ᐁᐠᓴᑕᐢ 5
5
1ᓈᑫ ᐃᔨᑯᕽ ᒫᑲ ᒧᓯᐢ ᒥᓇ ᐁᕒᐊᐣ ᑭ ᐯᑐᑫᐋᐧᐠ, ᐁ ᑭ ᐃᐧᐦᑕᒪᐋᐧᒋᐠ ᐯᕒᐅᐊᐧ, ᐅᒥᓯ ᐃᑌᐧᐤ ᑳ ᑎᐯᔨᐦᒋᑫᐟ ᐅ ᑭᓭᒪᓂᑐᒪ ᐃᐢᕒᐁᐃᓬ, ᐸᑭᑎᓂᐠ ᓂᐟ ᐊᔨᓯᔨᓂᒪᐠ ᑭᑕ ᓯᐯᐧᑌᒋᐠ, ᑭᑕ ᓇᑕᐃᐧ ᑎᐱᑐᑕᐃᐧᒋᐠ ᐃᐧᑯᑫᐃᐧᐣ ᐱᑲᐧᑕᐢᑭᕽ. 2ᐯᕒᐅ ᒫᑲ ᐅᒥᓯ ᑭ ᐃᑌᐧᐤ, ᐊᐁᐧᓇ ᐊᓇ ᑳ ᑎᐯᔨᐦᒋᑫᐟ ᑭᑕ ᓇᑐᐦᑕᐊᐧᐠ ᑭᑕ ᐸᑭᑎᓇᑭᐠ ᒫᑲ ᐊᓂᑭ ᐃᐢᕒᐁᐃᓬ? ᓇᒪᐃᐧᔭ ᓂ ᑭᐢᑫᔭᒫᐤ ᑳ ᑎᐯᔨᐦᒋᑫᐟ, ᒥᓇ ᓇᒪᐃᐧᔭ ᓂ ᑲ ᐸᑭᑎᓈᐊᐧᐠ ᐊᓂᑭ ᐃᐢᕒᐁᐃᓬ. 3ᐅᒥᓯ ᒫᑲ ᑭ ᐃᑌᐧᐊᐧᐠ, ᐅ ᑭᓭᒪᓂᑐᒥᐋᐧᐊᐧ ᐦᐃᐸᕒᐅᐊᐧᐠ ᓂ ᑭ ᓇᑭᐢᑳᑯᓈᐣ, ᐸᑭᑎᓂᓈᐣ ᑭ ᐸᑯᓭᔨᒥᑎᓈᐣ, ᑭᑕ ᐃᑐᐦᑌᔮᕽ ᓂᐢᑐ ᑭᓯᑳᐤ ᐱᒥᐱᒋᐃᐧᐣ ᐃᔨᑯᕽ ᐱᑲᐧᑕᐢᑭᕽ, ᑭᑕ ᐸᑭᑎᓈᓱᐢᑕᐋᐧᔮᕽ ᑳ ᑎᐯᔨᐦᒋᑫᐟ ᓂ ᑭᓭᒪᓂᑐᒥᓈᐣ; ᐁᑳ ᑭᑕ ᐸᑲᒪᐅᑯᔮᕽ ᑯᑕᑳᐢᐱᓀᐃᐧᐣ ᐅᐦᒋ ᐊᐦᐳ ᐃᓴᐁᐧᐢᐠ ᐅᐦᒋ. 4ᐃᒋᑊᐟ ᑭᐦᒋ ᐅᑭᒫᐤ ᒫᑲ ᐅᒥᓯ ᑭ ᐃᑌᐤ, ᑖᓀᐦᑭ ᑭᔭᐋᐧᐤ ᒧᓯᐢ ᒥᓇ ᐁᕒᐊᐣ ᑳ ᑭᐱᐦᒋᐋᔦᑯᐠ ᐊᔨᓯᔨᓂᐊᐧᐠ ᐁ ᐊᑐᐢᑫᒋᐠ? ᓇᑕᐃᐧ ᐅᑎᓇᒧᐟ ᑭᔭᐋᐧᐤ ᒥᓇ ᑭ ᓇᔭᒋᑲᓂᐋᐧᐊᐧ. 5ᐯᕒᐅ ᒫᑲ ᑭ ᐃᑌᐧᐤ, ᒫᑎᑲ, ᐊᔨᓯᔨᓂᐊᐧᐠ ᐁᑲᐧ ᒥᐦᒉᑎᐊᐧᐠ ᐊᐢᑭᕽ, ᐁᑯᓯ ᒫᑲ ᑭᐟ ᐊᔦᐧᐱᐦᐋᐋᐧᐊᐧᐠ ᐅ ᓇᔭᐦᒋᑲᓂᐋᐧᕽ ᐅᐦᒋ. 6ᐯᕒᐅ ᒫᑲ ᑭ ᐃᑕᓱᐋᐧᑌᐤ ᐁᐊᐧᑯ ᐁ ᑭᓯᑳᔨᐠ ᐅᐟ ᐊᑐᐢᑫᐃᐁᐧᒥᔨᐊᐧ ᐊᓂᐦᐃ ᐊᔨᓯᔨᓂᐊᐧ ᒥᓇ ᐅᐟ ᐅᑭᒫᒥᔨᐊᐧ, ᐅᒥᓯ ᐁ ᐃᑖᐟ. 7ᓇᒪᐃᐧᔭ ᒥᓇ ᑭ ᑲ ᒥᔮᐋᐊᐧᐠ ᐸᐦᑫᐧᓯᑲᓇᐢᑲᐧ ᐊᔨᓯᔨᓂᐊᐧᐠ ᑭᑕ ᐅᓯᐦᐋᒋᐠ ᐊᓯᓂᑳᓇ ᑖᐱᐢᑯᐨ ᑲᔭᐦᑌ; ᑭᔮᒼ ᑭᑕ ᓇᑕᐃᐧ ᒧᓴᑭᓇᒫᓱᐊᐧᐟ ᐸᐦᑫᐧᓯᑲᓇᐢᑲᐧ. 8ᐊᓂᐦᐃ ᒫᑲ ᐁ ᐃᐦᑕᓯᔨᐟ ᑳ ᑭ ᐅᓯᐦᐋᐋᐧᐸᐣ ᐊᓯᓂᑳᓇ ᑭ ᑲ ᓇᔭᑕᐦᐋᐋᐧᐊᐧᐠ; ᓇᒪᐃᐧᔭ ᑭ ᑲ ᐋᒋᐃᐧᓇᒪᐋᐧᐊᐧᐠ ᐅᐟ ᐊᑐᐢᑫᐃᐧᓂᐋᐧᐤ; ᒋᑫᒫ ᐁ ᑭᐦᑎᒥᒋᐠ ᑳ ᐅᐦᒋ ᐃᑌᐧᐁᐧᑖᒋᐠ ᐁ ᐃᑌᐧᒋᐠ, ᐸᑭᑎᓂᓈᐣ ᑭᑕ ᓇᑕᐃᐧ ᐸᑭᑎᓈᓱᐢᑕᐋᐧᔮᕽ ᓂ ᑭᓭᒪᓂᑐᒥᓈᐣ. 9ᑭᔮᒼ ᐊᐊᐧᓯᒣ ᐊᑐᐢᑫᐃᐧᐣ ᑭᑕ ᓇᔭᑕᐋᐊᐧᐠ ᐊᓂᑭ ᐊᔨᓯᔨᓂᐊᐧᐠ, ᑭᑕ ᐊᑐᐢᑳᑕᐦᑭᐠ; ᑭᔮᒼ ᒫᑲ ᐁᑳᐃᐧᔭ ᑭᑕ ᐸᐱᓯᐢᑫᔨᑕᒪᐧᐠ ᐱᑯᓇᑕ ᐊᔭᒥᐃᐧᓇ.
10ᐊᓂᐦᐃ ᒫᑲ ᐅᑕᑐᐢᑫᐃᐁᐧᒥᐋᐧᐊᐧ ᐊᔨᓯᔨᓂᐊᐧᐠ ᒥᓇ ᐅᐟ ᐅᑭᒫᒥᐋᐧᐊᐧ ᑭ ᐊᐧᔭᐃᐧᐊᐧᐠ ᐁᑯᓯ ᐁ ᑭ ᑭᑐᑖᒋᐠ ᐊᔨᓯᔨᓂᐊᐧ ᐅᒥᓯ ᐁ ᐃᑖᒋᐠ, ᐅᒥᓯ ᐃᑌᐧᐤ ᐯᕒᐅ, ᓇᒪᐃᐧᔭ ᑭ ᑲ ᒥᔨᑎᓈᐋᐧᐤ ᐸᐦᑫᐧᓯᑲᓇᐢᑲᐧ. 11ᓯᐯᐧᑌᐠ, ᓇᑐᓇᒧᐠ ᐸᐦᑫᐧᓯᑲᓇᐢᑲᐧ ᐱᑯ ᐃᑌ ᑫ ᒥᐢᑲᒧᐁᐧᑫᐧ; ᐁᔨᐁᐧᕽ ᒫᑲ ᓇᒪᐃᐧᔭ ᑭᑕ ᐊᒋᐃᐧᓂᑳᑌᐤ ᑭᐟ ᐊᑐᐢᑫᐃᐧᓂᐋᐧᐤ. 12ᐁᑯᓯ ᒫᑲ ᐊᔨᓯᔨᓂᐊᐧᐠ ᑭ ᓯᓭᐧᐢᑳᐊᐧᐠ ᒥᓯᐁᐧ ᐁᐢᐱᒑᐠ ᐃᒋᑊᐟ ᐊᐢᑭ ᐁ ᒫᐊᐧᒋᐦᑖᒋᐠ ᐃᐢᑯᓵᐋᐧᒋᑲᓇ ᒥᐢᑯᐨ ᐸᐦᑫᐧᓯᑲᓇᐢᑲᐧ ᐁᑳ ᐁ ᐊᔮᒋᐠ. 13ᐅᑕᑐᐢᑫᐃᐁᐧᐊᐧᐠ ᒫᑲ ᑭ ᓂᓂᑭᒣᐊᐧᐠ ᐅᒥᓯ ᐁ ᐃᑖᒋᐠ, ᑎᐱᐸᔨᑖᐠ ᑭᐟ ᐊᑐᐢᑫᐃᐧᓂᐋᐧᐊᐧ, ᑕᐦᑭ ᑳ ᐃᓯ ᐊᑐᐢᑫᔦᐠ ᒣᐧᐦᒋ ᑳ ᑭ ᑐᑕᒣᐠ ᐁ ᒣᑳᐧ ᐃᐦᑕᑲᐧᑭ ᐸᐦᑫᐧᓯᑲᓇᐢᑲᐧ. 14ᐅᐟ ᐅᑭᒫᒥᐋᐧᐊᐧ ᒫᑲ ᐊᓂᑭ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᐊᓂᐦᐃ ᐯᕒᐅ ᐅᐟ ᐊᑐᐢᑫᐃᐁᐧᒪ ᑳ ᑭ ᑎᐯᔨᐦᑕᒧᐋᒋᐠ, ᑭ ᐸᐸᓴᐢᑌᐋᐧᐊᐧᐠ ᒥᓇ ᐁ ᑭ ᑲᑫᐧᒋᒥᐦᑭᐠ, ᑖᓀᐦᑭ ᐁᑳ ᑳ ᑭ ᑎᐱᑐᑕᒣᐠ ᑭᐟ ᐊᑐᐢᑫᐃᐧᓂᐋᐧᐤ ᑭᑕ ᐅᓯᐦᐋᔦᑯᐠ ᐊᓯᓂᑳᓇᐠ ᐅᑖᑯᓯᕽ ᒥᓇ ᐊᓄᐦᐨ ᑳ ᑭᓯᑳᐠ ᑖᐱᐢᑯᐨ ᑲᔭᐦᑌ?
15ᐁᑲᐧ ᒫᑲ ᐅᐟ ᐅᑭᒫᒥᐋᐧᐊᐧ ᐊᓂᑭ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑭ ᐯ ᓇᑕᐃᐧ ᒪᐃᐧᒧᐢᑕᐁᐧᐊᐧᐠ ᐯᕒᐅᐊᐧ, ᐅᒥᓯ ᐁ ᐃᑌᐧᒋᐠ, ᑖᓀᐦᑭ ᐅᒥᓯ ᑳ ᑐᑕᐊᐧᒋᐠ ᑭᐟ ᐊᑐᐢᑫᔮᑲᓇᐠ? 16ᓇᒪᐃᐧᔭ ᐸᐦᑫᐧᓯᑲᓇᐢᑲᐧ ᒥᔮᐊᐧᐠ ᑭᐟ ᐊᑐᐢᑫᔮᑲᓇᐠ, ᐁᑯᓯ ᒫᑲ ᓂᑎᑯᓈᓇᐠ, ᐅᓯᐦᐃᐦᑯᐠ ᐊᓯᓂᑳᓇᐠ; ᒫᑎᑲ ᒫᑲ ᑭᐟ ᐊᑐᐢᑫᔮᑲᓇᐠ ᐸᐸᓴᐢᑌᐋᐧᐊᐧᐠ, ᒫᑲ ᑭᐟ ᐊᔨᓯᔨᓂᒪᐠ ᑳ ᑐᑕᐦᑭᐠ. 17ᒫᑲ ᐅᒥᓯ ᑭ ᐃᑌᐧᐤ, ᑭ ᑭᐦᑎᒥᓈᐋᐧᐤ, ᑭ ᑭᐦᑎᒥᓈᐋᐧᐤ, ᐁᐊᐧᑯ ᒫᑲ ᑳ ᐅᐦᒋ ᐃᑌᐧᔦᐠ. ᐸᑭᑎᓂᓈᐣ ᑭᑕ ᓇᑕᐃᐧ ᐸᑭᑎᓈᓱᐢᑕᐊᐧᑭᐦᐟ ᑳ ᑎᐯᔨᐦᒋᑫᐟ. 18ᓂᔮᐠ ᒫᑲ ᓇᑕᐃᐧ ᐊᑐᐢᑫᐠ, ᒋᑫᒫ ᓇᒪᐋᐧᐨ ᑭ ᑲ ᒥᔨᑲᐃᐧᓈᐋᐧᐤ ᐸᐦᑫᐧᓯᑲᓇᐢᑲᐧ, ᐁᔨᐁᐧᕽ ᒫᑲ ᑭ ᑲ ᐸᑭᑎᓈᐋᐧᐊᐧᐠ ᒣᐧᐦᒋ ᑕᐦᑐ ᐊᓯᓂᑳᓇᐠ. 19ᐅᐟ ᐅᑭᒫᒥᐋᐧᐊᐧ ᒫᑲ ᐊᓂᑭ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑭ ᐋᐧᐸᐦᑕᒪᐧᐠ ᐋᔨᒪᓄᕽ ᐁ ᐊᔮᒋᐠ, ᐃᐢᐱ ᐁ ᑭ ᐃᑎᐦᒋᐠ, ᓇᒪᐃᐧᔭ ᑭᑕ ᐊᒋᐃᐧᐸᔨᐊᐧᐠ ᐊᓯᓂᑳᓇᐠ ᑕᐦᑐ ᑭᓯᑳᐤ ᑭᑕ ᐅᓯᐦᐋᔦᑯᐠ.
20ᑭ ᓇᑭᐢᑲᐁᐧᐊᐧᐠ ᒫᑲ ᒧᓯᐢ ᒥᓇ ᐁᕒᐊᐣ, ᒣᐢᑲᓈᕽ ᐁ ᓂᐸᐃᐧᔨᐟ, ᐯᕒᐅᐊᐧ ᐃᐧᑭᔨᕽ ᐁ ᐯ ᐅᐦᑐᐦᑌᔨᐟ. 21ᐅᒥᓯ ᒫᑲ ᑭ ᐃᑌᐧᐊᐧᐠ, ᑳ ᑎᐯᔨᐦᒋᑫᐟ ᑭ ᑲ ᐃᐧ ᑲᓇᐋᐧᐸᒥᑯᐋᐧᐤ ᒥᓇ ᑭ ᑲ ᐃᐧ ᐅᔭᓱᐋᐧᑎᑯᐋᐧᐤ; ᒋᑫᒫ ᑭ ᑭ ᐃᓯᑖᓈᐋᐧᐤ ᑭᑕ ᐸᑳᐧᑎᑲᐧᕽ ᓂᐟ ᐃᓯᐢᑖᐃᐧᓂᓈᐣ ᐁᓯ ᑲᓇᐋᐧᐸᐦᑕᕽ ᐯᕒᐅ ᒥᓇ ᐁᓯ ᑲᓇᐋᐧᐸᐦᑕᒥᔨᐟ ᐅᐟ ᐊᑐᐢᑫᔮᑲᓇ, ᑭᑕ ᐊᐢᑖᐋᐧᔦᐠ ᐃᓴᐁᐧᐢᐠ ᐅᒋᐦᒋᐋᐧᕽ ᑭᑕ ᓂᐸᐦᐃᑯᔮᐦᑭᐠ. 22ᒧᓯᐢ ᒫᑲ ᑳᐃᐧ ᑭ ᓈᑌᐤ ᑳ ᑎᐯᔨᐦᒋᑫᔨᐟ ᐅᒥᓯ ᐁ ᑭ ᐃᑌᐧᐟ, ᑌᐯᔨᐦᒋᑫᔭᐣ, ᑖᓀᐦᑭ ᑳ ᒫᔨᑲᓇᐋᐧᐸᒪᒋᐠ ᐅᑭ ᐊᔨᓯᔨᓂᐊᐧᐠ? ᑖᓀᐦᑭ ᑳ ᑭ ᐯ ᐃᓯᑎᓴᐦᐅᔭᐣ? 23ᒋᑫᒫ ᐊᐢᐱᐣ ᑳ ᐯ ᓈᑕᐠ ᐯᕒᐅ ᑭᑕ ᐱᑭᐢᑫᐧᔮᐣ ᑭ ᐃᐧᔪᐃᐧᓂᕽ, ᑭ ᒪᒋᑐᑕᐁᐧᐤ ᐅᐦᐃ ᐊᔨᓯᔨᓂᐊᐧ, ᐁᑯᓯ ᓇᒪᐋᐧᐨ ᐁᓇᑐᕽ ᑭ ᐸᐢᐱᐦᐋᐊᐧᐠ ᑭᐟ ᐊᔨᓯᔨᓂᒪᐠ.
Iliyochaguliwa sasa
ᐁᐠᓴᑕᐢ 5: KKMs
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
This Bible text is a corrected edition of the 1908 Western Cree Bible; it is in the public domain.
