilan oj syajta ja sche'umi, jach' jastal wa syajta ja skwerpo ye'n. Ja winik ma wa syajta ja sche'umi, ye'nani wa syajta sb'aja. 29Yuj ja mini jun ma mi oj syajta ja skwerpo ye'na. Ja smeranili, wa sle'ayi jas oj yab'i wax cho stalna, jach'ni ja Kajwaltik Jesusi, wa stalna ja jmoj aljeltik jumasa. 30Ja smeranili, kada jujune ja ke'ntik wax ch'ak jta' jb'ajtik sok ja jmoj alijeltik jumasa, cho ja'ni ja skwerpo ja Kajwaltik Jesusi. 31Ja b'a ts'ijb'anub'al ja yab'al ja Dyosi, jach wax yala jastal iti: —Ja'yuj ja winiki, wax ya'kan ja snan stati, ja'ni oj smo'uk sb'aj sok ja sche'umi, b'a jach' jun ita kwerpo oj ajyuke'a. 32Ja jawi, jun smeranil b'a jel niwan, jaxa ke'n wax makuni kuj b'a wax lo'ilta ja yab'al ja Kajwaltik Jesús sok ja jmoj alijeltik jumasa. 33Ja'yuj b'a spetsanil k'ak'u ja tatamali jel t'ilan oj syajta ja sche'um jastal wa syajta sb'aj ja ye'ni, cho jach'ni ja che'umali, jel t'ilan oj skis ja statami.
Iliyochaguliwa sasa
Efesios 5: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021