मत्ती 14

चुसुणे बाड़ा यूहन्ने मरुण

मरकुस 6:14-29; लूका 9:7-9

1तेस टेम गलील राज्ये राजा हेरोदेसे यीशु बारे बोक शुणी। 2त तेन अपु नौखरी जे बोलु, “ए चुसुणे बाड़ा यूहन्ना भो! से मरो तेन्हि अन्तरा दुबारी जी गा। तोउं त तेस अन्तर चमत्कार करणे शक्ति असी।”

3राजा हेरोदेसे ई तोउं बोलु किस कि राजा हेरोदेसे अपु भाई फिलिप्पुसे जुएली “हेरोदियास” जुओई ब्याह किओ थिआ। #लूका 3:19,20 4पर यूहन्ने हेरोदेस जे बोलु, “तोउ, अपु भाई जुएली रखीण हें नियमे खिलाफ असी।” 5तोउं त, से तस मारण त चहन्ताथ, पर मेह्‍णु हेर डरताथ, किस कि मेह्‍णु यूहन्ने भविष्य वक्ता मानतेथ।

6पर जपल राजा हेरोदेसे जमली आई, त हेरोदियासे कुई मेहमानी के अगर नच कइ राजा हेरोदेस खुश कइ छड़ा। 7से अत खुश भुआ कि तेन सोहो कर कइ जुबान दिती कि “जे कुछ तु मगती, अउं तेन्धे देन्ता।” 8तेन कुई अपु ईये चुखि पुठ बोलु, “तुस अभेईं यक मंगाई अन्तर मेह्‍णु चुसुणे बाड़ा यूहन्ने म्युकुड़ कट कइ मेन्धे दिए।” 9राजे त सुआ दुख भुआ, पर अपु जुबाने त साते बिशो मेहमानी के बझई जोई राजि भोई गा। 10तेन जेहेल अन्तर मेह्‍णु लंघाए त यूहन्ने म्युकुड़ कटवाई छइ। 11तोउं तसे म्युकुड़ मंगाई कइ अण्ही त तेस कुई धे दी छइ, त से अपु ईया केईं घिन गई।

12पता यूहन्ने चेले एई कइ तसे लाश घिन गे त पथि छड़ी। होर तेन्हि घेई कइ यीशु जे एसे बारे बोलु।

यीशु पन्ज हजार मेह्‍णु खांजे खिलाण

मरकुस 6:30-44; लूका 9:10-17; यूहन्ना 6:1-14

13जपल यीशु यूहन्ने मरणे बारे शुणु त तठिआ से नाव पुठ चढ़ कइ अकेले यक अरुणि धार जे घेई गा। पर जपल हुसुड़ा ई पता लग गा त से शेहर त ग्राईं केआं हंट कइ तसे पता पता घेई गे। 14से जपल नाव पुठा भीं आ त तेन सुआ हुसुड़ा का। तेन्हि पुठ तस दाह एई गई त जतु बि बीमार मेह्‍णु थिए से सोब सुसुरेरि छड़े। 15जपल ब्यादि भुई त तसे चेले तसे भेएड़ एई कइ बोलु, “गुरुजी, अस अरुणि धार असे त पेचादीण लगो असु। मेह्‍णु अब घेण जे बोले कि से इठिआ घेई कइ नीड़े भेएड़े ग्राईं केआं अपफ जे खांजे खरीदे।” 16पर यीशु तेन्हि जे बोलु, “अन्के घेणे जरूरत नेईं! तुस अन्हि खिलाण दिए।” 17तेन्हि तेस जे बोलु, “असी केईं पन्ज रौठि त दुई मछली छड़ दी कइ होर कुछ नेईं।” 18तेन बोलु, “अन्हि इठि में भेएड़ घिन एईए।” 19तोउं तेन मेह्‍णु जे बोलु “घास पुठ भीं बिशे।” तेन पन्ज रौठि त दुई मछली टाती त खड़िया स्वर्गे धे हेर कइ परमेश्वरे धन्यवाद किउ त रौठि टुकड़ेरी टुकड़ेरी कइ चेली कें धे देण लगा। त चेले मेह्‍णु कें धे बांटण लगे। 20जपल सोब खाई कइ रज्जि गे त चेली बचो रौठि के टुकुड़ के बाराह चाउं भरे। 21तठि खाणे बाड़ी अन्तर जिल्हाणु त गभुर छड़ दी कइ सद मड़द पन्ज हजार थिए।

पाण पुठ यीशु हंटण

मरकुस 6:45-52; यूहन्ना 6:15-21

22तोउं, तिखेईंए यीशु अपु चेली नाव पुठ चढ़ कइ तथे पार घेण जे लंघाई छड़े। पर से अपफ हुसुड़ा घेण तकर तठि बिशा। 23हुसुड़ा घेण केआं पता, से अपफ फाट पुठ जे गा त प्रार्थना करण लगा। त रात भुण तकर से तठि अकेला थिआ।

24पर तोउं तकर नाव तथे बुच पुजो थी त ती हिलण लगो थी, किस कि तठि जोरी जोई ब्यार लगो थी। 25पथवारी ईं यीशु तथ पुठ हंट कइ तेन्हि चेली के भेएड़ आ। 26त चेले तस तथ पुठ हंटते हेर कइ डर गे, त बोलुण लगे, “ए भूत भो!” डर कइ से हुशेरि देण लगे। 27त यीशु झठ तेन्हि जे बोलु, “हिम्मत रखे! डरे नउ! अउं भो।” 28पतरसे तेस जे जवाब दिता, “ए प्रभु, अगर तुईएं भो, त मोउं बि पाणि पुठ हंट कइ अपु भेएड़ एणे इजाजत दे।” 29तेन बोलु, “आई!” त पतरस नाव छड़ दी कइ पोण पुठ हंट कइ यीशु भेएड़ जे घेण लगा। 30पर पता ब्यार हेर कइ डर गा। जपल डुबुण लगा त हुशेरि दी कइ हक दिती, “ए प्रभु, मोउं बचा!” 31यीशु झठ अपु हथ दी कइ से टाइ छड़ा त तेस जे बोलु, “ए कमजोर विश्वासी! तेईं शक किस किआ?” 32पता जपल से नाव पुठ चढ़ गे, त ब्यार बि यकदम डम्हरी गई। 33ई हेर कइ, जे नाव पुठ थिए से सोब चेले तसे खुरी पुठ उटेऊ बिश कइ बोलुण लगे, “गुरुजी! सच्चे, तुस परमेश्वरे कुआ भिन्थ।”

गन्नेसरत इलाके अन्तर यीशु बीमार मेह्‍णु सुसुरेरण

मरकुस 6:53-56

34तोउं जपल यीशु त तसे चेले नाव पुठ सवार भोई कइ पार घेई गे त गन्नेसरत इलाके पुजे। 35जपल तठियाणि मेह्‍णु यीशु पिछाण छड़ा, त औत-कोत बइ सोबी देशी जे खबर लंघा त सोब बीमार मेह्‍णु तसे भेएड़ अण्हते। 36होर तसे छनेअरे कर कइ बोलु, “गुरुजी! छने बीमार मेह्‍णु कम से कम अपु झिणे पलो ईं छूण दे।” त जतु जेईं तसे झिणे छुए, सोब सुसुरी गे।

Trenutno izabrano:

मत्ती 14: pgg

Istaknuto

Kopiraj

Uporedi

Podeli