ʻOBADIA 1
1
MOKUNA I.
1 Ka wānana no ka luku ʻana o kā ʻEdoma, no kona hoʻokiʻekiʻe a no kona inaina i nā mamo a Iakoba kona hoahānau. 17 No ka pōmaikaʻi i ka manawa ma hope.
1¶ Ka wānana a ʻObadia.
Pēnēia kā Iēhova ka Haku i ʻōlelo mai ai no ʻEdoma;
Ua lohe kākou i ka lohe ʻana mai Iēhova mai,
Ua hoʻouna ʻia aku ka ʻelele i waena o nā lāhui kanaka;
“E kū ʻoukou i luna, a e ala kūʻē kākou iā ia i ke kaua.
2“Aia hoʻi, ua hoʻolilo au iā ʻoe i mea ʻuʻuku i waena o nā lāhui kanaka;
Ua lilo ʻoe i mea hoʻowahāwahā loa ʻia.
3“Ua hoʻopunipuni ka haʻaheo o kou naʻau iā ʻoe,
E ka mea e noho ana ma nā ana o ka pōhaku,
He wahi kiʻekiʻe kou noho ʻana;
E ʻōlelo ana ma kou naʻau,
‘Na wai lā au e lawe iho i lalo i ka honua?’
4“Inā e hoʻokiʻekiʻe ʻoe iā ʻoe iho e like me ka ʻaeto,
Inā e hoʻonoho i kou pūnana i waena o nā hōkū,
Ma laila mai e lawe iho ai au iā ʻoe i lalo,” wahi a Iēhova.
5“Inā i hele mai nā ʻaihue i ou lā, inā he poʻe pōā i ka pō,
(Nani kou luku ʻia!) ʻAʻole anei lākou e ʻaihue, a pau ko lākou makemake?
Inā i hele mai nā ʻohi waina i ou lā, ʻaʻole anei lākou e waiho aku i ke koena?
6“Nani ka ʻimi ʻia ʻo kā ʻEsau!
I huli ʻia hoʻi kona mau wahi huna!
7“ʻO nā kānaka a pau o kāu berita, ua hoʻouna aku lākou iā ʻoe a i ka palena;
ʻO nā kānaka e kuʻikahi ana me ʻoe, ua wahaheʻe lākou iā ʻoe, a ua lanakila lākou ma luna ou;
ʻO ka poʻe e ʻai ana i kāu berena, ua waiho lākou i ka hei ma lalo iho ou;
ʻAʻohe naʻauao i loko ona.
8“ʻAʻole anei au e luku aku i ka poʻe ʻike, mai ʻEdoma aku ia lā,” wahi a Iēhova,
A me ka naʻauao mai ka mauna o ʻEsau aku?
9“A e weliweli kou poʻe kānaka ikaika, e Temana,
I ʻoki ʻia aku kēlā kanaka kēia kanaka, mai ka mauna o ʻEsau aku.
10¶ “No ka luku ʻana a no ka hana ʻino i kou hoahānau iā Iakoba, e uhi mai ka hilahila iā ʻoe,
A e luku loa ʻia aku ʻoe.
11“I ka lā i kū ai ʻoe ma kēlā ʻaoʻao,
I ka lā i lawe pio aku ai nā malihini i kona ikaika,
A komo ko nā ʻāina ʻē i loko o kona mau puka pā,
A hailona lākou no Ierusalema,
Ua like hoʻi ʻoe me kekahi o lākou.
12“ʻAʻole naʻe i pono kou nānā ʻana i ka lā o kou hoahānau,
I ka lā o kona malihini ʻana;
ʻAʻole hoʻi he pono kou hauʻoli ʻana ma luna o nā mamo a Iuda,
I ka lā i luku ʻia ai lākou;
ʻAʻole pono kāu ʻōlelo hoʻokiʻekiʻe ʻana i ka wā i pilikia ai lākou.
13“ʻAʻole pono kou komo ʻana i loko o ka puka o koʻu poʻe kānaka, i ka lā o ko lākou make;
ʻAʻohe pono kou nānā ʻana i ko lākou pōʻino i ka lā i make ai lākou,
A me kou kau ʻana i kou lima ma luna o kona waiwai i ka lā o kona luku ʻia ʻana.
14“ʻAʻohe pono kou kū ʻana ma ka huina alanui e ʻoki aku i kona poʻe i pakele;
ʻAʻohe pono kou hāʻawi lilo ʻana i kona poʻe i koe, i ka lā pilikia.
15¶ “No ka mea, ua kokoke mai ka lā o Iēhova ma luna o nā lāhui kanaka a pau;
Like me kāu i hana aku ai, pēlā e hana ʻia mai ai ʻoe;
ʻO kāu hoʻopaʻi ʻana, e hoʻihoʻi ʻia mai ia ma luna o kou poʻo.
16“No ka mea, like me ʻoukou i inu ai ma luna o koʻu mauna hoʻāno,
Pēlā e inu mau ai nā lāhui kanaka a pau;
A e inu lākou, a e moni iho,
A e like auaneʻi lākou me nā mea ʻole.
17“Akā, ma ka mauna ʻo Ziona he mea e pakele ai, a he mea laʻa;
A e loaʻa i ko ka hale o Iakoba ko lākou noho ʻana.
18“A lilo ko ka hale o Iakoba i ahi,
A ʻo ko ka hale o Iosepa i lapalapa;
A ʻo ko ka hale o ʻEsau i ʻōpala,
A e hoʻaʻā i waena o lākou, a e hoʻopau iā lākou;
ʻAʻohe mea e koe ana o ko ka hale o ʻEsau”;
No ka mea, ʻo Iēhova kai ʻōlelo mai.
19A e loaʻa i ko ke Kūkulu Hema ka mauna o ʻEsau,
A i ko ka pāpū ko Pilisetia;
A e lilo nō lākou ka ʻāina ʻo ʻEperaima, a me ka ʻāina ʻo Samaria;
A e lilo ʻo Gileada no Beniamina.
20A ʻo ka poʻe pio o kēia poʻe kaua o nā mamo a ʻIseraʻela,
E lilo nō lākou ko Kanaʻana a hiki i Zarepata;
A ʻo ka poʻe pio no Ierusalema ma Separada,
E lilo nō lākou nā kūlanakauhale o ke Kūkulu Hema.
21A e piʻi mai nā mea hoʻōla ma ka mauna ʻo Ziona,
E hoʻopaʻi i ka mauna o ʻEsau;
A e lilo ke aupuni no Iēhova.
Iliyochaguliwa sasa
ʻOBADIA 1: KBH
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ka Baibala Hemolele © Partners Development Foundation, 2018.