EXODUS 25

Pathian Biakbûk sakna tûr thawhlâwm

(Exod. 35:4-9)

1 Lalpa chuan Mosia hnênah, 2“Israel fate chu thilpêk ka hnêna rawn hlân tûrin hrilh rawh. An phal ang ang rawn la rawh se. 3Rangkachak te, tangkarua te, dâr te, 4la dumpâwl te leh a sen te, la senlâr leh zai sîn te, kêl hmul te, 5berâm vun tihsen te, savun ṭha chi te; sitim thing te, 6chhit atân hriak te, hriak thiha telh tûr leh hâla telh tûr thil rimtui te; 7Efod#25:7 Efod hi chakai-khawrh-kawr kan tih ang deuh hi a ni âwm e, iptê pahnih a nei a, aienna tûr Urim leh Thumim an dah. La rawng chi hrang hrang leh rangkachak zaia tah a ni. leh âwmbela bel tûr Soham lung leh lungmantam te rawn keng rawh se. 8An zînga ka chên ve theih nân biakbûk min siamsak rawh se. 9Biakbûk chu a chhûng chei dân tûr nên lam a lem ka entîr che kha, khami ang chiah khân in sa tûr a ni.

Thuthlung Bâwm

(Exod. 37:1-8)

10“Sitim thingin#25:10 Sâp ṭawngin Acacia thing an ti, ram ṭauva ṭo chi a ni a, a hnai chu thil chârna gum kan tih hi a ni. bâwm, a dung tawng hnih leh a chanve, a vâng tawng khat leh a chanve, a sân lam tawng khat leh a chanve in siam tûr a ni. 11A pâwn lam leh chhûng lam chu rangkachak ṭha chiin in luan ang a, a tlâng chu rangkachak hlang ngatin in tuam chhuak bawk tûr a ni. 12Rangkachak beng pali siam ula, a ke pali-ah chuan vuah ang che u, lehlam lehlamah beng pahnih ve ve vuah ang che u. 13Sitim thingtlâwn pahnih siam ula, rangkachakin luan bawk rawh u. 14Sitim thingtlâwn chu bâwm zâwn nân a sîr bengah chuan rawlh ve ve ang che u. 15Thingtlâwn chu bâwmah chuan vuah reng tûr a ni a, lak sawn tûr a ni lo. 16Lungphêka thupêk ziak ka pêk tûr che chu a chhûngah dah ang che. 17Bâwm khuhna#25:17 Hebrai ṭawngin ‘Kaforet’ tih a ni, chu chu ‘chhîn,’ ‘khuhna’ tihna a ni. Letling hmasatuten ‘zahngaihna ṭhutphah’ tiin an letling. Hebrai ṭawng ‘kafar,’ ‘chhîn, khuh’ tih aṭang hian awmze thûk zâwk an chher chho, a bul berah chuan, ‘sual chhîn, khuh’ tihna a ni a, ‘sual ngaihdamna’ a kâwk a, Pathianin bâwm chhîn chung aṭangin sual a lo ngaidam a, a lo ṭawng ṭhinna hmun a nih avângin ‘zahngaihna ṭhutphah’ an vuah ta hial a. Bâwmah Dân bu a awm a, chu pawh chu a chhîn hian a khuh a ni. atân a dung tawng hnih leh a chanve, a vâng tawng khat leh a chanve, rangkachak hlîr phêk siam la.#Heb. 9:5. 18Cherub lem pahnih, rangkachaka siam, a chhera chher ngei, a chhîn hmâwr tawna dah tûr siam bawk ang che; 19a chhîn rangkachak nên a hmâwra rangkachak cherub lem awm chu sakhat a ni tûr a ni. 20Cherub-te chu an inhawitawn ang a, an thla an zâr ang a, bâwm chhîn chu a khuh vek tûr a ni. 21Bâwm chhûngah lungphêk pahnih ka pêk tûr che chu dah la, a chhîn chuan i khuh dâwn nia. 22Bâwm bulah chuan kan intâwk ṭhîn ang a, cherub pahnih, Thuthlung Bâwm chunga awm inkâr aṭang chuan ka rawn bia ang che a, Israel-te hnêna thu ka pêk tûr zawng zawng chu ka rawn hrilh ṭhîn ang che.

Chhang serh dahna dawhkân

(Exod. 37:10-16)

23“Sitim thingphêkin dawhkân i siam bawk tûr a ni; a dung tawng hnih, a vâng tawng khat, a sân lam tawng khat leh a chanve. 24Rangkachak hlangin luan chhuak la, a tlâng chu rangkachakin kâwm rawh. 25Zung li bawka hlai a sîr kâwmna siam la, a tlâng chu rangkachakin kâwm rawh.

26“Rangkachak beng pali siam bawk la, a ke awmna kilah vuah thliah ang che. 27A zâwnfung rawlhna tûr beng chu a tlâng kâwmna bulah dah ang che. 28Thing tlâwn, zâwnfung tûr, siam la, rangkachak luan ang che. 29Thlêng te, bêl te, uain thâwl te, uain bunna tûr note rangkachak hlangin siam tûr a ni. 30Dawhkân chu Thuthlung Bâwm bulah hûn tûr a ni. Ka hmaa dawhkânah chuan chhang serh a awm reng tûr a ni. #Lev. 24:5-8.

Khâwnvâr dahna

(Exod. 37:17-24)

31“Khâwnvâr dahna#25:31 Hebrai ṭawnga a hming chu ‘Minora’ a ni. A ziding nên zâr pasarih a awm a, a hmâwr bâwk chu a chhit tûr tui dahna niin a lang (Zak. 4:1-6). Tûnlaia an siamah chuan a hmâwr bâwk hi sathau khâwnvâr dah nân a hman theih. rangkachak hlîr hlakin i siam tûr a ni. A ngul leh a bul vâwng chu a chhera chher tûr a ni; a lu bâwk te, a chei mawina pangpâr kuhmûm leh pâr parh lemte nên chuan a inzawm vek tûr a ni. 32A kûngpui pêng aṭangin zâr paruk a pêng ang a, lehlam lehlamah zâr pathum ve ve. 33Zâr tinah a cheimawi nân theite pâr kuhmûm leh a pâr parh lem pathum zêl a awm tûr a ni. 34khâwnvâr ngul zidingah chuan a cheimawina theite pâr kuhmûm leh pâr parh lem pali a awm tûr a ni. 35A zâr chung zâwk leh hnuai zâwk inkârah pangpâr kuhmûm pakhat zêl a awm bawk tûr a ni. 36Pangpâr kuhmûm lem te, a zârte leh a zidingte chu rangkachak tlang sakhat aṭanga chher tûr a ni. 37Khâwnvâr zâr sarih lu bâwkte chu chhit tûrin siam la, han chhit chuan a hma lam ên rawh se. 38Khâwnvâr chhit vêl nâna hman tûr bakcheh leh meivâp dahna thlêng, rangkachak hlang hlakin siam bawk tûr a ni. 39Khâwnvâr bâwr leh a hmanruate siam nân rangkachak hlîr hlak kg. sawmthum leh panga hmang ang che. 40Tlânga a lem ka entîr che ang chiah khân uluk takin siam ang che. #Tirh. 7:44; Heb. 8:5.

Iliyochaguliwa sasa

EXODUS 25: MIZCLBSI

Kuonyesha

Shirikisha

Nakili