मत्तयाल 2
2
पंचंगाल्क हूळानोर येसु सामिना काल्क मोळ्कालय वायमळ
1येसु यहुदिया एरियाता बेतलहेम नाटे पुटतस्के अगा हेरोद इनना राजाल राज्येम कीसेक मत्तोर. अदे कालमते पोळ्द पेयसनाहेंदाल बोरो पंचांगम हूळानोर येरुसलेम सहरते वातुर. 2वासि राजांक कलियसि, “पूनें-पूने पुटता यहुदिल्कुना राजाल बगा मंतोर? पोळ्द पेयसनाहेके ओर पुटताप मोमोट उंदि सुक्कातुन हूळतोम. ओना काल्क मोळ्कालय मोमोट वातोम,” इंचि राजन पूसकीतुर.
3इद केंजसि हेरोद राजाल आनि येरुसलेम सहरअंता वेरिय्कुत्तुर. 4अस्के हेरोद राजाल येरुसलेम सहरता पेद्दा पेर्मालोर्कुन#2:4 पेद्दा पेर्मालोर्क ईर वेल्लेन मंदि मनांतुर. आनि अगाटा दर्मसास्त्रम कराहना गुरुल्कुन अंटोर्कुन केय्सि, “किरिस्तु बगा पुट्टनद मत्तोर?” इंचि पूसकीतोर. 5अस्के ओर, “यहुदिया एरियाता बेतलहेम नाटेने,” इंचि वेहतुर. 6एनकटा पेनदा कबुरतोर रासताप,
“ए यहुदिया एरियाता बूमिपोर्रो मंदना बेतलहेम नाटेनोरिटा,
मिमेट मीवा नार, सिन्नादे इंचि इनकुन्मट.
बारित्ते नावा इस्राएल देसेमता लोकुल्कुन कापाळनोर,
आ राजाल मीवा नाटेनेन पुटनद मंता.”#मीका 5:2
7अस्के पोळ्द पेय्सनाहेंदाल वाता पंचांगम हूळानोर्कुन हेरोद राजाल सपुडदाका कलियसि “सुक्का बद वेलाक दिसता?” इंचि पूस कीसि एरपाट कीकुत्तोर. 8पजा “मिमेट होंचि आ पुटता पेडन बेस पह्कट आनि दिसतारित्ते नाकु वासि वेहट, अस्के ननागुडा होंचि ओना काल्क मोळ्ककन,” इंचि वेहचि ओर्कुन बेतलहेम नार लोहचीतोर.
9पजा राजाल वेहता पोल्लें केंजसि आ पंचांगम हूळानोर अगटाल पेय्स्तुर. मुन्ने बद सुक्का दिस्सि मत्तानो अद सुक्का ओरा मुन्ने-मुन्ने होंचि आ पेडल मत्ता जेगा पोर्रेन आगुता. 10आ सुक्कातुन हूळसि ओर्कु इरगा आनंदम आता. पंचांगम हूळानोर येसु पुटतगा बेतलहेम नाटे होत्तुर.
11ओर लोता लोप्पो होंचि आ पेडन तल्लुर मरियमनगा हूळतुर. आ पेडाना काल्कुनपोर्रो अरसि मोळ्कतुर. आयंका ओर जोरानाल बंगारम, गंदकम,#2:11 गंदकम इद उंदि एक्को दराता वस्तु आंद. ऊदु इसंटा एक्को दराता वस्तुक तेंडसि ओन्क हीतुर. 12आयंका “मल्सि हेरोदनाहेके होनमट” इंचि पेन कलाते वेहताहेंका ओर इंकुंदि हर्रि पीसि ओरा देसेम पेय्सि होत्तुर.
येसुन पीसि इजिप्त देसेमते होनमळ
13पंचांगम हूळानोर होत्तारित्ते, योसेपुंक उंदि पेनदा दूता कलाते दिस्सि, “निमे तेदा, पेडन आनि ओना तल्लुन पीसि इजिप्त देसेम पेय्सि होन. हेरोद राजाल पेडन हव्कनाहाटीं पह्कांतोर. अदुनहाटीं नना नीकु मर्रा वेहनदाका अग्गेन मन्नु,” इंचि वेहता.
14अस्के योसेप अदे नर्का पेडन आनि पेडाना तल्लुन पीकुंचि इजिप्त देसेम्कु पेय्सि होत्तोर. 15हेरोद राजाल हासोननदाका अग्गेन मत्तोर. “नना नावा मर्रिन इजिप्त देसेमताल केयतन”#होसे 11:1 इंचि वेल्लेन वर्सां मुन्ने पेनदा कबुरतोराहेंदाल वेहामळ जर्गता, पोल्ले निजम आयगोम इंचि इदंता जर्गता.
हेरोद राजाल बेतलहेम नाटेना पिलाल्कुन हव्कंतोर
16आ पंचांगम हूळना लोकुल्क ओन नाडहे कीतद एरपाट कीसि, हेरोद राजांक इरगा होंग वाता. आ पंचांगम हूळानोराहेंदाल आ पेडल पुटता वेला एर्का कीकुंचि मत्ताहेंका बेतलहेम आनि पकापीसि मत्ता नाटेने मनना रोंडु वर्सानोर, इंका रोंडु वर्सांकन्ना सिन्नोर्क अंटोर मांड्सा पिलाल्कुन हव्कट इंचि हेरोद राजाल आदेस हीतोर. 17ई परकारम यिर्मयाह इनना एनकटा पेनदा कबुरतोर वेहता पेनदा पोल्ले निजम आता. अद पोल्ले इल्हा मत्ता:
18“रेचेलना पिलाल्क हासि होत्तुर, इंचि रामाह इनना नाटे
दुक्कमते अळाना सप्पुड केंजावाता.
अद दाना पिलाल्कुनाहाटीं अळसेके मत्ता,
बोर सम्मत किय्यिनागानि अद समत आयाहिल्ले.”#यिर्मयाह 31:15
योसेपना कुटुंबम इजिप्त देसेमताल मल्सि वायमळ
19कोन्नि रोजकुंक हेरोद राजाल हातोर. अस्के इजिप्तते मनना योसेपुनतोनि कलाते पेनदा दूता वासि, 20“तेदा, पेडन हव्कालय हूळसेक मत्तोर हातोर, अदुनहेंके निमे पेडन आनि ओना तल्लुन पीसि इस्राएल देसेमते मल्सि होन,” इंचि इत्ता.
21अस्के योसेपु पेडन आनि पेडाना तल्लुन पीसि इस्राएल देसेमते मल्सि होत्तोर. 22गानि यहुदिया एरियाता हेरोद राजाल हातारित्ते “ओना जेगाते ओना मर्रि अर्केलाल राजाल आतोर,” इंचि तेळियतारित्ते ओर अगा होनालासि वेरियतोर. आयंका कलाते पेन वेहताहेंका ओर गालिल एरियाते होत्तोर. 23अगा ओर नासरेत इनना नाटे होंचि जेगा पीतोर. इंचि “ओन नासरेततोर इंतुर.” इल्हा पेनदा कबुरतोर मुन्नेने वेहचि मत्तद इंदके निजम आता.
Trenutno izabrano:
मत्तयाल 2: esg-Deva
Istaknuto
Kopiraj
Uporedi
Podeli
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2022, Wycliffe Bible Translators, Inc. All rights reserved.
