Iironga 28
28
ONTOPORUA 28.
Paulus okua cika ko Roma.
1Sho tua ri tu’upicua, otu’uvu uo edina rjotshitengedera shika, nokutja Melita.#28:1 Otshitengedera shika nena atshi tiua uo Malta. Aantu jomutsho oje tu tsakaneka nombiri nuukuume.
2Moru’ovura ndji inahi tsheka no moru’uutarara, oja sameka omuriro omunene, no je tu tarareka atushe.
3Ndere Paulus, sho a kuata kumue ondumba hiishua ja kukuta, e hi umbire momuriro, epiri orja shituruka mo kuupju, rja kakatere keke rje.
4Aantu jomotshitengedera oja mon’epiri, rj’endjerera keke rje, oja rombueracana ja ti: “Omuntu nguno omudipagi tshiri. Ombepo hegeero inahi ara a kare nomuenjo nanto a hupicua mefuta.”
5Ndere okue ri ipupura, he te ri umbire momuriro, ina mon’otshiponga.
6Mbejaka oja ri je tshi, ta ka zinda, nenge nanzija ta guire po a se. Ndere sho ja tegerera orure, oja mona nokutja ina adikua kuuhineji nando ua tsha. Ongashi jo ja diradira ja ti: “Nguno okarunga tshiri.”
7Ponima mpoka opua ri uo ofarma homukuruntu guotshitengedera, edina rje Publius. He okue tu tuumba nombiri, tua ri aahenda je uure uomasiku gatatu.
8Otsha adikua uo nokutja she ha Publius okua ri t’ehama oruiidi no kombuiko. Paulus okua hi ku he, ta garikana, e mu tenteke omake ge, he te mu eruda.
9Shono, sho tsha ningua, aavu ajeshe jomotshitengedera shika oje ja, ongashi j’erudua.
10Oje tu simaneka nomasimaneko ogendji. Nde sho tua zi ko, oje tu pe shoka tua pumbua.
11Eemuedi ndatu sho da piti, sse otua zi netembameja ndi rja zire ko Aleksandria. Rjo rja ri rja rumba uo mokufu potshitengedera shika, rja ri rj’oparekua necano rja Kastor na Polluks.#28:11 Kastor na Polluks ogo omadina giikarunga jaapagani. Iikarunga mbino keendunge daapagani mboka jonare oja ri iikuaci ja mbo taa mono iishuna mefuta. Otsho omatembameja og’oparekua orundji necano rjajo.
12Sse otua ciki kotshirando Sirakusa, hu tua ninga omasiku gatatu.
13Okuza mpoka otua piti popepi nomukunkuro, nde tue ja ku Regium. Ombejo hokuutshimbantu, sho ha pepe esiku ndi rja randura ko, sse otue ja esiku etijari ku Puteoli.#28:13 Otshirando shika otshi ri popepi na Roma.
14Hu tu’itsu aakuetu jomehiteero, mba je tu garikana tu menekere pu jo omasiku uunuari. Keshuriro otue ja ku Roma.
15Jakuetu ja huijaka, sho je tu uvu, oje tu tsakaneka sigo okotshirando Forum Apii na Tres Taberne. Paulus, sho e ja mono, okua amberera Karunga nde ta tsuua omukumo.
16Sho tue ja ku Roma, Paulus okua pitikirua okuikarera puamue nomukuiita ngu e mu rangera.
17Omasiku gatatu sho ga piti, Paulus oku’icana ku he aanamadina jaajuda. Sho ja gongara, okua ti ku jo: “Jarumentu jamuameme, nanto inandi ningira otshiguana tshetu uuhineji, nenge eemkaro dootate, onda mangua, nda gandjua mu Jerusalem komake gaaroma.
18Mboka, shi j’uvundje, oja ara okuecandje, sho inaa mona ondjo hokusa mungaje.
19Ndere aajuda sho ja patana, ngaje onda ciminikua okuicana etokoro rjomukuaniirua. Ndere tshiri, inandi ara okuumaneka otshiguana tshandje.
20Otsho nda arere ndi mu mone, ndi popje nane, oshoka omoru’etegerero rj’Israel#28:20 Okutja etegerero rjokumona omukuriri. ngaje nda mangua nerjenge ndika.”#28:20 Komukaro guaaroma Paulus okua ri arushe nerjenge kokuoko kue kuokorurjo.
21Jo oje mu jamukura: “Inatu peua eembrife di da za kevi rja Judea, tadi ku popi. Otsho kapu na gumue gua jakuetu e ja e ku okororere nenge e ku popje neji.
22Ndere otua ara tshiri okuuva omadiradiro gohe, oshoka otshimpaga shika#28:22 Otshimpaga shika otsho egongaro rjaakriste jotango, eklesia. otue tshi uva tatshi rudikua akushe.”
23Sho je mu rombuere esiku, ojendji oje ja ku he mondjugo. Te ja fatururire otshirongo tsha Karunga noku tshi okorora. Noku ja ronga okuza ongura sigo onguroshi, he ta kembadara oku ja dimbururica Jesus noku ja tompa nompango ha Moses no neehapu daaprofeti.
24Jamue oj’iteere shoka e ja rombuere. Ndere jamue inaa hiteera.
25Sho inaa hiteeracana nomadiradiro gauo nde ja hi, Paulus okua popi ohapu himuike ta ti: “Ombepo Ondjapuki oha popja dotshiri mokana komuprofeti Isaias, ha rombuere ootate,
26sho tahi ti: “Inda kotshiguana shika u tje: Otamu ka uva nomakutsi ne kamu uvite ko, otamu ka tara nomesho, ne kamu uete tsha.
27Oshoka omutima guotshiguana shika ogua kukuta, omakutsi gauo oga cita, jo ja cicikirica omesho gauo, kaa mone ko nomesho, kaa huve ko nomakutsi, kaa dimburure meemuenjo dauo, kaj’idirurure, ngaje kandi j’erude.”#28:27 Isaias 6:9, 10.
28Ano kareni mu tshi tshi naua, nokutja ehupico ndika rja Karunga otari ka tumua kaapagani. Ojo taa ke ri uva.”
29Sho a popi doka, aajuda oja zi mo, ja patana unene mokati kauo.
30He muene okua kara mondjugo ndji e hi futire erara arishe rjeemvo mbari nokua tuumba ajeshe, mba je ja ku he.
31A huvica otshirongo tsha Karunga nokua ronga nuufure omarongo ga Muene Jesus Kriste, in’imbiua.
Omission Heklesia Ekatolika, 1951. Namibian Catholic Bishops Conference.