EXODUS 22
22
Lei chawi dân tûr
1“Miin bâwngpa emaw, berâm emaw a rûka, a talh emaw, a hralh emaw a nih chuan bâwngpa chu a lêt ngain a rûl ang a, berâm chu a lêt liin a rûl tûr a ni. 2-4A thil rûk chu a rûl ngei tûr a ni, rulhna a neih loh chuan a thil rûk rulh nân amah chu bawiha hralh tûr a ni. Bâwngpa emaw, sabengtung emaw, berâm emaw a rûk chu an la dam chuan a leh hnihin a rûl tûr a ni.
“Rûkru, zâna lût chu lo manin lo vaw hlum pawh ni se tual that a tling lo. Ni chhuah hnua tih a nih erawh chuan tual that a tling a ni. 5Miin a ran a chhuaha, mi lovah emaw, grep hmunah emaw tla-in mi lova thlai chu ei chhia sela, a ei chhiat zât chu a ran neitupa chuan ama thlaiin emaw, grepin emaw a rûl tûr a ni.
6“Miin ramah mei chhêm sela, ram kâng chuan mi lo kâng kaiin buh ding lai emaw, zai tawh dah khâwm emaw kâng sela, mei chhuahtu chuan a kâng chhia chu a rûl tûr a ni.
7“Miin mi dang pawisa emaw, thil man tam tham emaw kawlsak sela, a kawl chhûng chuan bo ta sela, rûkru tih a niha, rûkru chu man a nih chuan a rutu chuan a lêt hnihin a rûl tûr a ni. 8A rutu man a nih loh erawh chuan a kawltu chu rorêltu hmaah hruai tûr a ni a, a ru lo tih hriat nân chhia a chhamtîr tûr a ni.
9“Thil inchuh rêng rêng, bâwngpa emaw, silhfên emaw, thil hloh chhar emaw a inchuhate chu rorêltu hmaa hruai tûr a ni. Rorêltuin thiam zâwka a ruat chu a thiam lo zâwk chuan a lêt hnih a pe tûr a ni.
10“Miin sabengtung emaw, bâwngpa emaw, berâm emaw, ran dang emaw, a ṭhianpa enkawltîr sela, lo thi palhin emaw, hliam emaw lo tuarin emaw, suamhmang rualin an chhuhsak emaw ni sela, hretu dang an awm si loh chuan 11a kawltu chu biak inah hruai tûr a ni, a ṭhianpa ran chu a rûk a ni lo tih hriat nân chhia a chham tûr a ni. Ran chu a rûk a nih loh chuan a neitu khân a chân mai ang a, a kawltu khân a rulh a ngai lo. 12A rûk a nih erawh chuan a rûl tûr a ni. 13Sa seh a nih chuan a ei bâng ṭhenkhat, sa seh a nih hriatna a rawn la tûr a ni, sa seh chu a rulh a ngai lo. 14Miin mi dang ran a chhawr hawha, a neitu hmuh lohva inhliam emaw, thi palh emaw a nih chuan a hawhtu chuan a rûl tûr a ni. 15A neitu chuan a hmuh ve reng erawh chuan a rulh a ngai lo. Man neia hawh a nih pawhin, a hawh man chuan a huam a ni.
Sakhaw lam leh nun phung pangngaia awm dân tûr
16“Nula hnahkhat, tu ma la hual loh miin a ngaih chuan, nupui man pangngai a pe ang a, nupuiah a nei tûr a ni.#Deut. 22:28,29. 17Nula pain neih a phal tlat loh pawhin nula hnahkhat man pangngai a pe tho tûr a ni.
18“Mitthi thlûk chîng hmeichhia chu tihhlum tûr a ni. #Deut. 18:10,11.
19“Ran rîmtu chu tihhlum tûr a ni.#Lev. 18:23; 20:15,16; Deut. 27:21.
20“Lalpa hnênah ni lo, pathian dang hnêna inthawi chu tihboral daih tûr a ni. #Deut. 17:2-7.
21“In zînga hnam dang awm vete in tinawmnahin in tiduhdah tûr a ni lo; nangni pawh Aigupta ramah mikhuala in awm kha.#Exod. 23:9; Lev. 19:33,34; Deut. 24:17-18,19; 27:19. 22Hmeithai emaw, fahrah emaw in tinawmnah tûr a ni lo. 23In tihduhdah vaih chuan kei Lalpa hian an mangang au chu ka lo ngaithla ang a, 24ka thin a ur ang a, khandaiha sah hlum in ni ngei ang; in nupuite chu an hmeithai ang a, in fate pawh an fahrah ang.
25“Ka mite chu an retheih avânga tangka i pûktîr chuan tangka pûktîrtu dangte angin ti suh; a pung i ṭhîng tûr a ni lo. #Lev. 25:35-38; Deut. 15:7-11; 23:19,20. 26I vêngte puan dahkhama i hrên chuan ni a tlâkah i pe kîr leh tûr a ni. #Deut. 24:10-13. 27A mut huna intuamlumna a neih chhun a ni a; i pêk kîr loh chuan a mangang ka hnênah a lo au vang a, ka lo chhâng ngei ang, ka khawngaih ngei dâwn a ni. 28Pathian#22:28 Heb. lamah ‘Pathian’ tih a ni na a, rorêltu’ tihna a ni thei. ânkhum suh; in chunga rorêltu pawh ânchhia lawh suh. #Tirh. 23:5.
29“I thlai rah i seng zawhah, oliv hriak i sâwr zawh chuan min pêk tûr ang chu min pe thuai ang che.
30“I fapa hrin hmasak ber chu min pe tûr a ni. Chutiang bawkin i bâwng leh berâm no neih hmasak ber chu min pe tûr a ni; a pui hnute ni sarih a hne ang a, a ni riat ni chuan mi rawn pe tûr a ni.
31“Ka mite in ni a, in thianghlim tûr a ni; chuvângin, rama sa seh sa rêng rêng in ei tûr a ni lo, ui pe ang che u. #Lev. 17:15.
Iliyochaguliwa sasa
EXODUS 22: MIZCLBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.