Efesios 3
3
Ja Pablo
1Ja ke'n Pablo'on, lutanon yuj ja wax ka'telta ja Kajwaltik Jesusi, cho ti' wa'non a'tel b'a wa lekilal we'nlex ja ma'tik mi judio'uki. 2Ja we'nlexi, waxa na'awex ke'n sjekawon ja Dyos b'a oj kala wabyex ja jas wax yala yuj sts'akatal ja niwan syajal sk'ujol chapan yuji. 3Ja Dyosi, ya jna' ja jas nak'an chapan yuj ajyi, ja jawi, jts'ijb'ata a wi'ex. 4Ta wan k'axa k'umanex ja jas jts'ijb'a oj ja na'ex jastal jna'a ja ke'n ja jas chapan yuj ja Dyos b'a oj ya sk'u'luk ja Kajwaltik Jesusi. 5Ja jas nak'an ay ajyi, mi a'ji sna'e ja ma' ek' paxta kujtiki; jaxa ya'n yuj ja Espiritu Santo ch'akta sje'yi ja sjekab'anum jumasa tsa'ub'al yuj sok ja yaluman jumasa. 6Ja jas nak'an ay ajyi ja iti: Yuj ja Kajwaltik Jesusi, ja'yuj ja ma mi judio'uki, oj sta' skoltajele ojni cho a'juk yi'e ja jas alji yabye ja israelenio jumasa oj a'juk yi'e'i, june ita oj kanuke sok ja israelenio jumasa. Ja spetsanil ja jas oj ja k'u'lukex ja we'nlexi, kechan ja oj ja k'u'ukex ja tsamal yab'al ja Dyosi.
7-8Ja Dyosi, jel lek jmok ja ke'ni, ke'n yala kab' oj kal yab' ja ma mi judio'uk ja jastal jel tsamal wax koltani ja Kajwaltik Jesusi, mi ajtab'en ja jastal wax koltani. Jach' sk'u'lan sts'akatal yuj ja jel niwan ja yipi, minike sb'ejuk ke'n oj ya'ki ja a'tel iti, ke'n ja mas ch'inon b'a spetsanil ja yuntikil ja Dyosi. 9Cho ke'nani yal kab' b'a oj ka sna' spetsanil ja kristyano ja jastal oj k'ot smeranil ja jas nak'ul chapan yuj ajyi ja Dyos ja ma' sk'u'lan ja satk'inal sok ja lu'umi, jel jitsan k'ak'u stalna ja jas nak'ul chapan yuj ajyi. 10Jachuk ja ya'n, yuj ja ma'tik sk'u'aneta ja Dyosi, ja anjel jumasa, sok ja ma'tik jel ja yip ik' ason aye ek'i, oj sna'e, yuj ja kechan ye'n ja Dyos jel wa sna'a. 11Ja' it ja najate lek chapan yuj ja Dyosi, sok ti ya k'ot smeranil b'a Kajwaltik Jesús. 12Sts'akatal ja Kajwaltik Jesusi, yuj ja wax k'u'antik ja ye'n, ja'yuj mixa wala xiwtik ja wala ochtik ja b'a sti sat ja Dyosi. 13Ja'yuj wax kala wabyex, mok axwanik yuj ja wokol jumasa wa'non yi'jeli, ja iti, yujni ja b'a wa lekilal we'nlexi.
Ja syajal sk'ujol ja Kajwaltik Jesusi
14Yuj ja spetsanil ja iti, wala ko'yon mek'an b'a sti sat wax k'uman ja Dyos Tatali. 15Yujni ye'n sk'u'lan spetsanil ja jas wax ilxi b'a satk'inal sok b'a lu'umi. 16Yuj ja jel niwan ja slekilal sok ja stsamalili, ja'yuj wax k'anayi ja Dyos a ya' yip ja wa waltsilex sok a stsatsal k'ujolukex ja Yespiritu. 17Wax cho jk'anayi ja Dyosi, tix ajyi b'a wa waltsilex ja Kajwaltik Jesusi, mas lek yuj ja ye'n waxa wa'a sniwanil a k'ujolexi, jaxa we'nlexi toj ajyanik sok ja syajal wa k'ujolex sok ja Dyosi, cho jach'ni sok ja tuk wa mojex jumasa. 18Jach'ni ja we'nlex sok spetsanil ja tuk jumasa ma' yuntikilotikxa ja Dyosi, oj ja wabyex sb'ej lajan ja jastal ja syajal sk'ujol ja Kajwaltik Jesús b'a slechanal ja lu'umi. 19Wax k'anayi ja Dyos a sje'a wi'ex ja syajal sk'ujol jawi, ja' mas niwan yuj ja jastal wax b'ob' jna'tiki, jachuk a ya'wi'ex spetsanil ja Dyos ja jas t'ilan oj ya'wi'exi.
20Ja Dyosi, ayni yip b'a oj ya jitsan yuja ja janek' wax k'anatiki. —Mini t'un oj na'tik jastal oj sk'u'luk ja Dyos b'a oj skoltayotik sok ja yipi. 21Jpetsaniltik ja janek' jmoj alijel xa jb'ajtik yuj ja Kajwaltik Jesusi, jel t'ilan oj toytik ja ye'n b'a spetsanil k'ak'u, jach'ni'a.
Iliyochaguliwa sasa
Efesios 3: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021