Efesios 1
1
Spatulab'il k'ujolal
1Jmoj alijel jumasa b'a Efeso:
Ja we'nlex yuj ja ti'xa ayex sok ja yuntikil mi kwalkyera uk' ja Dyosi, mok cho a wa'wex kan sk'u'ajel ja Kajwaltik Jesusi, mok a pil a b'ajex sok ja ye'n, wax jeka spatulab'il a k'ujolex.
Ja ke'n Pablo'on, sjekab'anumon ja Kajwaltik Jesusi, yujni jach' wa sk'ana ja Dyosi. 2Wax k'ana yi ja Tatal Dyos sok ja Kajwaltik Jesús a syajtayex lek sok a ya'ex laman.
Ja Pablo ya'yi ts'akatal ja Dyosi
3La ka'tik yi ts'akatal ja Dyos stat ja Kajwaltik Jesús yuj ja slekilal sk'ujol mix kilatik yi'aj kon ki'tik ja Kajwaltik Jesús b'a satk'inali. 4Ja mas b'ajtan mitox kujlaji ja satk'inal sok ja lu'umi, ja Dyosi stsa'awotik yuj ja Kajwaltik Jesusi, b'a kechan ye'n oj sb'ajukotik sok b'a jach' mi oj jle' jmultik.
Ja Dyosi, jel wa syajtayotik 5ja'yuj sjeka ja Kajwaltik Jesús b'a jak ya ochkotik jastal yuntikil ye'na, man k'e stulyi yujni jach' yalunej oj sk'u'luka. 6Yuj ja jach' sk'u'lan spetsanil ja Dyosi, ja b'a oj toytik ja niwan sok tsamal syajal sk'ujoli. Sts'akatal yuj ja syajal sk'ujoli, ja'yuj sjeka ja yunin b'a jak skoltayotik. 7-8Yuj ja cham b'a cruz ja Kajwaltik Jesusi, ja Dyosi mi ya' jtuptik ja jmultiki, ch'aya spetsanil ja mulali. Yuj ja jach' sk'u'lani, ja'yuj ja jel niwan ja syajal sk'ujoli. Yuj ja cho jel niwan ja jas wa sna'a sok ja jas sk'u'lani, 9Ja Dyosi, sje'ata ki'tik ja jas nak'an chapan yuj ajyi, cho yala yuj ye'n oj ya sk'u'l ja Kajwaltik Jesusi. 10Yajnix k'ot ja sk'ak'u'il ja jastal yaloji, ti oj chak sk'uluk ja jas yalunej ja Dyosi, oj ch'ak stsom spetsanil ja kosa tey b'a satk'inal sok b'a lu'umi, b'a sti' sat ja jaw jumasa, oj a'juk yi niwan ya'tel ja Kajwaltik Jesusi.
11Yuj Kajwaltik Jesusi, ja yuj b'ajtan stsa'awotik ja Dyosi, b'a ye'n oj sb'ajukotik b'a oj cho ki'tik spetsanil ja jas yaluneji. Jach'ni yalunej ja Dyosi, ja jas wax yala yujni wax b'ob'a. 12Ja ke'ntik ja janek' judio'otiki, ja Dyosi, wa sk'ana ke'n b'ajtan oj ka' niwan jk'ujoltik ja Kajwaltik Jesusi, b'a jach' oj b'ob' jtoytik ja jastal jel niwan ja yipi.
13Ja we'nlexi, a maklayex sok a k'u'anex ja tsamal ab'al it wax koltani ja ab'al jawi ja smeranil, yuj ja sts'akatal ja Kajwaltik Jesusi, ja'yuj ochyexta yuntikilex ja Dyosi, cho a wi'ajex ja Espiritu Santo jastalni yaloji. 14Ja we'nlexi a wi'ajex ni'a, b'a jach' k'ot smeranil ja jas yalunej ja Dyosi, ja'ni ch'akta ya el spetsanil ja janek' yuntikilotikxa, ja'yuj wax toyotik ja jas jel niwan wa sk'u'lan ja Dyosi.
Ja Pablo sk'uman ja Dyosi
15Wax na'a yuj ja we'nlexi, jel gusto waxa k'u'anex ja Kajwaltik Jesusi, sok jel waxa yajtayex spetsanil ja yuntikil ja Dyosi. Ja'yuj ti wax jna'a ja jas kalunej a wabyex b'ajtani, 16ti wala julyex jk'ujol ja yajni wa'non sk'umajel ja Dyosi, sok wax ka'yi ts'akatal ja Dyos yuj ja sniwanil a k'ujolex sok ja ye'n. 17Wax k'anayi ja Dyos sok ja Kajwaltik Jesusi, la kaltik ja niwan Tatali, a ya'wi'ex ja Espiritu Santo, b'a jach' jel ja jas oj ya'a na'exi, sok oj a na'ex jastal ay ja Dyosi. 18Wax cho jk'anayi ja Dyos a sea wi'ex jastal oj chiknajuk lek, janek' sniwanil jas niwanil wa k'ujolexi, ja jastal tsa'jiyex sok ja jastal koltaji ja ma'tik sb'ajxa Ye'n. 19Wax cho jk'ana yi a ya'a wabyex lek sb'ej ja jastal jel niwan ja yip ja Dyos ja jastal skoltayotik jpetsaniltiki. Ja yip ja Dyosi, mey stik'anal; sok ja yip jaw 20ja' ya sak'wuk sok ja Kajwaltik Jesusi, tsa'an ti ya' kulan b'a stojol sk'ab ja b'a k'u'lan k'ot b'a satk'inali; 21sok ja yip jaw, ja Dyosi, ya'yi b'a sk'ab' ja Kajwaltik Jesús b'a ye'n oj sk'u'l spetsanil, ti ya'a b'a yib' sk'ab' ja ma jel ja yipi sok spetsanil ja jastik ay b'a lu'um iti, cho jach'ni ja b'a yajk'achil chonab' ojto jakuki. 22-23Ja Dyosi, spetsanil ja kosa jumasa ch'ak ya'yi b'a sk'ab' ja Kajwaltik Jesusi, cho ya'yi niwan ya'tel yuj ja moj aljeltik jumasa, ma'tik wa sk'u'ane ja Dyosi, ja Kajwaltik Jesusi, ja sb'aj ja moj aljeltik jumasa, jaxa s'olomi ja' sb'aj ja skwerpo. Yuja ja Kajwaltik Jesusi, sok ja ye'n wax chak b'ob' spetsanil, jaxa moj aljeltik jumasa, ye'nxa was ts'iktese kani.
Iliyochaguliwa sasa
Efesios 1: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021