Populära bibelverser från Romaanos 16

Dela

Tan aʼ quBʼaal Tiuxh, u aqʼol tetz bʼaʼnil t-taanima inqʼa xaol, toq eesan iqʼij u Satanaas, tul ech laʼ ulbʼel Satanaas, eche ipatxhʼax ka vaʼq kam jaqʼ toq vaʼq xaol. Echetz yeʼ vet laʼ toleʼv Satanaase setiʼ. Tul aʼ vibʼaʼnil u quBʼaal JesuKriisto laʼ atin sexoʼl sekaqaayil.

Pet toq val sete, ex inmol s-niman tetz Jesuus, uvaʼ laʼ etil etibʼ vatz inqʼa xaol, inqʼa nik txhokon tok txhʼaʼo sexoʼl tiʼ inqʼa txhusbʼal, inqʼa ootzaqimal vet etaʼn. Tul jetxhvaq el etibʼ kʼatz inqʼa xaol, inqʼa nik maqon ex tiʼ inqʼa bʼaʼnla txhusbʼal tiʼ u quBʼaal JesuKriisto, inqʼa nimamal vet etaʼn.

Tan inqʼa xaol inqʼae, tan jit aʼ koqxh nik titzʼa ibʼanax u taqʼon quBʼaal JesuKriisto. Pet aʼ kuxh kʼaqelaq taʼn inojaq tuul tuchʼ etxhbʼubʼal. Tan aʼaq kuxh isaʼ tel tzaqatz xaol t-bʼey tuchʼ iyolbʼetaq ok josqilla txhaq yol s-te. Tan kʼuqlel ikʼuul tzaqatz xaol, inqʼa niman tetz Jesuus s-tiʼ, tan telabʼalaqxh isutxhqʼil inqʼa iyol. Tul jitoq nik titzʼanaq bʼeeq tiʼ u kantxhaq nik motx ibʼaneʼ.

Tul nik vaqʼ ka ex tiqʼabʼ quBʼaal Tiuxh. Tan taʼn uvaʼe laʼ oleʼv tiʼ enuqtxakbʼat etibʼ tiʼ etatin s-kʼatza. Tan ech nik tal inqʼa bʼaʼnla txhaq yole inqʼa nik valeʼ. Tul ech nik tal inqʼae nik paxsan inqʼa bʼaʼnla txhaq yol tiʼ Jesuus. Tan ech nik tale inqʼa yol uvaʼ yaʼn vet nik taqʼ quBʼaal Tiuxh ootzaqiloq; inqʼa yol inqʼa kolelich kuxh taʼn quBʼaal Tiuxh tuulbʼal jatqʼix tzaan yaʼbʼ, inqʼa qat motx pay vet ka. Pet s-txheel, tan qat taqʼl vet quBʼaal Tiuxh qootzaqi inqʼa yol. Tul aʼ inqʼae, nik qupaxsa veteʼ, inqʼa yol uvaʼ motx itzʼibʼa ka inqʼa qʼexsanich tetz viyol quBʼaal Tiuxh tiʼ u quBʼaal JesuKriisto. Tul antxh quBʼaal Tiuxh, uvaʼ yeʼl iyaʼebʼal imotxebʼal, bʼekʼon ka oʼ tiʼ talaxeʼ. Tul aʼ uvaʼe, nik ipaxsal xoʼl jankʼal inqʼa xaol vatz txʼavaʼ. Tul laʼ qeex vet quBʼaal JesuKriisto taʼn, tul laʼ ok vet s-niman tetz. Tan vaʼl kuxh u quBʼaal Tiuxh uvaʼ taʼnxhte, uvaʼ aj txumbʼal. Tul yeʼl iyaʼebʼal imotxebʼal laʼ qoksat iqʼij tiʼ vilotxht oʼ u quBʼaal JesuKriisto. Tul echxh laʼ ibʼane.