JÃ 20
20
Jeju ɓai lo koit
(Oo Mat 28:1-8; Mrk 16:1-8; Luk 24:1-12)
1Go ndɔt kɨdasabang lo ndɔg kɨtanãimɨta kɨsĩ ritit, Mari Madelen aw dɔɓadt lon lo ar al ɓaitɔ. Oo unɨn mbal kɔ ta bulombalt. 2Kɨtɔ 'nten la ɔrr kɨ ngɔd, ɗe ro Simõ Pierrt, kɨ ngendoon Jeju tara; eld an: Unɨn Bɨraɓe kɔ kam bulo mbalt na kɨ ger lon lanat al. 3Pierr kɨ ngendoo'n non tee awɨn dɔɓadt. 4Ɔsɨn ngɔd ɔrrɨn nat na ngendoo kɨmad ãi ngɔd tɔi Pierr tee dɔɓadt kete. 5Ned kɨber oo lo kɨ kamt, na oo kub nin to kɨber, na and kamt al. 6Kamla Simõ Pierr'n ɗe ko goat and bulombalt, oo kub nin to kɨber. 7Kɨ mindil tɔ ĩn to dɔ Jejut, to nat kɨ kub nin al, na i kɨ tet kam nat to kɨdang. 8Kamla ngendoo kɨmad'n non ĩn tee dɔɓadt kete ye, and oo, na ad kamɨn. 9Kɨtɔ gerɨn ta kɨ kam Maktubt al ɓaitɔ'n an: Kari na Jeju a ɓai ku ngékoit. 10Kɨtɔ 'nten ngéndoog tel awɨn ne ɓe lod gog.
Jeju tee hɔi kɨ ro Mari Madelent
(Oo Mat 28:9-10; Mrk 16:9-11)
11Mari ɗa tɨga ta bulombalt ɗa nõ. Lon ɗa nõ ye ned kɨ n'oo lo kɨ kam bulombalt. 12Oo malaikag joo kɨ kubg kɨndà ngũng rodt ndɨn lot'n dãro Jeju tot, kɨkɨɗa i ko dɔt, kɨɗa i ko njat. 13Ndɨjena anan: Dekɨdẽ, kɨtɔɗi i ɗa i nõ a?
Turd an: Kɨta kunɨn unɨn Bɨraɓe lom awɨn sia, na m'ger lon lanat al.
14Lon elta 'nten woi ye, mbel gidɨn oo Jeju ɗa dõ, na ger ta kiã Jeju al. 15Jeju ndɨjea an: Dekɨdẽ, i ɗa i nõ kɨtɔɗi a? I ɗa i sah nõ a?
Mari oo an i ngendɔɔ ad ndɨjea ta an: Dekɨdɨngã ĩla una i laa lot mad a ne, i ɔjɨm lon i laat nõ, kad m'aw m'una.
16Jeju ela an: Mari.
Mari mbel ela ta kɨta hebre an: Raboni. (Girra i titbe Ngendoo deg). 17Jeju ela an: Ot hɔm, kɨta m'aw dõ ro Bɔwmt al ɓaitɔ na aw ro ngankomt. Eld an: m'ndɨ m'aw dõ ro Bɔwmt kɨ Bɔwsɨ, m'aw dõ ro Luwaht lom kɨ Luwah losɨ. 18Taa ne Mari Madelen aw ɔrr hoia ngéndoog an: M'oo Bɨraɓe elɨm tag 'nten tɔ.
Jeju tee hɔi kɨro ngéndoogt lon
19Go ndɔt kɨ dasabang lo ndɔ tanãimɨta, ngéndoog utɨn tabit lot'n kawɨna kɨtit kɨta ɓool kɨ ɓoolɨn Juipg. Jeju ɗe lokɨsɔle ɗa dandt, eld an: Lapia kɨ dɔsɨt.
20Lon elta 'nten woi ye, ɔjd jin kɨ kadɨn, ngéndoog ɗan ronel dɔ koot'n oon Bɨraɓe. 21Jeju tel eld gog tɔ an: Lapia kɨdɔsɨt. Tit'n Bɔw lamɨn ye, titbe tɔ m'ndɨ m'lasɨn. 22Lon eld ta 'nten woi ye, to ko kamdt, na eld an: I taan Ndil Kɨkunjɗang. 23Ĩgɨn i nyan go majalg lod kɔ a ne, ĩn kɨ nyàgo kɔ, na ĩgɨn adɨn majalg lod hɔd sem a ne, a hɔnd sem tɔ ho.
Jeju tee hɔi kɨ ro Tomast
24Na lon Jeju ɗe ye, kɨkɨɗa ku ngéndoogt kɨ kɨla gidaijoo ad i Tomas'n a kunɨna ndɨngãg i nat sed al. 25Kɨtɔ 'nten ndeg ngéndoo madg elɨna anan.
J'oo Bɨraɓe. Tomas eld an: Ĩla m'oo got doo ngawg kɨ kam jiat, m'la ngon jim got doo ngawgt al a ne, m'am mad kamm al bat. 26Go ndɔgt kɨjijoo ngéndoog lo Jeju kawɨna kam kujt kɨkɨɗa nõ gog tɔ, na tabitg ĩn kɨ kut. Tomas i nat sed, kamla Jeju ɗe ɗa dandt el an: Lapia kɨdɔsɨt.
27Kamla el Tomas an: I la ngon jii ne, oo jim. I la jii ne ta bulo dɔt kɨkadmt. Ot ɓad, na ad kami. 28Tomas tura an: Bɨraɓe lom kɨ Luwah lom. 29Jeju ela an: Kɨta koo kɨ oom la adɨn kami ye. Ngéronelg la i ĩgɨn oon al na adɨn kamd ye.
Jã ndang maktub 'nten kad deg adɨn ne kamd Jeju i Ngon Luwah
30Jeju ɗa nyakɔj madg kɨ yaya ngãibe nõ ngéndoogt lon, na ĩn kɨ ndang kam maktubt 'nten al. 31Nyakɔjg kɨ yaya 'nten ĩn kɨndang kɨtakad adɨn ne kamsɨ Jeju i Krist kɨ Ngon Luwah, na kam kad kamt'n ndɨ adɨn ye kɨ i ngahn ne kumkajir kam tɔat.
Nu markerat:
JÃ 20: MlL
Märk
Kopiera
Jämför
Dela
Vill du ha dina höjdpunkter sparade på alla dina enheter? Registrera dig eller logga in
Mbai Bible Revision © Bible Society of Chad, 2015.
