Galatiya 1
1
Pauloŋo Galatiya Eŋane Kibi Qeke
1Paulo na aposolo. Eya ŋei edo mi biranangoi, me ŋei maneŋo aposolo urata maikalane mi biranange. Midakaka! Yemo Yesu Kristo so Kaisale Magak, eŋe Kristo seuseuwo ŋine ma wisikae kaki wiyeke, eto urata iwao bira nangoik. 2Naeso kimakopne narop gemaine ŋene korop Galatiya doku tau tau magu ŋinane kibi iwa motmaine.
3Magak Kaisale so Waom Yesu Kristo eto mosop so peyam ŋibonbik, wet menaŋ kotino bororom gekei.
4Kristo eŋe Magak Kaisale wane aŋaine teweke more, kepe wane masi tanik borikino ŋine makok-ŋoniyakane gegeine qaisik kaki paki, borikine-zane turuŋine seukke. 5Eya wane ŋene naso baŋem Kaisale eŋetine ora oi bakom kito tako rakot mawaka gekene! Weleka.
Kisi Maep Don Weku Pamaike
6Ŋine masi tanik yewa okanbi na ŋunbe paki, oŋane qaemaike, Kaisaleŋo Kristo wane maineinane ra more ŋine ŋidorake, pakimo ŋine ikop-kamde eŋe qeliŋka more, ŋine koso ari kisi maep kuneŋine maneo makatakmami. 7Kisi maep kuneŋine mane mi pamaike, midakaka, ŋei natne edo wet dereretŋine ma siuke more matali qetali mau paki, Kristo wano ra more eŋe edomka kisi maep mayakakatne, yewa mapap kamami. 8So ŋene ŋedomka kisi maep don eya ŋinano ra qelaŋan-gone, me qeliwo ŋine aŋelo maneŋo kisi maep eya ŋinano ra qelaŋange, ŋo ŋene kisi maep eya alakan kito ŋibongone, eya mo yewa yale mida, eya wane mo ŋei mane eŋe yale okaniyakeo, eŋe sora gerepko kesiyake. 9Ŋene mo alakan rene, yalewaka koso manerop rawe, ŋei mane eŋe kisi maep don ŋedo kito ŋidanŋem detkoi, yewa koso oŋo don kuneŋine mane mi kito ŋiboniyake, yale okane ŋei yewa eŋe sora gerepko kesiyake.
10Pakimo ŋine daleo wetkemami? Na don iwa ramaile, yewa mo ŋei edo naŋane detpi menage-yakane me? Kaisaleŋo naŋane detki menage-yakane ramaile? Midakaka! Kaisaleŋo naŋane detki menage-yakane. So na ŋei kelok don edani-kalane urataine mamaile me? Midakaka! Na ŋei kelok don edani-kaleo, yemo na Kristo wane urata ŋei mi okanikale.
Pauloŋo Aposolo Okangane Don Kisi
11Kimakopne, na koboboine ŋidanbe detpi, na kisi maep don kito ŋibonmaile, yewa ŋei maneŋo mi ra wakonge. 12Na ŋei mane wano ŋine kisi maep don eya mi makole, me ŋei maneŋo yewa mi kito ninge. I midakaka! Iwa yemo Yesu Kristo oŋom na kisi maep don yewa ra wakone sikan-nange.
13Kimakopne, ŋine na kine kine mo sogino okangole, eya wane don eya ŋine mo detkoi, na alakanka Yuda ŋei eŋane numa mogare gewe paki, masi tanik okangole, yewa ŋine mo detka warekoi, na Kaisale wane doku tau tau magu engu more matali qetali ebuwe doku tau tau maguŋo Kaisale wane urum okanmaike, eya siukkei wane okangole. 14Na aso ŋabokopne eŋane numa kine kine, eya togogole mogat-kole, so Yuda kimakopne naŋane tego eŋe korop yuwan-one more, Yuda eŋane numa eya welekatne warewe paki, kobobo-ineka mogat lukkole.
15Ŋo, siluŋ Kaisale eŋe nabokŋo mi neuki kotino metpe, naso yewaoka mo rakoke urata yewa maikalane biranange, wane ŋado baŋ oŋom naso motke, yewao na mawakon-nane more, eŋine wet maep-inane qelitine qekalane norake. 16Kaisale eŋe gipole na sikan-nange, so noŋo gipolane kisi maep don ra suwaewe paki, qelaŋ mali malip midaine panamango gekoi, ŋei ŋerep natne eŋe edangale, eya sikan nange, pakimo, ŋei natneŋo kito qesiŋ neukei wane dere qeka okane eŋano mi arikole. 17So na Yerusalem matko naŋane numa alakan aposolo natne mo alakane Waom eŋine dokoine gekoi, eŋe onikalane mi arikole. Eya midakaka, yemo na eya wane turuŋine na ikopka Arabiya kepeo onikalane ari eya gekole. Eya ŋine zinge more koso Damaskus matko arikole. 18Baŋ ŋado koma karewe qoekiso, na Yerusalem matko Petoro wano don auketane arikole, ari eya eŋerop soda etke so urata mama weku metkole. 19Naso yewao aposolo natne mane mi ongole, wekuku kakole yemo Yakop, Waom wane ŋole, eŋeka maratka more kaitine kakole.
20Kibi iwa qemaile, yemo welekatne Waom wane kaitko don wele, na isi mi ramaile, eya wane Kaisale ge qesiŋ-nannom!
21Eya wane ŋadino na mat natne Silisiya kepeo so Siriya wane kepe kotino pamaike, yewa yaup lolike arikole. 22Ŋo naso yewao Kristo wane doku tau tau magu natne Yuda kepeo gekoi, eŋe kaitne mi nangoi, so wet etke, eya nigatne pake. 23Eŋe weku natneŋo yemo naŋane don kisi iwa yale rau det okangoi, “Ŋei yewa alakanka ŋengu kito okan-ŋone wikile ŋebone geke, eya eŋe ukude mo naso iwao yemo mali malip wane kisi maep don yewa qe ŋabaka more matali qetali makeo, ŋine koso zinge wet maingeki paki, maine kisi maep kima okanka more koso ra wakonmaike.” 24Eŋe don yalewa dere more, Kaisaleŋo naŋano masi tanik kine mane make, yewa wane eŋe zok manerop Kaisale eŋetine ora ma waka oi bakom okankakoi.
Iliyochaguliwa sasa
Galatiya 1: onsNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2012, Wycliffe Bible Translators, Inc. All rights reserved.