Sânghkyang 26
26
Nghâ Bang Eq Sêng É Hkyô
1Buì lúm nám má gyo gyó le a htuk é su le,
kyô shu nám má maú wo le a htuk é su le,
xânghpoq nge wó hkyô gi, nghâ sû eq a htuk nghut ri.
2Jòhkyáng dâng jón wún é su le,
kyîshin dâng yôn wún é su le,
jumgú má nhîng é nhinghkun gi,
a zùq nghut ri.
3Myâng é matú gi, nuìchûm hkat nghut mù,
lozê é matú gi, nhuttsung nghut luî,
nghâ su é nùnghkung é matú gi,
wùmhtung nghut ri.
4Nghâ sû lé gi, yhang su taî é
ngha é dang dông hkâtû taí;
haû nghut jáng, nàng le,
yhang su dùt byùq râ nghut lhê.
5Nghâ sû lé gi, yhang su taî é ngha é dang dông tû taí aq;
haû a nghut jáng, yhang gi,
yhûmsing gùng yhûmsîng
hpàqchyî bò bun râ nghut lhê.
6Nghâ su lòq mai danglù hun kat é sû gi,
yhûmsing é hkyî hpyit pyâm é eq le,
myo-noq lé hkyom shuq é eq le du ri.
7Nghâ su é nhut mai htoq é sânghkyang gi,
hkyî hten su é hkyî dap mhaû tô é eq du ri.
8Nghâ sû lé xânghpoq nge wó nhang é gi,
laidán má lùqgòk tseshi tuî tap tô é eq du ri.
9Nghâ su é nhut mai htoq é sânghkyang gi,
î shuq wùt su é lòq mâ é zu ding eq du ri.
10Nghâ sû eq lám wún bang lé
langchyáng lung é sû gi,
yùq hkangmó lé dàm tap é
lai bik sû eq du ri.
11Hkui gi, yhang hpat tô é lé dum taû zô é su,
nghâ sû gi, yhang ngha pyâm é hkyô lé,
dum taû kut kut dùt ri.
12Yhûmsing é myòq hí má,
hpàqchyî bò bûn é byù lé myang wú ri lhú?
Haú yùq lé myòqbyù râ htoq,
nghâ sû lé myòqbyu le gi,
je ge ashî nghut ri.
13Haû lagon sû gi, “Hkyô má hkanghkyi nyi ri;
wà hkyô pé má htîm é hkanghkyi nyi ri.” ga taî ri.
14Hkum gi, hkumtáng má dum lhing ló é su,
lagon sû gi, yhâng é hpyang má dum taû ló ri.
15Haû lagon sû gi, yhûmsing é lòq lé,
auhkoq má làp to kôlhang,
lûm lagon luî, yhâng é nhut má
a kâm làp zô kat nghut ri.
16Haû lagon sû gi,
jô é dông ge tû taî é byù nyhit yùq htoq,
yhûmsing gùng yhûmsîng hpàqchyî bò bûn nyi ri.
17Yhûmsîng eq haî le a sêng é za,
dangnyhin nyhîn lhûm nyi é lé,
nhikjum ê yô shit é, hkyô lai sû gi,
hkui lé nohkyap mai ê lâng she é sû eq du ri.
18-19Yhâng é yhûmkyochang lé,
“Ngò ru gyâ lhê.” ga mhaû taî é sû gi,
myihu eq shi jung myoshi lé bìk kat é
byù na eq du ri.
20Htang a bò jáng, myî shi ló é su,
lùmu é hkyô a jòq jáng,
mabyòq jishûm zîm ló byùq ri.
21Byòq lhum byòq cheq dùt râ matú,
mabyòq jishûm lhoqhtoq é sû gi,
gyúng é myi má myigye kat jàt é eq le,
myi duq htoq má htang kat jàt é eq le du ri.
22Lùmù gànsang é dang pé gi,
chuî nghâm é zoshuq su nghut mù,
byu é ûnghkaû shut wang ló ri.
23Nhut ngón luî, agè ashop é i‑myìt bò sû gi,
tso-au má ngùn hkyi shup tô é eq du ri.
24Byù lé myìt nò nhâng nau é sû gi,
yhâng é nhut ngón kôlhang,
i‑myìt hkaû má mhaú zo hkyô baú byíng zan tô ri.
25Yhâng é dang gyô ngón dik kôlhang,
yhang lé hkâ lùmjíng; hkâsu mù gâ le,
yhâng é i‑myìt nhiklhum má,
achaq achyut hkyô nyhit hkat byíng tô ri.
26Yhang myìt nò nhâng nau é hkyô lé,
mhaú zô é hkyo èq wó haq nghop to kôlhang,
yhâng é agè ashop hkyô lé,
shiwa hpong má lhoqhtoq shit râ nghut lhê.
27Byù rayùq yùq dong dû é nghut jáng,
haú yùq gi, haú má byìt gyó wâng râ nghut lhê;
byù rayùq yùq lùqgòk lé lhêng é nghut jáng,
lùqgòk haû gi, yhâng é ahtoq mai lêng lai râ nghut lhê.
28Mhaû é nhutshô gi,
yhâng èq lhoqnho é bang lé,
a nguì nghut ri;
gyáng dang taî é nhut gi,
htên byòq hkyô lhoqhtoq ri.
Trenutno izabrano:
Sânghkyang 26: znot
Istaknuto
Kopiraj
Uporedi
Podeli
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2025, Wycliffe Bible Translators, Inc.