Zozué 10
10
Amoreu norĩ ãma da te i'ai'utézé wasu'u
1Tawamhã apito Adoni-Zédéqui Zeruzalẽ ãmamhã#10.1 Taha ré, 'ri nho'u Zeruzalẽ hã te zebuzeu norĩ ma, 're hâimana., ma tô Zozué 'ri nho'u Ai te te i'ârizé hã, uburé pese te te i'ri prubzé hã wapa, duré ite apito te te iwĩrĩzé hã. Tawamhã tô õne hã ma tô duré wapa, Zerico ma iromhâimanazé hã, duré apito ma. Duré Gibiã norĩ, Izaraéu nhihudu norĩ me dasi'wapéi ãna dasiré 're idahâimana za'ra mono zém na isisaze za'ra zé hã ma tô waihu'u, duré Izaraéu nhihudu norĩ wazari 're ihâimana za'ra mono zéb zama. 2Tawamhã Zeruzalẽ ãma 're ihâimana za'ra mono norĩ hã ma tô tipahi pese za'ra, 'ri nho'u Gibiã sa'ẽtẽ uptabi wa, 'ri nho'u hã dama i'rãnho'õmo nhimi'madâ'âzéb ré dama sa'ẽtẽ na 're ihâimana za'ra mono ne. Ai nhipai u sa'ẽtẽ uptabi di. Duré ite dasi'wapéi 'manharĩ'wa norĩ aibâ norĩ hã isib'ru si. 3Tahawa ma tô apito Adoni-Zédéqui rowasu'u'wa norĩ satõrĩ za'ra, ãne na romreme ré si'aba'ré da, Hebrõ na 'ri nho'õmo nhisi ãma apito Hoãhã u, Zamute na 'ri nho'õmo nhisi ãma apito Pirãhã u, Laqui na 'ri nho'õmo nhisi ãma apito Zapiaha u, duré Égrõ na 'ri nho'õmo nhisi ãma apito Débihi u:
4— We ĩtẽme ai'aba'réi wa'aba, Gibiã norĩ za wa te iwano'õ na asiwi ĩpawapto wa'aba da. E marĩ wa. Õ norĩ hã, Zozuéhé me sisaze za'ra wa, si'wapéi ãna za siré 're ihâimana za'ra mono na hã.
5Tawamhã amoreu norĩ te 5 na apito ma tô si'rã'õtõ, Zeruzalẽ hawimhã, Hebrõ hawimhã, Zamute hawimhã, Laqui hawimhã, duré Égrõ hawimhã. Ta norĩ hã ma tô tite dasi'wapéi 'manharĩ'wa norĩ hã 'rã'õtõ za'ra. Ma tô duré Gibiã hã siwi uirĩ. Tahawa, ma tô siwi sahu.
6Tawamhã ma tô Gibiã norĩ, Zozuéhé ma Gilgau ãma 'ri nhoré u ãne romreme hã tãma sõmri za'ra:
— Warẽme za'ra tõ! We aimorĩ ai'aba'ré na, wapawaptob za'ra da, duré wanho'reptu za'ra da! Uburé apito amoreu norĩ hã ẽtẽ ãma 're ihâimana za'ra mono hã ma tô wazada si'rã'õtõ!
7Tawamhã Zozué, tite dasi'wapéi 'manharĩ'wa norĩ me Gilgau hawi ma tô uburé tipra. 8Tawamhã Uburé Danhib'apito, te Zozuéhé ma tinha, ãne:
— Ã hã apito norĩ ma hã aipahi za'ra tõ. Wa hã wa tô aima sõmri siromo za'ra, asib'ratamhã. Tahawa ta norĩ hã tihâiba na te te aima wa'rãmi waihu'u za'ra õ di za.
9Tawamhã Gilgau hawi Zozué norĩ oto wairébé wamhã, ma tô marabâre sisarina ai'aba'ré. Tahawa, ma tô simiza'rese za'ra õ ré siwi sahu. 10Tawamhã Uburé Danhib'apito, amoreu norĩ 'rãi waihu'u ãna hâimana za'ra da hã ma tô tãma 'manharĩ za'ra. Ãne ma tô apito norĩ ãmamhã Izaraéu nhihudu norĩ hã ãma ai'uté za'ra, Gibiã ãma. Bete-Horõ nho'õmo bâdâdi i'rãsipra na isarina sisa'rei mono sina, ma te te pãrĩ, Azeca na 'ri nho'õmo nhisi u bâdâdi na, duré Maqueda na 'ri nho'õmo nhisi u bâdâdi na zama. 11Tawamhã Izaraéu nhihudu norĩ ma, Bete-Horõ bâdâdi i'rãsipra na Azeca u tãma sisa'rei mono wamhã, ma tô Uburé Danhib'apito hâiwa hawi tãzâ hã isitob'ru norĩ nhisiwimhã sa'wa. Tahawa ma tô õne haré ai'utõ. Tãnhama na da'ahâ uptabi na ma tô ai'utõrĩ ni, Izaraéu nhihudu norĩ te te idanhimro nhipai u hã.
12Tawamhã Izaraéu nhihudu norĩ ma, amoreu norĩ ãma Uburé Danhib'apito te te ãma i'ai'uté za'ra zé te te tãma isõmri za'ra zé bâtâ na, ma tô Zozué hã tãma tinha, Izaraéu nhihudu norĩ nho'a, ãne:
“Bâdâ, ma'ãpé Gibiã nhisi nho'õmoi baba asimizazâri!
Duré a'amo, ma'ãpé Aizarõ na romharé nhisi nho'õmoi baba asimizazâri!”
13Tawamhã bâdâ hã ma tô mazazâ. Duré a'amo zama ma tô mazazâ, tinhitob'ru norĩ na a'uwẽ isi'ruiwa'âbâ za'ra zéb u.
Ãhã na ãma irob'ui'éré hã te Zasa na ibaihâ nhisi 'remhã tihâiba.
Tawamhã ma tô hâiwa nho'õmo mazazâ bâdâ hã. Tahawa ma tô duré misi bâtâ wahuré na timorĩzéb upana hã tihâiba. 14Niwamhã taha bâtâ na ne iwana hã ihâimana õ, duré niwamhã za ãne hã ihâimana zahu õ, Uburé Danhib'apito aibâ mreme te te iwapari ne hã. Ãne ma tô tiromhâiba, Uburé Danhib'apito, Izaraéu nhihudu norĩ ãma si'wapéi wa.
15Ãne pari, ma tô Zozué norĩ, tite dasi'wapéi 'manharĩ'wa norĩ me hã apâ ai'aba'ré, Gilgau ãma romhâ 'manharĩ na 'ri nhoré u hã.
16Tahawa, 5 na apito norĩ ma tô aré dawi aimani za'ra, Maqueda ãma ẽtẽ wa ab're 're sima'uri za'ra da. 17Tane nherẽ, ma tô dasiwi upsibi nhamra ni. Tawamhã Zozuéhé ma, ma tô duré wasu'u ni, isima'uri za'ra zé hã.
18Tawamhã Zozué te ãne dama tinha:
— Nima norĩ ẽtẽ tõmo wawẽ hã ma'ãpé pizari za'ra wa'aba mono, ẽtẽ na ab're dawa u. Duré i'mairob'madâ'â za'ra wa'aba da hã niha asi'manhimizusi aba. 19Tane nherẽ, tamemhã asimroi wa'aba tõ. Ai'aba'réi wa'aba asitob'ru zarina. Daza'u isi'ubumro norĩ 'wapé za'ra wa'aba. Apâ tite 'ri nho'õmo u si'aba'ré da hã taré 'madâ'â za'ra wa'aba tõ, Uburé Danhib'apito wate za'ra 'Re ihâimana u'âsi mono te te aima sõmri za'ra wa'aba wa, si'utõrĩ pese da hã.
20Tawamhã Zozué, dasi'wapéi 'manharĩ'wa Izaraéu nhihudu norĩ me ma tô te te siwi pãrĩ uburé, aré te te siwi i'uprosizéb u. Dawi isimani za'ra norĩ si ma tô tite 'ri nho'õmo 'wawi wa'ra pese 'remhã dawi tihâimana za'ra. 21Tawamhã dasi'wapéi 'manharĩ'wa Izaraéu nhihudu norĩ, ma tô uburé rowẽ na hã apâ sina siri za'ra, Maqueda ãma romhâ 'manharĩ na 'ri nhoré u hã, Zozué ihâimanazéb u. Tawamhã oto ni'wa hã tinhiptete zarina te te nharĩ waihu'u õ di, Izaraéu nhihudu norĩ da, iromhâimanazéb da hã.
22E marĩ da te za bété ãne 're aihâimana za'ra wa'aba mo. Taha pari te Zozué hã dama tinha, ãne:
— Ẽtẽ wa ab're zadawa nhiti ẽne asiwi sa'réi wa'aba. Duré 5 na apito norĩ hã we ãwa asiwi simroi wa'aba mono.
23Tawamhã ma tô tô ãne hã tãma 'manharĩ za'ra. Zeruzalẽ ãma apito, Hebrõ ãma apito, Zamute ãma apito, Laqui ãmap te hã, duré Égrõ ãmap te hã, ẽtẽ na ab're hawi te te siwi sani za'ra wamhã, 24ma tô Zozuéhé tẽmemhã te te siwi simro. Tahawa, Zozué te sô tihârâ za'ra, aibâ norĩ Izaraéu nhihudu zô. Duré isiré isi'aba'ré norĩ ma hã ma tô tãma waihu'u za'ra, dasi'wapéi 'manharĩ'wa norĩ 'madâ'â'wai ma, ãne:
— We ãwa ai'aba'réi wa'aba, ã hã apito norĩ butu nhisiwi, aipara hã sõré wa'aba da.
Tahawa ma tô ãne ta norĩ hã tãma 'manharĩ za'ra. 25Tawamhã Zozué te duré ãne tãma nharĩ za'ra:
— Aipahi za'ra wa'aba tõ. Duré aiwi robzei'õ za'ra wa'aba tõ. Asiptete za'ra wa'aba, duré asib'ru za'ra wa'aba. E marĩ wa. Uburé Danhib'apito te za ãne hã tinhitob'ru norĩ ma te te 're a'manharĩ, uburé za asiwi 're i'wapé za'ra wa'aba mono norĩ ma.
26Tawamhã Zozué ma tô apito norĩ hã simro. Ma tô duré wede 5 na isimasam na hâiwi sasõmri za'ra. Tahawa, ãma imara za'ra zéb u ma tô hâiwim haré amnhatã u'âsi. 27Tawamhã oto bâdâ zébré wamhã, ma tô Zozué hã dama 'ru za'ra, wede hawi, da te dasiwi wamirĩ wa, duré da te dasiwi sãmra da, ẽtẽ na ab're wa, dawi isima'uri za'ra zéb 're. Tawamhã ẽtẽ tõmo wawẽ norĩ ma tô ab're zadawa ãma siwi sa'ra. Ta hawim haré te zahadu ãhã na zama 're simi'wara u'âsi, tamemhã.
Zozué te te duré da'ãma i'ai'uté hâiba amo zé wasu'u
28Tawamhã Zozué, to taha bâtâ na Maqueda te te sahui wamhã, ma tô ti'â. Apito ma tô duré tiwĩ. Duré uburé 'ri nho'õmo wa, 're ihâimana za'ra mono norĩ hã ma tô uprosi. Tahawa, ni'wa hã hâiba ré hâimana õ di. Ãne ma tô Zerico ãma apito ma, te te i'manharĩzém ne hã 'manha, Maqueda ãma apito ma hã.
29Taha pari, Zozué, tite dasi'wapéi 'manharĩ'wa norĩ me ma tô ai'aba'ré, Maqueda hawi, Libna na 'ri nho'õmo nhisi u hã. Tawamhã ma tô ta norĩ zama sahu za'ra. 30Tawamhã Uburé Danhib'apito hã, 'ri nho'õmo ãma, duré apito ãma te te ãma ai'uté za'ra da hã ma tô tãma sõmri za'ra, Izaraéu nhihudu norĩ ma. Tahawa ma tô uburé iwa 're ihâimana za'ra mono norĩ hã siwi uprosi. Zerico ãma apito ma te te tãma i'manharĩ za'ra ne, ma tô Libna ãma apito ma hã siwi rob'manha.
31Taha pari, Zozué norĩ tite dasi'wapéi 'manharĩ'wa norĩ me ma tô Libna hawimhã ai'aba'ré, Laqui u hã. Tawamhã 'ri nho'u te te siwi uirĩ wamhã, ma tô duré siwi sahu. 32Tawamhã maparane bâtâ ãma dasi'wapéi ãmamhã, ma tô Uburé Danhib'apito, Izaraéu nhihudu norĩ ma hã sõmri za'ra, Laqui ãma te te ãma i'ai'uté za'ra zéb da hã. Libna ma, te te i'manharĩ za'ra zém ne, ma tô duré uburé siwi da'uprosi, Laqui ãmamhã. 33Tawamhã apito Horã, Geze na 'ri nho'õmo nhisi te hã ma tô watobro, Laqui te te pawaptob da hã. Tane nherẽ, ma tô Zozué hã ãma ai'uté apito ãmamhã, duré isib'a'uwẽ norĩ ãmamhã. Ni'wa hâiba ré hã te te rẽme õ di.
34Tawamhã Zozué norĩ, tite dasi'wapéi 'manharĩ'wa norĩ me ma tô Laqui hawimhã ai'aba'ré, Égrõ u. Sihutu wamhã, ma tô 'ri nho'u siwi uirĩ. Ma tô duré ta hã siwi sahu. 35Tahawa, ma tô duré tô taha bâtâ na siwi ti'â. Tawamhã Laqui ma te te i'manharĩ za'ra ne, ma tô duré uburé pese siwi da'uprosi.
36Tawamhã Zozué norĩ, tite dasi'wapéi 'manharĩ'wa norĩ me ma tô Égrõ hawimhã ai'aba'ré, 'ri nho'u Hebrõ u. Tahawa ma tô duré siwi sahu, ta norĩ hã. 37Ma tô duré siwi ti'â. Apito hã ma tô duré siwi tiwĩ. Duré Hebrõ 're, 're idahâimana za'ra mono norĩ zama ma tô siwi uprosi, iwaptoma 're idahâimana za'ra mono norĩ zama. Tawamhã Zozué, 'ri nho'u te te siwi iprub da hã ma tô ti'ru, Égrõ ma te te i'manharĩ ne, ni'wa hã hâiba ré hã hâimana ãna.
38Taha pari Zozué norĩ, tite dasi'wapéi 'manharĩ'wa norĩ me apâ si'aba'réi wamhã, ma tô siwi sahu, Débi na 'ri nho'õmo nhisi hã. 39Tawamhã ma tô duré 'ri nho'u siwi ti'â, isib'apito zama, duré uburé iwaptoma 'ri nho'õmo norĩ zama. Tawamhã ta norĩ 'ri nho'õmo mono 're, 're idahâimana za'ra mono norĩ hã ma tô uburé siwi uprosi. Ãne ma tô Zozué, Débihi ma hã 'manha, duré ite apito ma hã, Hebrõ ma te te i'manharĩ ne hã, duré Libna ãma apito norĩ ma te te i'manharĩ za'ra ne hã.
40Ãne ma tô Zozué hã uburé ti'a norĩ ãmamhã ai'uté za'ra, ẽtẽ ãma apito norĩ 're ihâimana za'ra mono ãmamhã, duré hâiwa nhimire niwĩ norĩ ãmamhã, romharé norĩ ãmamhã, duré ẽtẽ zahâpâm na'rata norĩ ãmamhã. Ni'wa te te rẽme õ di. Uburé pese ma tô uprosi pese a'uwẽ hã, Uburé Danhib'apito, Izaraéu nhihudu norĩ te, 'Re ihâimana u'âsi mono hã te te tãma i'ru za'ra zéb zarina. 41Zozué hã Cade-Banea hawi Gaza u hã ma tô da'ãma ai'uté, duré Gosẽ niwĩ ro 're isa'wari mono hawi Gibiã u hã. 42Uburé Danhib'apito, Izaraéu nhihudu norĩ te 'Re ihâimana u'âsi mono hã ma tô tinhib'a'uwẽ norĩ ma, te te a'wapé. Tahawa Zozué hã ma tô apito norĩ ãmamhã ai'uté za'ra, isipti'a za'ra ãmam zama, tô misi haré dasi'wapézém na hã. 43Ãne pari ma tô Zozué norĩ tite dasi'wapéi 'manharĩ'wa norĩ me hã apâ ai'aba'ré, Gilgau ãma romhâ 'manharĩ na 'ri nhoré u hã.
Trenutno izabrano:
Zozué 10: xavBP
Istaknuto
Kopiraj
Uporedi
Podeli
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2011, Wycliffe Bible Translators, Inc.