Utom Mme Abọsịd 13
13
1Mme andikpeeb ye mme prọfed emaeba ke ufọkabasi ke Antiọk: Banabas, Simiọn e-ekekoodo Naiya, Lusiọs awo Siriin, Manen (a-akedʌññọ ye adaiwuod ukara, Herọd) ye Sọọl. 2Ke ini ammọ ekesʌkkọ ekpono Abasi enyʌñ etre udia, Adisana Sịbidịd amaabo ate, “Isio Banabas ye Sọọl inịm innọ miin asaña-asaña ke abaña utom a-ami ñkoodo ammọ mbo edinam.” 3Ndin ke ammọ emaeketie utreudia enyʌñ ebọñ akam, ammọ emaedot Banabas ye Sọọl ubọk, enyʌñ esio ammọ unyọñ.
Sọọl ye Banabas Ekaa Saiprọs
4Ammọ awo iba se Adisana Sịbidịd akedọñ utom emaekaiya Selosia enyʌñ edʌk ubom do ewat ekewuọ Saiprọs. 5Ke emaekewuọ Salamis, ammọ emaekwọrọ ikọ Abasi ke mme sinakọk mme Yuu. Yọọn amaaba ye ammọ nte anọ unwam.
6Ammọ emaesaña ke afịd isọñ isu ado (utan a-mmọọñ akannake akʌk) tutu edisịm Pafọs. Do, ammọ emaekịt abiaidiọñ keed, awo Yuu a-akedooho prọfed abiaña a-akekereke Baa-Yisọs. 7Anye akeba nte awo unwam anọ ekamba awo ukara akọnsịn, Seyius Pọlus. Ekamba awo ukara akọnsịn ami, adiọọñọ ñkpọ awo, amaadọñ ekekoot Banabas ye Sọọl sia anye amaayem adikop ikọ Abasi. 8Ado Elimas, abiaidiọñ (sia se anyịñ amọ awuọñọ adodo) amaayem ibiọọñọ ammọ anyʌñ ayem usʌñ adiwọññọ ekamba awo ukara akọnsịn ñkpọñ usʌñ mbuọdidem Abasi. 9Sọọl, a-akenyʌññọ akere Pọọl, a-akeyọhọke ye Adisana Sịbidịd, amaasak iso ase Elimas ate, 10“Afo ado ayịn setan ye asua nti ñkpọ! Afo ameyọhọ ye afịd aduuk abiaña ye ñkara. Nte afo uduutreke adisịn abiaña ye ubiọọñọ ke ndinen usʌñ Abọọñ? 11Idahami ubọk Abọọñ udodo fiin ke idem. Afo ayaakanna ado nnan ke etək ini, ini ayaaba a-afo umuuduukịtte unwana utịn aba.”
Ataa idahado ntuhube ye ekịm emaefʌk anye, anye amaadutịn usʌñ, ayem awo se imʌm anye ubọk. 12Ke ekamba awo ukara akọnsịn amaakekịt se ikiitịppe, anye amaanịm ke akpanikọ, sia idem amaakpa anye ke se Pọọl akekpeep anye abaña Abọọñ.
Pọọl ye Banabas Ekaa Antiọk ke Pisidia
13Ke emaekekpọñ Pafọs, Pọọl ye nsaña amọ emaewat ekebeghe ke Peka ke Pamfilia. Do ke Yọọn akekpọñ ammọ atịmme anyọñ Yeruselem. 14Ke emaekekpọñ Peka ammọ emaeboiyo ekaa Antiọk a-asịneke ke Pisidia. Ke usen Sabad ammọ emaedʌk eketie ke sinakọk. 15Ke emaekekoot ñwed Mbed ye mme Prọfed ema, mme andikara sinakọk emaedọñ ekedọkkọ ammọ ete, “Nditọete, akpedo emenie ikọ nsọọñọidem aditañ nnọọ mme awo, mbọk ika iso itañ.”
16Pọọl amaadakka ada, adịppe ubọk ke anyọñ abo: “Nditọ Isrel ñnyịn ye ndufo mme Gentile e-ekponoke Abasi, ikpañ utọñ innọ miin! 17Abasi nditọ Isrel amaamek mme eteete ñnyịn; amaanyʌñ anam ammọ eforo ke ini ammọ ekebaaha ke Iyib; ke akpọsọñ adudu ke anye akeben ammọ awuọ ke idʌñ ado; 18anye amaayọ ido#13:18 Usʌk mme ikpañwed ewet anye amaase ñkpọ abaña ammọ ammọ ke ñkpọ nte isua aba ke anaan; 19anye amaasobo mme idịd itiaba ke Kenan, anyʌñ ayaak isọñ ammọ anọ Isrel nte inie ammọ. 20Afịd adinam ami akedat itie ke ñkpọ nte isua ikie inaañ mme aba mme duob.
“Ke ado amaakeboiyo, Abasi amaanọ ammọ mme akpeikpe tutu adiwuọ ini prọfed Samwel. 21Akema ammọ emaeyem adidem ndin Abasi amaanọ ammọ Sọọl, ayịn Kis, a-aketooho ekpək Benyamin, a-akekarake ke isua aba. 22Ke amaakedooro Sọọl ke ifịm ukara, Abasi amaanam Defid ado adidem ammọ. Abasi amaatañ abaña anye abo: ‘Ami mmekịt Defid ayịn Yesi nte awo e-esịd mmi amaaha; anye ayaanam afịd ñkpọ se ami ñyem anye anam.’
23“Abasi amaanọ Yisọs, Andinyaaña asọk Isrel ato ke ubon Defid kpa naña anye akenwọñọ. 24Mbemiso Yisọs akedi, Yọọn amaakwọrọ adikappa esịd ye uduọkmmọọñ anọ afịd mbon Isrel. 25Ke ini Yọọn akeyemme ikweeñe utom amọ, anye amaabo ate: ‘Ndufo ekere ebo ke ami ndo anie? Ami ndooho anye a-ndufo eyemme. Ado a-aba anye añkeeneke miin ke edem, a-adooho ami ndotto aditat udʌk ikpaukod amọ.’
26“Nditọete, nditọ ubon Ebraham ñnyịn ye ndufo mme abaak Abasi ke atu mme Gentile, ado ñnyịn ke ekenọọ etob adinyaaña ami esọk. 27Mbon Yeruselem ye mme andikara ammọ ikidiọọñọke Yisọs, ado ke adibiide ikpe ñkpa nnọọ anye, ammọ emaenam mme ikọ a-mme prọfed esikoodo kwa Sabad awuọ asu.” 28Akpesʌkado a-ammọ imiikikịtte eti ntak a-anye akpedotto ñkpa, ammọ emaebo Pailed awot anye. 29Ke ammọ emaekenam afịd se ekewet ebaña anye, ammọ emaekekọññọ anye ke krọs enyʌñ ebuuk anye ke udi. 30Ado Abasi amaanam anye aset ke ñkpa, 31ndin ke uwak usen mbon e-ekesañake ye anye eto Kalili eka Yeruselem emaekịt anye. Ammọ edoñño ntiense enọ mbon ñnyịn idahami.
32“Ñnyịn idọkkọ ndufo eti etob: Se Abasi akenwọñọ anọ mme eteete ñnyịn, 33Abasi a-anam anye asu inọ ñnyịn, nditọ ammọ, ke anye adinam Yisọs aset ke ñkpa. Kpa nte ewette ke udiana Saam:
“ ‘Afo ado ayịn mmi;
mfịn ami mmekappa ubon fiin.’
34Abasi akenam anye aset ke ñkpa mbaak anye adikịt mbiara ke nsi-nsi. Nte Abasi atañña,
“ ‘Ami ñyaunọ fiin mme ndisana ye akpan nsọọñọnda adidiọñ añkenwọñọke nnọ Defid.’
35Ñko emaana etañ ke itie mfen:
“ ‘Afo uduunyʌññọ uyak adisana awo mfo akịt mbiara.’
36“Ke Defid amaakenam uduak Abasi ke emana amọ ama, anye amaadaiya ke Abọọñ; emaebuuk anye ye mme ete amọ ndin ikpọkidem amọ amaabu. 37Ado anye a-Abasi akenamma aset ke ñkpa ikikịtte mbiara.
38“Ke ntoro, mme ufan mmi, ami mmeyem nọ ndufo ediọọñọ ebo ke ato ke Yisọs ke ekwọrọ adifeen ke mme idiọọkñkpọ inọ ndufo sia mbed Moses ikanna ifeen afịd mme idiọọkñkpọ ndufo. 39Ato ke Yisọs enam afịd mme andinịm ke akpanikọ ebọkkọ ke afịd idiọọkñkpọ, utoppo ikpe a-ndufo imiikpikikanna inie ke idak mbed Moses. 40Ikpeme mbaak se mme prọfed eketañ aditịppe inọọ ndufo:
41“ ‘Sese, ndufo mbon nsaha,
iba ke ñkpaidem inyʌñ itak,
sia ami ñyaanam ñkpọ ke emana ndufo,
a-ndufo imiidiinịmme ke akpanikọ tutu amama,
akpekọm awo akpekidọọdọkkọ ndufo.’ ”
42Nte Pọọl ye Banabas ekewuọñọke ke sinakọk, mme awo emaebo ammọ ete yak ammọ emaana editañ ikọ ebaña mme ñkpọ ami ke udiana usen Sabad mfen. 43Ke ini atu awo emaekesuana ke ufọkabasi, uwak ke atu mme Yuu ye mme andikpono Abasi ke edu mme Yuu emaekeene Pọọl ye Banabas, e-eketañña ikọ ye ammọ, enyʌñ enam ammọ ediọọñọ ke afọn adika iso mba ke mfọn Abasi.
44Ke udiana usen Sabad mfen, akeyak etək adido afịd idʌñ ekebono nọ ekop ikọ Abasi. 45Ke mme Yuu emaekekịt mme atu awo, ufịb amaadʌk ammọ esịd ndin ammọ emaebiọọñọ Pọọl ke se anye aketañ enyʌñ etañ ikọ ke ido usọñanyen ye eniin.
46Pọọl ye Banabas emaebọọrọ ammọ uko-uko ete: “Akena ñnyịn ibem iso itañ ikọ Abasi inọ ndufo. Sia ndufo emesịn adibọ ikọ Abasi, inyʌññọ ibat idem ndufo nte mbon e-edotto nsi-nsi uwem, idahami ñnyịn imibiide adiwọññọ ñkeene mme Gentile. 47Sia ntom ke Abọọñ inọọ ñnyịn ewʌhọ abo inam:
“ ‘Ami mmunam fiin ado unwana anọ mme Gentile,
nọ afo aben adinyaaña aka ke mme utịd ederimbod.’ ”
48Ke ini mme Gentile ekekoppo ami, ammọ emaedaara enyʌñ ekpono ikọ Abọọñ; ndin afịd mbon e-ekesioho enịm enọ nsi-nsi uwem emaenịm ke akpanikọ.
49Ikọ Abasi amaasuana ke afịd ñkañ udo. 50Ado mme Yuu emaedọọñ ibaan e-ekebaaha Abasi enyʌñ enie ñkoñ-ñkoñ idaha ye mme awuọiso ideen ke abio. Ammọ emaeben ukọbọ ekeene Pọọl ye Banabas, enyʌñ ebịne ammọ esio ke ukañ ammọ. 51Ado Pọọl ye Banabas emaekeñ ntan ñkpad ebon enọ ammọ nte ñkpọ ndʌdutọñ, ndin emaeboiyo ekaa Aikonium. 52Ndin mme mbed emaeyọhọ ye idaara ye Adisana Sịbidịd.
Iliyochaguliwa sasa
Utom Mme Abọsịd 13: ICB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
