JÃ 19
19
1Kamla Pilat ad'd Jeju ad ndana kɨ ndeh. 2Ngéɗɔɔg ɗan jɔg kon lan dɔat, na lan kub kɨkɨre gania roat. 3Kamla ɗen roat anan: Lapia Ngar lo Juipg. Ɗa tɨndana kɨ dajid. 4Pilat tee tɨga gog el Juipg an: Oon maj. M'ndɨ m'ɗe sia tɨga rosɨt, kɨtakad i gerɨn m'ngaa ta mad dɔat al.
5Kamla Jeju tee kɨ jɔg kon dɔnt kɨ kub kɨ kɨrre gania ront. Pilat eld an: Oon dekɨdɨngã ta. 6Lon ngéjanyamosɨkadkari kɨ ngéɗɔɔg oona ye, unɨn ndɨd kon ne, anan: I gaa kagdosɨt, i gaa kagdosɨt. Pilat eld an: Ĩn kɨɓeg kɨdɔsɨ awɨn sia i gana kagdosɨt. Kɨtɔ m'ngaa ta mad dɔat al.
7Juipg turɨna anan: Jĩ kɨ ndɨ kɨ mberkɨndag loj, na kɨgo mberkɨndat loj, sumba kad oi kɔ kɨta tel ron ngon Luwaht. 8Lon Pilat oo dɔ tan 'nten ye, tel ɓool kɨtɔi. 9Tel and kuj kõɓet gog, el Jeju an: I ɓai ko ɗa a? Na Jeju laat al. 10Kɨtɔ 'nten Pilat ela an: I lam tat ale? I ger, m'asɨ kad m'ɔrri, m'asɨ kad m'gai kagdosɨt ale?
11Jeju tura an: I ndɨ kɨ tɔg dɔmt al bat, na ĩla adɨn ko dõ tã. Kɨtɔ 'nten de kɨngelam jiit ɗa majal kɨbo tɔi.
12Dɔ tat'n non Pilat sah kɨ n'ɔrra, na Juipg kon mbiting, anan: Ĩla ɔrr de'n ɗan a ne i nam Sejar al. Ke dekɨɗen tel ron ngart a ne, ndɨ ndoor Sejar.
13Lon Pilat oo dɔ ta 'nten ye, ɗe kɨ Jeju tɨga ndɨ ber dɔ pong gangtat kam lot mad kɨ a kunɨna Dɨngɨrlo, na kɨ ta juip i Gabata. 14I ndɔ ɗago nyag kɨta Pakɨ. Nãi nderbe kad kàd ɗa dan ɓet. Pilat el Juipg an: Oon ngar losɨ.
15Na kon mbiting anan: I tɔla, i tɔla. I gaa kagdosɨt.
Pilat eld an: Kɨ m'ga ngar losɨ kagdosɨt e?
Ngéjamosɨkadkari kɨbog turɨn anan: Ngar loj mad goto, na Sejar tã.
16Kamla Pilat la Jeju jidt kad gana kagdosɨt. Kɨtɔ 'nten ɔrrɨn Jeju awɨn sia.
Gan Jeju kagdosɨt
(Oo Mat 27:32-52; Mrk 15:21-37; Luk 23:26-46)
17Jeju un kagdosɨ lon tee awɨn lot mad kɨ tɔa i lo kadɔ, na a kunɨna Golgota kɨ ta hebre. 18Nu la gana kagdosɨt kɨ deg madg joo. Kɨɗa ko mad, kɨɗa ko mad, na Jeju i dandt. 19Pilat ndang maktub ad lan dõ dɔ kagdosɨt. Ta kɨ ndang la ten: Jeju kɨ Najaret ngar lo Juipg. 20Juipg ngãibe dan ta kɨndang'n non kɨta lon gan Jeju kagdosɨt ye i nderbe kad ɓet. Ta kɨndang'n non i kɨ ta hebre, kɨ ta latin, kɨ ta grek tɔ. 21Ngéjamosɨkadkari kɨbog lo Juipg elɨn Pilat anan: Ot ndang, ngar lo Juipg, na maj kad i ndang titbe: El an: Mĩ ngar lo Juipg. 22Pilat tur an: Nya kɨ m'ndang woi, m'ndang, a to titbe.
23Lon ngéɗɔɔg gan Jeju kagdosɨt woi ye, ɔin kubg loa kegɨn girr sɔɔ, girr kɨɗa kɨta asɨgar kɨɗen. Na nãi kubji loa, kubji'n non i kɨkanj kur, i kɨ jo ta jo kɨtaagbe kɔat mbã ũ kɨber. 24Kɨtɔ 'nten elɨn na anan: Ot kad kɨ tilɨna, na ad kɨ yan yuk dɔt kad j'oon de'n a un.
Nya 'nten ɗa nya kɨtakad tɔlɨn ne ta ta kɨ kam Maktubt: Kegɨn na kubg lom kɨnadt yan yuk dɔ kubjit lom tɔ.
Ngéɗɔɔg ɗan nyag'non titbe. 25Na kad kagdosɨt lo Jeju kõa, kɨ ngonkõ kõa kɨdẽ, Maɗi kɨ nẽ Kleopas, kɨ Maɗi Madelen tɔ ɗant. 26Lon Jeju oo kon kɨ ngendoo lon'n tara ɗa lot'n non ye, el kon an: Dekɨdẽ oo Ngoni.
27Kamla el ngendoo lon an: Oo kõi.
Kaglot'n non ngendoo'n non una kɨɓe lon.
Jeju oi kagdosɨt
(Oo Mat 27:45-56; Mrk 15:33-41; Luk 23:44-49)
28Go nyagt 'nten Jeju ger kad nyag tube tɨgan woi ye, el an: Kɨnda õm.
El titbe kɨtakad tɔlɨn ne ta ta kɨ kam Maktubt. 29Lot'n non ndan ɓir mad kɨ kasɨnduu kɨ m'asɨ ɗoosa tit. Ngéɗɔɔg lan ndɔkɔrɔ kam kasɨnduut unɨn ne. Kamla lan ndɔkɔrɔ'n non ta kon kadnyat lan ta Jejut kad ãi. 30Lon Jeju ɔd man kɨ m'asɨ tant ye, el an: Nyag tube tɨgan woi.
Kamla ga dɔn kɨber, na nya ndilɨn ad tee.
Asɨgar mad ɔsɨ kad Jeju kɨ ninga
31Juipg kɔn Pilat kad tetɨn njad kɨ ɔrrɨnd kɔ. Ɗan titbe kɨta i ndɔ ɗago nyag kɨta Pakɨ na ndigɨn kad dãro deg ɗan kɨ dõ kagdosɨt ndɔ taakòt al, kɨta ndɔ taakò'n non i ndɔ kɨbo. 32Ngéɗɔɔg ɗen kɨ ro degt'n gand nat kɨ Jeju kagdosɨt, tetɨn nja kɨdasa kɨ kɨmad. 33Na lon ten dɔ Jejut ye oon oi kete ad tetɨn njaa al. 34Na kɨkɨɗa ku ngéɗɔɔgt ɔsɨ kada kɨ ninga; tentenbe mosɨ kɨ man ãint. 35De'n oo ye ma naja, najkɨma loa i rota tɔ. Kɨtɔkad ĩn tɔ adɨn ne kamsɨ. 36Kɨtɔ nyag 'nten ɗan nya kɨtakad tɔlɨn ne ta ta kɨ kam Maktubt: A tetɨn kɨngaa kɨɗa al bat. 37Ta mad kɨɗang kɨ kam maktub tɔ el an: A oon ĩn hã ɔsɨna kɨ ninga.
Duwɨn Jeju bulombalt
38Go nyagt 'nten Jojep kɨ ɓe loa i Arimatet kɨ i ngendoo lo Jeju, na ya dɔn kɨta ɓool Juipg ye, ndɨje Pilat kad nun dãro Jeju. Pilat nya ada. Taa ne Jojep ɗe un dãro Jeju. 39Nikodem'n maɗi aw ro Jejut ndɔ ye, ɗe kɨ myrr, kɨ aloes kɨ burnat. Kɔid i nderbe kad asɨ kɨlo dɔmɨta. 40Unɨn dãro Jeju dulona kɨ kub kɨnda kɨ nyag kɨ kootmbĩ, kɨgo nyabelɓe dub nint lo Juipg. 41Ndɔɔ mad i lot'n gan Jeju tit kagdosɨt. Bulo kɨkij i kam ndɔɔt'n non. Nin de tot nja kɨɗa al. 42Lot'n non la lan Jejut, kɨta i ndɔ ɗago nyag kɨta Pakɨ lo Juipg, na bulo mbal'n non i nderbe kɨtit.
Nu markerat:
JÃ 19: MlL
Märk
Kopiera
Jämför
Dela
Vill du ha dina höjdpunkter sparade på alla dina enheter? Registrera dig eller logga in
Mbai Bible Revision © Bible Society of Chad, 2015.
