युहन्ना 2
2
काना नाम ना ह़ेर मे वेवा
1तीसरा दाड़े गलील जीला ना काना ह़ेर मे एक माणेह ना वेवा हता। अने ईसु नी आह्य बी तां हती। 2वेवा मे ईसु अने तीना चेला ने बी बोलावला हता। 3जत्यार तां अंगुर नो लहणायलो रोह खुट ज्यो, ता ईसु नी आह्य ईसु ने केदी, हीमनी पांह अंगुर नो रोह नी र्यो।
4ईसु आह़फा नी आह्य ने केदो, “ए बाय मारी ह़ाते तारु ह़ु काम से? हमणे मारी टेम नी आयी।”
5ईसु नी आह्य चाकर्या ने केदी, “हीय्यो तमने जे कंय केय तीहयु तमु करजो।”
6तां दगड़ा ना छोव मोट्ला गोळा मेकला हता, आहया गोळा मे गेथु पाणी हेड़ीन युहदी माणहु चोखा हयवा करीन हातु-पोगु धोवता हता। ते गोळा मे ह़ोवेक लीटर पाणी ह़मातु हतु। 7ईसु पावर्या ने केदो, “गोळा मे पाणी भर देवो।” अने तीहया गोळा मे उबरायतु पाणी भर देदा। 8ईसु तीमने केदो, “हाव थोड़ुक पाणी काडीन वेवा करन्या डायलान्तां ली जावो” अने चाकर्या डायलान तां ली ज्या। 9जत्यार डायलो तीहयु पाणी चाख्यो, ते पाणी अंगुर नो रोह बण जेलु हतु, अने तीने मालम नी हतु, के तीहयो कां गेथो आवलो से, पण गोळा मे गेथु पाणी काडण्या पावर्या ने मालम हतु। ता डायलो लाडा ने बोलावीन तीने केदो। 10आखा माणहु पेले वारु अंगुर नो रोह आपे, अने जत्यार माणहु पीन छाक जाय, ता थोड़ोक हळको अंगुर नो रोह आपे, पण तु हजु लग वारलो अंगुर नो रोह राख रेलो।
11ईसु गलील ना काना ह़ेर मे पेली कावा जुदा-काम नी सेलाणी देखाड़ीन आह़फा नी बड़ाय देखाड़्यो। अने आहयु देखीन ईसु ना चेला भरहो कर्या।
12 #
मत्ती 4:13
अळतेण ईसु आह़फा नी आह्य, अने भाय, अने आह़फा ना चेला ह़ाते कफरनहुम ह़ेर मे जत र्यो, अने तां थोड़ाक दाड़ा र्या।
ईसु नु मंदीर मे जवु
(मत्ती 21:12,13; मरकुस 11:15-17; लुका 19:45,46)
13युहदी माणहु नो फसह नो तीवार ह़ाते आय र्यो हतो। अने ईसु यरुसलेम मे ज्यो। 14अने तीहयो मंदीर मे बोळद्या, अने गाडरा अने पारवा वेचवा वाळा, अने पय्हा ना अदला-बदली करवा वाळा वेपार्या ने बह रेला देख्यो। 15अने तीहयो दोड़ा नो ह़ड़को बणावीन आखा गाडरा अने बोळद्या ने मंदीर मे गेथा बारा नीकाळ देदो, अने पय्हा ने खोळ्वी देदो, अने टेबल्या ने उथलाय देदो। 16अने पारवा वेचवा वाळा ने केदो, “ईमने आञे गेथा ली जावो। मारा बाह ना घोर ने हाट नु घोर ना बणावो।” 17तत्यार ईसु ना चेला ने फोम आयु के लीखलु से, “तारा घोर नी धुंद मने खाय जहे।”#भजन सहीता 69:9
18आहयी वात पोर युहद्या माणहु तीने केदा, “तु जे आहयु करे ता आमने काना जुदा-काम नी सेलाणी देखाड़?”
19 #
मत्ती 26:61; 27:40; मरकुस 14:58; 15:29 ईसु तीमने जपाप आप्यो, “आहया मंदीर ने ओदार देवो, अने मे आने तीन दाड़ा मे बांद देही।”
20युहद्या माणहु केदा, “आहया मंदीर ने बणाव्वा चाळीह़ ने छो साल लाग जेला से, अने तु ह़ुं तीने तीन दाड़ा मे बांद देही?”
21पण ईसु आह़फा ना डील ना मंदीर ना बारा मे केतो हतो। 22अने जत्यार तीहयो मरला मे गेथो जीवतो हय्न बठो हयो, ता अळी चेला ने फोम आयु के तीहयो आहयु केदलो हतो, अने तीहया चोखली सास्तर अने तीहया बोल पोर जे ईसु केदलो हतो, तीनी पोर भरहो कर्या।
ईसु माणहु ना मन ने जाणे
23जत्यार ईसु यरुसलेम मे फसह ना, तीवार मे हतो, ता घणात तीना जुदा-काम ने जे तीहयो करतो हतो देखीन तीना नाम पोर भरहो कर्या। 24पण ईसु आह़फा ने तीमना भरहा पोर नी सोड़्यो, काहाके तीहयो आखा ना मन ना वीच्यार जाणतो हतो, 25अने तीने जरवत नी हती के माणहु ना बारा मे कोय गवाय देय, काहाके तीहयो आह़फो जाणतो हतो के माणहु ना मन मे ह़ुं से?
Iliyochaguliwa sasa
युहन्ना 2: PPt2025
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Paliya Bible © The Word for the World International and Yisu Por Bherho Karanya Paliya Mandli, Rajpur, Barwani, MP, 2025
