1 Corintios 3
3
Ja a'tijum jumasa sb'a Dyosi
1Jmoj aljel jumasa, ja ke'n mix b'ob' lo'lanukon a mokex jastal ja ma' ti'xa yi'oj ja Yespiritu ja Dyosi, yuj ja we'nlexi, jachukex to jastal ma mix ya'kan sle'jel ja smul ja b'a lu'um iti. Ja'yuj jach' lo'laniyon a mokex jastal wantox och a k'u'ukex t'an ja Kajwaltik Jesusi. 2Ja smeranili, ojxanike b'ob' je'a a wi'ex t'unuk ja jastik jumasa b'a wokol yab'jel sb'eji, jaxa ja iti, ja jas je'a a wi'exi, mini t'un wokoluka, b'a' miyuka ja we'nlexi, ja'to ni a mojex ja yal ch'in untik b'a kechan lech wax b'ob' yu'e, mix b'ob' a'xuk yi swa'el jastal ja niwak kristyano jumasa. Jachuk ja we'nlex ja k'ak'u jawi, mito chapanukex b'a oj a wabyex sb'ej ja jastik jumasa b'a wokol wax ab'xi sb'eji. Yujni mitoxa wabyex sb'eja, 3-4Jach'to jastalex jastal ja ma mix ya'kan sle'jel ja smul ja b'a lu'um iti. Tajkel waxa wil a b'ajex sok ja wa mojex jumasa, we'n ita wala ochyex tiro'anel. Yuj ja ta ay k'a ma wax yala: —Ja ke'n ja nochanon sok ja Pablo—, jaxa juni wax yala: —Ja ke'n ja nochanon sok ja Apolosi—, Jach' jastal ja we'nlex jastal ja swinkil ja lu'um iti. ¿Mini ma t'un wax jak a k'ujolex jach'ni wax cho sk'u'lan ja ma mix ya'kan sle'jel ja smul b'a?
5Ja ke'n sok ja Apolosi, kechan jun ya'tijumotikon ja Dyos b'a oj jkoltayextikon b'a oj a k'u'ukex ja Kajwaltik Jesusi. Ja ke'ntikoni, ja jk'u'lantikon ja jas yala oj k'u'ltikon ja Kajwaltiki: 6Ja ke'n kala wabyex ja tsamal yab'al ja Kajwaltik Jesusi, jaxa Apolosi, cho yala a sje'a a wi'ex jastal oj a k'u'ukex ja Kajwaltiki, ja smeranili, ye'nani ja Dyos ja ma jel ya' a k'u'ukex ja Kajwaltik Jesusi. 7Ja'yuj, mi ja'uk mas niwan ja ma' wax yala ja yab'al ja Dyosi, sok ja ma wa sje'a; ja ma' mas niwani ja Dyos ja ma' wax ya'a lek sniwanil jk'ujoltik jastal oj k'u'uktik ja Kajwaltik Jesusi. 8Ja ma' wax yala ek' ja yab'al ja Dyosi, jel niwan ja a'tel jawi, cho jach'ni ja ma wa sje'awe'i. Kada jujune ojni a'juk yi'e ja sts'akole'a, ja'ni chikan jastal ja ya'tel sk'u'luneje'i. 9Ja ke'n sok ja Apolosi, jmoj jb'ajtikon ja b'a ya'tel ja Dyosi, jaxa we'nlexi lajanex sok jastal jun yaljil ixim, ma jastal jun na'its tojb'el yuj ja Dyosi, jaxa ma' sb'aj ja na'its jawi, ja'ni ja Dyosi. 10Jaxa Dyosi, sok syajal sk'ujol ya'a permiso ke'n oj k'el jastal oj tojb'uk ja na'its jawi. Jaxa ke'n jach' jk'u'lan jastal jun lekil albanil, ja b'a k'e' jan ja a'teli, ka' och kan jun niwan yip: Ti och kal ja yab'al ja Kajwaltik Jesusi, tsa'an, pilanxa ma ya'telta ja b'a ka' kan kechan ja ke'n. Kada jujune jel t'ilan oj k'eltik jastal oj a'tijukotik, 11Yuj ja mini jun ma oj b'ob' ya' pilan yip ja a'tel jastal tojb'elxa, ja yip jawi, ja'ni ja Kajwaltik Jesusi. 12Man b'a tik'an wajum ja yip jawi, ti oj k'e jnochtik ya'teltajel ja na'itsi, oj b'ob' katik ochyi k'anal tak'in sok sakal tak'in, tsamal ton, te', ak, k'ajmal ixim. 13Jaxa yajnix k'ot tik'an ja k'ak'u'ji, ja Dyosi oj sk'ul probar kada jujune ja jas sje'a yuj ja na'itsi. Jastal oj sk'u'l probar, t'ilan oj ya' och yoj k'ak' ti oj yil b'a'ya mi oj tsikuka. 14Ta ay k'a junuk b'a mi tsiki, ja ye'n ojni a'juk yi ja sts'akola. 15Kechan ta yuj k'a mi kuch yuj ja k'ak' ja a'tel tojb'i'i, ojni ch'ay sna'jel spetsanila, jaxa ma' stojb'esi, a'nima ti'xax el yoj k'ak' ojni sta' skoltajela.
16¿Ma yuj mixa na'awex ta yuj we'nlex jun snajtsil stsomjelex ja Dyosi, jaxa Yespiritu ja Dyosi, ti'ni ay a mokex ja we'nlexa b'a? 17We'nlex jas snajtsilex stsomjel ja Dyos tsa'ub'al. Chikan ma wa sk'ana oj sjom'el ja snajtsil tsomjel jawi, jach'ni ja ye'n ojni ch'ayjuk sna'jel yuj ja Dyosi.
18—Mok we'n ita oj ja lo'la a b'ajex— Ta yuj k'a ay ma wax yala jel wa sna'a, sok jel wa sna'a ja jastik wa'n ek'el b'a lu'um iti, ja ma' wa sna'a merani, wa sje'a sb'aj ke mi jas sna'a. 19Jama' je sna'a ja jastik jumasa b'a lu'um iti, ja Dyosi mini t'un was kisa'a. Jach'ni wax yala jastal it ja b'a ts'ijb'anub'al ja yab'ali: —ja Dyosi mi lek wax yi'aj ja ma wa sje' sb'aj ke jel wa sna'a. 20Wax cho yala: —Ja Dyosi, wa sna'a lek ja jas wax ya jak sk'ujole oj sk'u'luke ja ma wax yala ke jel wa sna'awe'i, xchi ja Dyosi. 21Ja'yuj mi sb'ejuk oj ja toy a b'ajex sok ja jas wax je'atikoni, ja ke'ntikoni kechani jun ya'tijumotikon ja Dyosi, ja smeranili spetsanil nakani a b'ajexa: 22Ja Pablo, ja Apolosi, ja Pedro, ja lu'um k'inali, ja sak'anili, ja jchamel ch'akeli, ja jas wa'ntik yiljeli, sok ja jas ti jakumi. Spetsanil a b'ajni we'nlexa, 23jaxa we'nlexi, ti' ayex sok ja Jesusi, jaxa Jesusi, ti'ni ay sok ja Dyosi.
Iliyochaguliwa sasa
1 Corintios 3: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021