Ezodu 7
7
1Tawamhã Uburé Danhib'apito, te Mozésihi ma tinha ãne:
— Wa hã wa za aima 'manha, ĩsine 'Re ihâimana u'âsi mono na apito Fara'oho ma aihâimana da. Tawamhã Arã adub'rada hã te za dama ipire zadawa wasu'u'wa ne, apito ma nasi asadawa wasu'u. 2Tahawa, a hã te za Arãhã ma, uburé te aima iwaihu'u mono zém na, tãma ĩzadawa wasu'u, aimreme nhipai u apito Fara'oho ma, te te rowasu'u mono da, duré te te tiwi waptẽrẽ da, Izaraéu nhihudu norĩ ma, te te iwaprosizé hã isipti'ai hawi wairébé da. 3Tane nherẽ, pẽ'ẽ tete na hâimana da hã wa za a'â nasi 'rãnhito. Tawamhã ahâ na wa za nasi a'â Ezitu ãma marĩ hã tãma a'manha, ĩnhimiromhõsi pipa na. 4Taha nherẽ, apito hã te te a'â aiwapari aba õ di za. Tawamhã wa hã wa za ĩnhimihâzém na hã azâ, ĩte Izaraéu nhihudu norĩ, Ezitu hawi te simroi mono da hã. 5Tawamhã wa hã, ezipsiu norĩ te hâ za'ra da, oto ĩnhib'rada te sarõtõ wamhã, duré ihawib za'ra Izaraéu nhihudu norĩ te sani za'ra wamhã, te za ezipsiu norĩ hã siwi ĩwaihu'u, wa hã Uburé Danhib'apito uptabi na.
6Tawamhã Mozési norĩ Arãhã me, ma tô Uburé Danhib'apito te te tãma iwaihu'u zahuré zé hã mreme 'manharĩ zahuré. 7Mozésihi ãma 80 na ãma iwahub ãma ré, duré Arãhã ãma 83 na ãma iwahub ãma ré, ma tô Ezitu te apito ma, ãne hã tãma nharĩ zahuré.
Arãhã nhiwã isiwahizé wasu'u
8Tawamhã Uburé Danhib'apito, te Mozési norĩ ma, Arãhã me hã tãma nharĩ zahuré ãne:
9— Ezitu ãma apito, niha na marĩ, dama i'manharĩ waihu'u'õ, 'manharĩ aba da, te te aima 'rui wa'aba wamhã, a hã Mozési te za Arãhã ma tãma i'ru, tinhiwã te te âri da, duré ti'ai u te te me da, apito nho'remhã. Tawamhã tinhiwã, ti'ai u te te mei wamhã, te za wahi na si'manha.
10Tawamhã apito u, Mozési norĩ Arãhã me oto neb zahuré wamhã, ma tô Uburé Danhib'apito te te tãma iwaihu'u zahuré zé hã tãma poto hâi'ré zahuré. Tawamhã Arã, ma tô tinhiwã ti'ai u hã time apito nho'remhã, duré tãma iromhuri'wa norĩ nho'remhã. Ta hã te te mei wamhã, ma tô siwahi isõ'reb za'ra hã. 11Tawamhã apito, rowaihu'u pese 'wa norĩ zô duré romhõsi'wa norĩ zô zama ma tô sô tihârâ za'ra, tô isine marĩ hã te te tãma 'manharĩ za'ra da. 12Tawamhã hâiba bâ romhõsi'wa norĩ, ti'ai u tinhiwã te te isãmra hã ma tô ta norĩ hã siwahi za'ra. Tane nherẽ, Arãhã nhiwã ma tô romhõsi'wa norĩ nhiwã isiwahi za'ra hã tiwi sõmri za'ra. 13Tane nherẽ, Uburé Danhib'apito te te inharĩzéb zarina ma tô apito pẽ'ẽ tete na a'â tô tihâiba. Tahawa, Mozési norĩ Arãhã me, te te tiwi irowaptẽrẽ zahuré zém na te te ãma saze zahuré õ di.
Imorĩ'rata na rob'manharĩzé wasu'u, isi'âwapruzém na
14Tawamhã Uburé Danhib'apito, te Mozésihi ma tinha ãne:
— Apito pẽ'ẽ tete na hâimana wa, Ezitu hawi dawairébé da hã te te dama rowairébé õ di. 15Tahawa asõtõ hâ na za, mararé awẽ wi apito Fara'oho tẽme aimorĩ da, Nilu na panho'õmo nhisi u morĩ ré. Tawamhã te za asiwã isiwahi hã asiré i'â, iré sô asimipari da, pazaihâ na hã. 16Tawamhã te za ãne tãma inha za: “Uburé Danhib'apito, Ebreu norĩ te 'Re ihâimana u'âsi mono, te aima sadawa wasu'u da te we ĩzatõ, isib'a'uwẽ norĩ ma waprosi waré wa, oto si'aba'réi hâ, rop si 're irosa'wari mono ãma, õhõ ãma si 're wata za'ra mono da. Tane nherẽ, zahadu a hã wapari õ di isimirowaihu'uzé hã. 17Tahawa 'Re ihâimana u'âsi mono te ãhã na aima tinha: Marĩ te te i'ab'manharĩzé mono na te za Uburé Danhib'apito na hã iwaihu. Apito, ã hã ĩnhiwã ĩnhib'rata ihâimana na wa za asõ'a â hã azâ. Tawamhã te za â wapru na si'manha. 18Tawamhã tebe, Nilu â 're, 're ihâimana za'ra mono hã nemo te za dâ'â. Duré â hã za â'uzé uptabi di. Tahawa ezipsiu norĩ hã te te duré âhuri waihu'u õ di za.”
19Tawamhã Uburé Danhib'apito, Mozésihi ma, te duré tãma tinha ãne:
— Ma'ãpé Arãhã ma nharĩ, tinhiwã â nhisiwi te te wẽ da. Tawamhã daro mono bâ te za â hã si'âwapru, pa nho'õmo mono na hã, isipti mono na hã, duré pu'u mono na â wa'õno 're ihâimana za'ra mono hã. Ãne te za duré wede 'manharĩ na piza 're marĩ nhemezéb 'remhã, duré ẽtẽ na ub'rẽ 'rem ne 'remhã si'âwapru za'ra.
20Tawamhã Mozési norĩ Arãhã me, 'Re ihâimana u'âsi mono te te tãma i'ru zahuré zéb uwaibaba, ma tô apito nho'remhã duré tãma romhuri'wa norĩ nho'remhã 'manharĩ zahuré. Tawamhã Arã isõ'a za'ra tinhiwã te te isarõtõ na te te ãma â pré'é wamhã, ma tô â hã si'âwapru. 21Tawamhã tebe hã nemo ma dâ'â. Duré â uzé uptabi di. Tahawa ezipsiu norĩ tinhib'â za'ra hã te te âhuri waihu'u õ di. Duré Ezitu 'remhã daro mono bâ te â wapru hã nomro. 22Tawamhã Ezitu ãma marĩ 'manharĩ waihu'u nhipese'wa norĩ hã ma tô õne hã duré siwi 'manha. Tahawa apito Fara'o pẽ'ẽ tete na hã ma tô duré a'â tihâiba. Uburé Danhib'apito te te inharĩzéb zarina, Mozési norĩ Arãhã me, te te tiwi irowaptẽrẽ zahuré zé hã te te wapari õ di. 23Tahawa za marĩ tãma ihâimanazém na sina hâtâ'â ãna hã ma tô apâ mo, tinhimiromhurizé 'ri u. 24Tawamhã pazaihâ na ezipsiu norĩ, ma tô â wẽ zô hã te te sima ab're, te te âhuri da. E marĩ wa. Panho'õmo na â hã te te âhuri waihu'u õ wa.
25Tawamhã Uburé Danhib'apito, panho'u te te â pré'é parimhã, ma tô â waprui ré hã 7 na bâdâ hã ãma mo.
Trenutno izabrano:
Ezodu 7: xavBP
Istaknuto
Kopiraj
Uporedi
Podeli
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2011, Wycliffe Bible Translators, Inc.