Ruma 2
2
Guma Bizlaf ma dəlili
1Hwa ma kazla guma ata həji aagi, ataa aŋkwa, guma kwa ci, tuh aska akas, kwa a ɗa hwa vaye. Hwa kazla guma ata həji aagi, ama hwa kaɗalə andza təmta yəm, azha guma ndə hwa kazlə ci, a ɗa hwa dzaw ha kwa. 2Həji kasənə, Bizlaf a dzamatana guma gber a həji ma kaɗal shiŋ zlən ma həna watsa aagi. 3Deŋ kwa ci, hwa ala ma kazla guma ata həji ma kaɗal shiŋ zlən watsa aagi, azha dəba hwa aɗalə andza təmta ya, deŋ kwa ci, hwa aɗa reh ara guma Bizlaf hwiy vəw? 4Bizlaf ci, təwah ikwa a guɗaŋ, a kasəw ma, a kasən teh səkən. Hwa kasən ci, təwah Bizlaf a may aska hwa ambaɗ landza kwa bəza aka wəra? Hwa kasənə mbara wəra? 5Ama hwa taji a teh səku, hwa taji a mbaɗ landza kwa bəza səku, sha ana ndə a ɗa, bay ghuɗek Bizlaf ana ndə hwa kayakənə a ha kwa, ma vah ta ghal ghuɗek Bizlaf. Ma vah watsa, Bizlaf a ghal ci, guma ndə a zlatana a həji, a ɗa ŋter. 6Azha aŋtəranə wəda zlən ataa kwa vaye andza zlən tə ndə a ɗalə. 7Həji ma kaləm a ɗal səkən ma təwah aagi, ma kagas sləf ma kaandaha, həji ma kagas a həmən abə miɗ aagi, aagi alima miɗ ma ŋkula kəɗaŋ ara Bizlaf. 8Ama həji ma kazhinakənə ha aagi, ma ŋkula hawanə a ma ma ɗa ŋter aagi, pəl aagi ha ta ka, a ɗal səkən ma gamak, həji watsa aagi ci, Bizlaf a akəɗaŋ ghuɗek tə bəza a guɗaŋ ata təmta. 9Dadawər abə yaka ana ma kateh kala ala ma kaɗal zlən ma gamak, a diw ata Yahuda aagi kwagwa, a diwzha tə ata həji ma ŋkula ɗa Yahuda aagi. 10Aɓa azha ci, Bizlaf a vəlanə sləf, həmən abə təwah a kwa vaye ma kaɗal zlən ma ŋtan, a Yahuda aagi kwagwa, a diwzha tə, a həji ma ŋkula ɗa Yahuda aagi. 11Ara ndə a ɗa, atama Bizlaf ci, həji aagi ɗa ma ŋtaguleŋ. 12Kala həji ma kaɗal mpət aagi ndə aa ŋkula sən ma ma garagar ataa Musa ya, aagi abazl, kwa aa kasən ma ma garagar səku. Kala ala ma ɗal mpət ma kasən ma ma garagar ya, guma a azla a heɗe andza ndə ma ma garagar watsa a ghalə ka. 13Ara ndə a ɗa, dək həji ma kateh ma ma garagar aagi ana ma kaɗa dəlili atama Bizlaf səku, ama həji ma kaɗal zlən abə ma ma garagar aagi. 14Həji ma ŋkula ɗa Yahuda aagi ya, aa kasən ma ma garagar səku. Ama ndiɓi aagi ɗalə andza ndə ma ma garagar kaɗiwi, həji watsa aagi, aagi abə ma ma garagar akas, aagi abə ma ma garagar ta aka. 15Aa kaghalə ci, zlən ataa ma ma garagar taŋtiraya a ꞌunəf ta, deŋ ŋkwaɓ ta yəm a kaghalə. Sha ana ma kaɓin a wəlata ka ata vah minja, ma vah minja, sha ana ma kaarehata bəza. 16Sha ana ma kaaghal ma vah ndə Bizlaf a kaazla guma ata həji aagi, andza Ma wiyə ma təwah ndə sa ghalə, Bizlaf a azla guma ata səkən ndə həji aagi ɗalə ata digh gwara ara Yesu Kərist.
Ŋkalzə ɗal awa ataa həji Isərayila aagi
17Azha, hwa ndə zləm a ɗa ndə Yahuda, hwa ma vəla ha kwa ka a ma ma garagar, azha, hwa ma tsa sasən kwa ka ata Bizlaf kwa, 18hwa ala ma kasən səkən ndə a kamayə, hwa ma kasən ma ndza a ma ma garagar, hwa teete a may səkən ma ŋtan. 19Hwa ala ma tsa ha kwa ka a ghalatana təf a həji wələf aagi, hwa ana ma kaweɗatana la a həji ma ndza a ləvaŋ aagi, 20hwa ala ma kasərəkatana səkən a həji ma ŋkula sən səkən aagi, hwa ma kasərəkatana səkən wəzhi ma fashiɗ aagi, ara ndə a ɗa, hwa kasən gber, ma ma garagar ma kaghalahu sən səkən abə ma ma ɗa ŋter. 21Mbara hwa ala ma kasərəkatana səkən a həji ndiɓi aagi ya, hwa ŋkula sərəkanə bəza a ha kwa me? Hwa ana ma kaghalə, həji kaŋhil səku ana hwiy, ama hwa kaŋhil! 22Hwa katak həji aagi ata ɗal mazheref, ama hwa kaɗal mazheref! Hwa ma ŋkula ji kaɗal takun, ama hwa kaŋhil səkən ma ndza a daba njivi ta aagi! 23Hwa kaɓas aska ma ma garagar, ama hwa tahawanə a Bizlaf akas, ara ndə hwa ŋkula njin ma ma garagar. 24Ara ndə a ɗa, taŋtiraya a Ɗerewal ma ghwaɗeɗe, Aa kaɓas zləm Bizlaf bəza ana həji ma ŋkula sən Bizlaf aagi dawna huni. 25Ŋter andza hwa tanjin səkən ndə ma ma garagar a ɗiwi, watsa ci, zla mazhemter kwa təwah. Ama andza hwa kanjin səkən ndə ma ma garagar a ɗiwi aka səku ya, kwa andza hwa zla mazhemter, hwa ndza andza ala ma ŋkula zla mazhemter. 26Andza ala ma ŋkula zla mazhemter tanjin səkən ndə ma ma garagar a gar ka ya, həna ala ma ŋkula zla mazhemter watsa, həji kaagəra andza ala ma zla mazhemter aka wəra? 27Ala ma ŋkula zla mazhemter watsa, ama a kanjin ma ma garagar, a aɓin a zla guma ata hwa, hwa ala ma ŋkula ji a njin ma ma garagar, avəli hwa abə ma ma garagar taŋtiraya, hwa tazla mazhemter bəza. 28Ara ndə a ɗa, səkən ndə həji kagəra ata nja, ana ma kaghalə a ɗa hwa ndə Yahuda səku, aka səku veviɗ ndə həji kagəra ana ma kaghalə zla mazhemter kwa səku, 29ama səkən ma ɓah aka ata digh ana ma kaghalə hwa ndə Yahuda, səkən ma ndza a ꞌunəf ana ma kaghalə hwa tazla mazhemter kwa bəza, a ndaha ara Miɗ Bizlaf, mba səkən ndə ma ma garagar a ŋtir ka. Ndə Yahuda ma ŋter ya, a lima həmən tə ara həji ma dəgnak səku, ama a lima ara Bizlaf.
Trenutno izabrano:
Ruma 2: GOU
Istaknuto
Kopiraj
Uporedi
Podeli
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi